Read Alur Yohana 10 Bible Online

Yohana 10 - Alur bible

Yohana 10

¹Andhandha, ayero iwu kumae, ng’atu ma mondo i dwol mi rombe ku dhugola ngo, ento eidho ku yo ku mange, ng’atuca en e jakwo, man jayek.

²Ento ng’atu ma mondo ku dhugola en e jakwac mi rombe.

³Jakur dhugola yabu ire; rombe de winjo dwande: man elwong’o rombe pare ma dhe ku nying’gi, etelo wigi de woko.

⁴Kan edaru wodho pare ma dhe ceke woko, etelo wigi, e rombe de gilubo ng’eye: kum ging’eyo dwande.

⁵Man gibilubo ng’ei welo ngo, ento gibipiei ire: kum ging’eyo dwand welo ngo.

⁶Yesu yero lembabola maeni igi: ento thelembe m’eyero igi ging’eyo ngo.

⁷Ka kumeno Yesu wacu igi kendo kumae, Andhandha, awacu iwu, An a dhugola mi rombe.

⁸Ju m’ular ubino ira ceke gi jukwo ku juyek: ento rombe winjogi ngo.

⁹An a dhugola; tek ng’atu moko mondo yor i bang’a, ebiboth, man ebimondo ebiwok woko de, ebinwang’u arusi de.

¹⁰Jakwo bino ngo, ndhu kara ekwal kwo, eneg nek, enyothi: an re abino kara gibed ku kwo, gibed kude dit apila.

¹¹An a jakwac ma ber: jakwac ma ber mio kwo pare pi rombe.

¹²Ng’atu ma jatic, ma jakwac ungo, ma won rombe de ngo, kan eneno urudi bebino, eweko rombe, epiei, urudi de makugi, elalugi:

¹³epiei kum en e jatic, man ie pido pi rombe ngo.

¹⁴An a jakwac ma ber; man ang’eyo para ma dhe, para ma dhe de ging’eya,

¹⁵cil calu Wego ng’eya, an de ang’eyo Vwa; man amio kwo para pi rombe.

¹⁶Rombe para mange nuti, ma gi mi dwonduni ngo: gin bende akoakelgi be, man gibiwinjo dwanda; gibidoko udul acel de, ku jakwac acel.

¹⁷Ka kumeno Vwa mar a, kum amio kwo para, kara agame kendo.

¹⁸Ng’atu moko mbe ma kabe kud i bang’a, ento amie gira. Abedo ku tego m’amie ko, man abedo ku tego m’agame ko kendo. Ajolo cik maeni ba Vwa.

¹⁹Ka kumeno pokri nyai kendo kind Juyahudi kum lembe maeni.

²⁰Ju m’i kindgi dupa giwacu kumae, Pajogi ni i ie, abelu make; wuwinje nedi?

²¹Jumange wacu kumae, Maeni lembe pa ng’atu ma pajogi ni i wie ngo. Pajogi copo yabu wang’ abinga?

²²Nwang’u agba mi lilo hekalu nuti Yerusalem:

²³nindo mi koyo nuti; Yesu de bewotho i hekalu i pondot pa Suleman.

²⁴Ka kumeno Juyahudi gibino gitieke, gipenje kumae, Ibiketho cwinywa bedo jiji rokani? Tek in i Kristu, yer iwa kele.

²⁵Yesu loko lembe igi kumae, Ayero iwu, man wuyio ngo: tic m’atimo i nying’ Vwa ginyutho pira.

²⁶Ento wuyio ngo, kum wuni i kind rombe para ngo.

²⁷Rombe para winjo dwanda, man ang’eyogi, gilubo ng’eya de:

²⁸amio igi kwo ma rondo ku rondo; man gibirwinyo ki ngo, ng’atu moko mbe de ma bimayugi kud i cinga.

²⁹Vwa, m’umiogi ira, esagu ceke: ng’atu moko mbe de, ma copo mayugi kud i cing’ Vwa.

³⁰An waku Vwa wan acel.

³¹Juyahudi giting’o kidi kendo nik gicanye ko.

³²Yesu loko lembe igi kumae, Tic ma ber dupa m’uai ba Vwa adaru nyutho iwu; kum tic maeni ma kani ma wucanya ku kidi pire?

³³Juyahudi giloko ire lembe kumae, Wacenyi ngo ku kidi kum tic ma ber, ento kum icido Mungu; kum in, m’i dhanu, ikethri giri ni Mungu.

³⁴Yesu loko lembe igi kumae, Egore i cik mu kumae ngo, Awacu kumae, Wun wu mungu gi?

³⁵Tek elwong’o gi mungugi, ma lem pa Mungu wok i bang’gi (lembagora pa Mungu de copo tur ungo),

³⁶wuwacu pire, ng’atu ma Wego dwoke leng’ eore de i ng’om kumae, Iyero lembacidi; kum awacu kumae, An a Wod Mungu?

³⁷Tek atimo tic pa Vwa ngo, kud wuyia.

³⁸Ento tek atimogi, kadok wuyia ngo, wuyi tic: kara wung’ei wuyi de ya Wego ni i ia, an de ani i Wego.

³⁹Giyenyo kamake kendo: ento ewok kud i cing’gi.

⁴⁰Man ecidho kendo loka Yordan i ka ma Yohana mio ie baputisi ku kwong’a; ebedo de kakeca.

⁴¹Dhanu dupa de gibino i bang’e; giwacu kumae, Andha Yohana timo giranyutha moko ngo: ento gin ceke ma Yohana yero pi ng’atuni en e andha.

⁴²E dhanu dupa giyio ire keca.