Read Alur Yohana 12 Bible Online

Yohana 12 - Alur bible

Yohana 12

¹Ka kumeno ka ceng’ mi kadhukuwijo fodi udong’ abusiel Yesu bino Bethania, ka ma Lazaro ni ie, en e ng’atu ma Yesu ting’e ku kind ju m’utho.

²Kum kumeno gitedo ire cam mir uthieno keca: Marsa de poko cam; ento Lazaro en e ng’atu acel ma kind ju ma gibedo dhu cam gikugi.

³Mariamu lund uting’o mo ma liu ma ng’wice ng’ar, ma pire tek, ma romo ng’et mukero acel, ewiro ko tiend Yesu, eyweyo tiende de ku yukwie: e ng’wic mone romo ot ceke.

⁴Ento jalub acel, ma Yuda Iskariote, ma ng’atu ma bicibe, uwacu kumae,

⁵Nedi jukwero loko mo maeni ku denarii dak adeki, jumi de ni jucani?

⁶Eyero maeni ngo, kum can m’unege kum jucan; ento kum en e jakwo, usau de ni i bang’e man ewodho gin ma juroyo i ie.

⁷Ka kumeno Yesu wacu kumae, Wuweke, kum ekane kum ceng’ kuny para.

⁸Kum jucan wubedo kugi thiri thiri; an re wabedo kudu thiri thiri ngo.

⁹Ka kumeno dhanu ma sai m’i kind Juyahudi giwinjo nia Yesu ni keca: e gibino, pi Yesu kende ngo ento kara ginen Lazaro bende, m’eting’e ku kind ju m’utho.

¹⁰Ento julam ma dongo giporo lembe kara gineg Lazaro bende;

¹¹kum dhanu dupa mi Juyahudi giwekogi, giyio ni Yesu de ni kume.

¹²Urwone udul dhanu ma dit ma gibino i agba, ka giwinjo nia Yesu bebino Yerusalem,

¹³gimaku jang thith, gicirombo ko kude man gikok kumae, Hosana: Mugisa ni ng’atu m’ubebino ku nying Rwoth, en e Ubimo mir Israel.

¹⁴Yesu de, kan enwang’u nyathi kana, ebedo i wie; calu egore kumae,

¹⁵Lworo kud unegi, nya Sayuni: nen, Ubimo peri bebino, ebedo wi nyathi kana.

¹⁶Julub ular ung’eyo gin maeni ngo: ento ka Yesu daru doko dwong’, e gilund gipoi nia gin maeni yang’ ugore pire, man nia gitimo gin maeni ire.

¹⁷Ka kumeno udul dhanu ma ginuti gikugi kinde m’elwong’o Lazaro kud i odliel, m’eting’e de ku kind ju m’utho, ginyutho pire.

¹⁸Kum lembe nini udul dhanu bende gicidho nirombo kude, kum giwinjo nia etimo giranyutha maeni.

¹⁹Ka kumeno Jufarisayo giwecri kumae, Wunen gin moko ma wutimo mbe; nen, ng’om ubelubo ng’eye.

²⁰Nwang’u Juyunani moko ni kind ju m’ucirwo malu i agba:

²¹ka kumeno joni gibino ba Filipo, ma en e ng’atu ma Bethsaida mi Galilaya, man gipenje, giwacu kumae, Rwoth, wayenyo wanen Yesu.

²²Filipo bino eyero de ni Andrea: Andrea giku Filipo gibino, giyero de ni Yesu.

²³Yesu loko lembe igi, ewacu kumae, Saa wok, ma jubiyungo ie Wod dhanu.

²⁴Andhandha, ayero iwu, Tek nying’ nganu kupodho i ng’om ungo etho de ngo, ebedo e kende; ento tek etho, ecego nyinge dupa.

²⁵Ng’atu m’umaru kwo pare erwinye; man ng’atu m’udagu kwo pare i ng’ombuni ebigwoke ni kwo ma rondo ku rondo.

²⁶Tek ng’atu moko timo ira, wek elub ng’eya; man ka m’ani ie, jatic para bende bibedo keca: tek ng’atu moko timo ira, Vwa biyunge.

²⁷Kawono cwinya ng’abre; e abiwacu ang’o? Vwa, lara ni saa maeni. Ento kum lembe nini abino ni saa maeni.

²⁸Vwa, yung nyingi. E dwal ulund ubino uai i polo kumae, Adaru yunge, man abiyunge kendo.

²⁹Ka kumeno udul dhanu, m’ucungo ceng’ni, giwinjo de, giwacu nia polo mor: jumange wacu kumae, Malaika weco kude en.

³⁰Yesu dwoko lembe ewacu kumae, Dwal maeni wok pira ngo, endre piwu.

³¹Kawono pokolembe mi ng’ombuni nuti: kawono jubibayu jadit mi ng’ombuni woko.

³²Man an, tek juting’a malu kud i ng’om, abipeyo dhanu ceke i bang’a.

³³Ento maeni eyero m’enyutho ko maram ebitho ko.

³⁴Ka kumeno udul dhanu loko lembe ire kumae, Wawinjo i cik nia Kristu bedo rondo ku rondo: ka in iwacu nenedi kumae, Jubikoting’o Wod dhanu malu be? Wod dhanune en e ng’a?

³⁵Ka kumeno Yesu wacu igi kumae, Fodi der ni i kindwu nindo ma nok. Wuwoth ma fodi der ni i beng’wu, kara mudho kud urubwu: man ng’atu ma wotho i mudho ng’eyo ka m’ecidho i ie ngo.

³⁶Ma fodi der ni i beng’wu, wuyi ni der, kara wudok wot der. Yesu yero gin maeni, man eai ecidh epale igi.

³⁷Ento kadok edaru timo giranyutha dupa kumeni i wang’gi, ere giyio ire ngo:

³⁸kara lembe ma Isaya ma jabila yero utimbre kakare kumae, Rwoth, ng’a m’uyio rwongwa? Bot Rwoth de nyuthre ni ng’a?

³⁹Kum lembe maeni gicopo yio ngo, kum Isaya wacu kendo kumae,

⁴⁰Ecido wang’gi, edwoko adundegi nwang’; Kara ku ginen ku wang’gi, ku ging’ei kud adundegi, Ku gilokri de, an de kud acanggi.

⁴¹Isaya wacu gin maeni kum eneno dwong’ pare; man eyero pire.

⁴²Ento cil kind jubim ma dongo bende dupa giyio ire; ento gituce ngo kum Jufarisayo, gimaru wodhogi kud i kacokri:

⁴³kum gimaru dwong’ mi dhanu ma sagu dwong’ pa Mungu.

⁴⁴Yesu kok akoka ewacu kumae, Ng’atu m’uyio ira, meca eyio ira ngo, ento ni ng’atu m’uora.

⁴⁵Ng’atu m’ubenena, meca ebeneno ng’atu m’uora.

⁴⁶Abino i ng’om ni der, kara ng’atu ma tek uyio ira kud ebed i mudho.

⁴⁷Man tek ng’atu moko winjo lembe para, eworogi de ngo, apoko lembe pare ngo: kum abino nipoko lembe mi ng’om ungo, ento kara alar ng’om.

⁴⁸Ng’atu m’ukwera, man ejolo lem para ngo, gin acel ni i bang’e m’upoko lembe pare: lembe m’ayero, lembene bipoko lembe pare i kajikceng’.

⁴⁹Kum ayero gira ngo; ento Wego m’uora, emio ira lembang’ola, m’ayer, ku m’awec de.

⁵⁰Man ang’eyo nia lembang’ola pare en e kwo ma rondo ku rondo; ka kumeno gin m’ayero, ayero kumeno calu Wego wacu ira.