Read Alur Poi Mi Cik 9 Bible Online

Poi Mi Cik 9 - Alur bible

Poi Mi Cik 9

¹Winj, E Israel; ibikadhu loka Yordan tin, kara imond iyak thek ma dit ma tek ma sagu in, adhura ma dit m’ugombre utundo cil kum polo,

²dhanu ma dongo ma boco de, ma wot Juanaki, m’ing’eyo, man m’iwinjo pigi kumae, Ng’a ma copo cungo i wang’ wot Anaki?

³Ka kumeno ng’ei tinimi, nia Yehova Mungu peri en e ng’atu m’ukadhu i weng’wu calu mac m’uwang’; ebinyothogi, man ebidiogi piny i weng’i: kum kumeno ibiriemogi woko, man ibiketho ginyothri pio, calu Yehova yero iri.

⁴Kud iwac i adundeni, yo ng’ei ma Yehova Mungu peri cwalugi woko kud i weng’i, m’iwac ko kumae, Kum bedopwe para Yehova roya kara amwony ng’om maeni; ento kum dubo mi thek maeni Yehova riemogi woko kud i weng’i.

⁵Ni kum bedopwe peri ngo, kadi ni kum adundeni m’atira de ngo, ketho imondo kara imwony ng’om migi; ento kum dubo mi thek maeni Yehova Mungu peri riemogi woko kud i weng’i, kara eketh lembe cungi ma Yehova kwong’o m kwaru, ni Ibrahim, ni Isak, man ni Yakobo.

⁶Ka kumeno ng’ei, nia Yehova Mungu peri mio iri ng’om ma ber maeni kara imwonye ni kum bedopwe peri ngo: kum in i dhanu ma ng’uti cikre.

⁷Poi, wii kud uwil, maram inyayu ko kwinyo i Yehova Mungu peri i langa; ugambre i ceng’ m’iwok ie woko kud i ng’om Misiri, cil m’iwok ko kakeni, wujai ni Yehova.

⁸I Horeb bende wunyayu kwinyo i Yehova, man ng’ecwiny unego Yehova i kumwu m’enyoth kowu.

⁹Kinde m’ai dho malu wi got kara agam bankidi, en e ban mi lembariba ma Yehova timo kudu, alund abedo wi got ceng’ pier ang’wen ku diewor pier ang’wen; acamu cam ungo kadi pi de amadhu ngo.

¹⁰E Yehova mio ira ban mi kidi ario m’ugore ku lwet Mungu; man jukiewo i kumgi calku lembe ceke, ma Yehova yero kudu i got kud i die mac i nindo mi cokri.

¹¹Man etimbre ka ceng’ pier ang’wen ku diewor pier ang’wen uthum, nia Yehova mio ira ban ario mi kidi, en e ban mi lembariba.

¹²E Yehova wacu ira kumae, Ai, lor piny ku keni pio; kum dhanu peri m’iwodho woko kud i Misiri ginyothri gigi; gilokri cen pio kud i yo m’ang’olo igi; gitimo ayi m’acwia m’atwaga igi.

¹³Man kendo Yehova yero ira, ewacu kumae, Aneno dhanu maeni, man, nen, en e dhanu ma ng’ute cikre;

¹⁴weka kara anyothgi, man aruc nying’gi woko ku the polo; man abiketho idoko ni thek ma tek ma dit de ma sagu gin.

¹⁵Kum kumeno alokra aloro piny de ku wi got, e got ubewang’ ku mac: man ban ario mi lembariba ni i cinga ario.

¹⁶E aneno man, nen, wudubo ni Yehova Mungu mu; wutimo nyathi dhiang’ m’atwaga iwu: wulokru cen pio kud i yo ma Yehova ng’olo iwu.

¹⁷Man amaku ban ario, e abologi kud i cinga ario, man aturogi i weng’wu.

¹⁸E apodho piny i wang’ Yehova, calu ma kwong’a ceng’ pier ang’wen ku diewor de pier ang’wen; e acamu cam ungo kadi pi de amadhu ngo; kum dubo mu kpo ma wudubo, ku timo maeno m’ubedo rac i wang’ Mungu, kara wimyai ng’ecwiny i ie.

¹⁹Kum lworo nega kum ng’ecwiny ku kwinyo m’awu, m’unego Yehova i kumwu m’enyoth kowu. Ento Yehova winjo dwanda i nindo maeca bende.

²⁰Man ng’ecwiny unego Yehova dit i kum Harun ya enyothe: e akwayu pi Harun bende i nindo maeca.

²¹E agamu dubo mu nyathi dhiang’ ma wutimo, man awang’e ku mac, anyone de, m’arege ko nyung’u nyung’u, maram edoko ko yom calu utur: man aoyo uturne i kulo m’umol kud i got.

²²Man i Tabera, i Masa de, man i Kibroth-hatava, wunyayu kwinyo i Yehova.

²³Man kinde ma Yehova orowu kud i Kadec-barnea, ewacu kumae, Wuidh malu man wumwony ng’om m’amio iwu; wulund wujai kum lembang’ola pa Yehova Mungu mu, e wuyie ngo, kadi dwande de wuwinjo ngo.

²⁴Wujai ni Yehova ugambre i nindo m’amaku ng’eyowu i ie.

²⁵Kum kumeno apodho piny i wang’ Yehova ceng’ pier ang’wen ku diewor pier ang’wen m’apodho ie piny, kum Yehova wacu nia ebinyothowu.

²⁶E arwo ni Yehova, man awacu kumae, E Rwoth Yehova, kud inyoth dhanu peri man aba peri m’iwaru ni kum dwong’ peri, m’iwodho kud i Misiri ku cing’ ma tek.

²⁷Poi kum jutic peri Ibrahim, Isak, man Yakobo; kud inen udhuku mi dhanu maeni, kadi camuco migi, kadi dubo migi,

²⁸ng’om m’iwodhowa kud i ie maru wacu kumae, Kum Yehova copo terogi i ng’om m’eng’olo igi ngo, man kum edagugi, ewodhogi kara eneggi i langa.

²⁹Ento gi dhanu peri man aba peri, m’iwodho ku tegoni ma dit man ku boti m’arieya.