Read Alur Yohana 11 Bible Online

Yohana 11 - Alur bible

Yohana 11

¹Nwang’u ng’atu acel kume lith, en e Lazaro ma Bethania, ma pacu ma thugi Mariamu giku Marsa ma nyamin.

²En e Mariamu maeno m’uwiro Rwoth ku mo ma ng’wice ng’ar, man eyweyo tiende ku yukwie, m’umin mire ma Lazaro kume lith.

³Ka kumeno nyimin gioro kwenda i bang’e, giwacu kumae, Rwoth, nen, ng’atu m’imaru kume lith.

⁴Ento ka Yesu winjo kumeni, ewacu kumae, Tho maeni en e mi nek ungo, ento pi dwong’ pa Mungu, kara Wod Mungu nwang’ dwong’ ni kume.

⁵Nwang’u Yesu maru Marsa ku nyamin de man Lazaro.

⁶Ka kumeno kan ewinjo nia kume lith erio nindo maeno ceng’ ario ka m’ebedo i ie.

⁷Yo ng’ei maeni elund ewacu ni julubne kumae, Dong’ wacidhu kendo i Yahudi.

⁸Julubne giwacu ire kumae, Japonji, kawono Juyahudi giyenyo gicenyi ku kidi; e icidho kuca kendo?

⁹Yesu loko lembe kumae, Ceng’ saane apar wi ario ngo? Tek ng’atu moko wotho ku dieceng’, ekier ungo, kum eneno der mi ng’om maeni.

¹⁰Ento tek ng’atu moko wotho ku diewor, ekier, kum der umbe i ie.

¹¹Eyero gin maeni: man yo ng’ei maeni ewacu igi kumae, Jarimbwa Lazaro nindo; ento acidho kara acewe ku wang’ nindo.

¹²Ka kumeno julub giwacu ire kumae, Rwoth, tek enindo, ebiboth.

¹³Nwang’u Yesu yero pi tho pare: ento giwacu nyo eyero pi yom ma juyom ko ku wang’ nindo.

¹⁴Yesu lund uwacu igi kele kumae, Lazaro tho.

¹⁵Anyong’a nega piwu kum ani kuca ngo, kara wuyi; ento dong’ wacidhu i bang’e.

¹⁶Ka kumeno Thoma, ma julwong’e Didumo, uwacu ni julub wadi kumae, Wan bende wacidhu kara wathou wakugi.

¹⁷Ka kumeno ka Yesu wok, enwang’u nia edaru vuto i liel udoko ceng’ ang’wen.

¹⁸Nwang’u Bethania ni kago ku Yerusalem, ma yenyo romo ungolo ang’wen;

¹⁹dhanu mi Juyahudi de dupa gibino ba Marsa giku Mariamu, kara gijukgi pir umeggi.

²⁰Ka kumeno ka Marsa winjo nia Yesu bebino, ecidho erombo kude: ento Mariamu bedo asu i ot.

²¹Marsa lund uwacu ni Yesu kumae, Rwoth tek ande ini keni, kuno di umira tho ngo.

²²Cil kawono de ang’eyo nia gin ceke ma tek ibipenjo ba Mungu, Mungu bimio iri.

²³Yesu wacu ire kumae, Umeru bicer kendo.

²⁴Marsa wacu ire kumae, Ang’eyo nia ebicer kendo i cer mi kajikceng’.

²⁵Yesu wacu ire kumae, An a cer, ku kwo de: ng’atu m’uyio ira kadok etho ento ebibedo kwo;

²⁶man ng’atu ma tek ubedo kwo en ke eyio ira ebitho ki ngo. Iyio maeni?

²⁷Ewacu ire kumae, Eyo, Rwoth: adaru yio nia in i Kristu ma Wod Mungu, ma ng’atu m’ubebino i ng’om.

²⁸E kan edaru yero maeni, ecidho, man elwong’o Mariamu ma nyamin mung’ mung’, ewacu kumae, Japonji ni keni, man ebelwong’i.

²⁹E en, kan ewinjo maeni, eai pio pio, ecidho i bang’e de.

³⁰(Nwang’u Yesu fodutundo pacu ngo, ento fodi eni ka ma girombo ie giku Marsa.)

³¹Juyahudi ma gini kude i ot, ma gibejuke de, ka gineno nia Mariamu ai tho wok woko, gilund gilubo ng’eye, ma giwacu nyo eciywak wi liel.

³²Ka kumeno ka Mariamu bino ka ma Yesu ni ie enene de, epodho piny the tiende, ewacu ire kumae, Rwoth, tek ini keni, kuno di umira kutho ngo.

³³Ka kumeno ka Yesu nene m’ebeywak, ku Juyahudi bende ma gibino kugi gibeywak, ecur kud i ie cwinye de pido,

³⁴man ewacu kumae, Wukethe kani? Giwacu ire kumae, Rwoth, bin inen.

³⁵Yesu ywak.

³⁶Juyahudi gilund giwacu kumae, Wunen maram emare ko!

³⁷Ento jumoko m’i kindgi wacu kumae, Ng’atu m’uyabu wang’ ng’atu ma abinga e, ecopo ketho ng’atuni bende kud utho ngo?

³⁸Ka kumeno Yesu m’ucur kendo kud i ie ebino ba odliel. Nwang’u en e odcana, man jujengo kidi i dhoge.

³⁹Yesu wacu kumae, Wung’iel kidi woko. Marsa, ma nyamin ng’atu m’utho, uwacu ire kumae, Rwoth, kawono ng’wic kume beng’wi; kum etho cenge doko ang’wen.

⁴⁰Yesu wacu ire kumae, Awacu iri ngo, nia, tek iyio, ibineno dwong’ pa Mungu?

⁴¹Ka kumeno ging’ielo kidi cen. E Yesu ting’o wang’e malu ewacu kumae, Vwa, afoii kum iwinja.

⁴²Man ang’eyo nia iwinja thiri thiri: ento kum udul dhanu m’ucungo i vuta ayero, kara giyi nia iora.

⁴³Man kan edaru yero kumeno, ekok ku dwande ma dit kumae, Lazaro, wok woko.

⁴⁴E ng’atu m’utho wok woko, ma cinge ku tiende bedo ariwa ku bongu mi kuny; wang’e de bedo ariwa ku kitambala. Yesu wacu igi kumae, Wugonye, wek ecidhi.

⁴⁵Ka kumeno dhanu mi Juyahudi dupa ma gibino ba Mariamu, ma gineno gin m’etimo de giyio ire.

⁴⁶Ento jumoko m’i kindgi gicidho ba Jufarisayo, man giyero igi pi gin ma Yesu timo.

⁴⁷Ka kumeno julam ma dongo ku Jufarisayo gicoko dilo, giwacu kumae, Watimu ang’o? kum ng’atuno timo giranyutha dupa.

⁴⁸Tek waweke kumeno, dhanu ceke biyio ire: Jurumi de bibino kabu kakawa woko ku thek mwa.

⁴⁹Ento ng’atu acel m’i kindgi, ma en e Kayafa, en e jalam ma dit i rundi maeno, ewacu igi kumae, Wung’eyo gin moko ki ngo,

⁵⁰kadi wukwanu ngo nia maeni en e ber iwa ya ng’atu acel utho pi dhanu, man kara thek dho kud urwiny.

⁵¹Man eyero maeni gire ngo: ento kum en e jalam ma dit i rundi maeno, eewo nia Yesu bitho pi thek;

⁵²man pi thek kende ngo, ento kara ecok nyithindho pa Mungu m’ulal mba bende i acel.

⁵³Kum kumeno ugambre i ceng’ maeno giporo lembe kara ginege.

⁵⁴Ka kumeno Yesu wotho kele kendo ngo kind Juyahudi, ento eai keca ecidho i ng’om ma ceng’ni yamba, i adhura ma julwong’o Efraim; erio de kakeca giku julub.

⁵⁵Nwang’u kadhukuwijo mi Juyahudi ni ceng’ni: e dhanu dupa giai i ng’om giidho malu Yerusalem ma fodi kadhukuwijo kuwok ungo, gicidwokri leng’.

⁵⁶Ka kumeno giyenyo ka Yesu man giwecri i kindgi, ma gicungo i hekalu kumae, Wuwacu ang’o? Ya ebibino i agba ngo?

⁵⁷Nwang’u julam ma dongo ku Jufarisayo ging’olo, nia, tek ng’atu moko ng’eyo kakare, enyuthe, kara gimake.