Read Alur Yohana 13 Bible Online

Yohana 13 - Alur bible

Yohana 13

¹Nwang’u kan agba mi kadhukuwijo fokutundo ngo, Yesu m’ung’eyo nia saa pare tundo m’ebiai ko i ng’ombuni ecidho ba Wego, m’edaru maru pare ma dhe ma gini i ng’om, emarugi cil i kajikne.

²Man i kinde mi cam mir uthieno, ma nwang’u wonabali daru ketho lembe i adunde Yuda Iskariote, ma wod Simon, nicibe,

³e Yesu, m’eng’eyo nia Wego mio gin ceke i cinge nia eai ba Mungu, ebecidho de ba Mungu,

⁴eai malu ku dhu cam mir uthieno, eketho kendi pare cen; man egamu bongu mi logo, etwio i piere.

⁵Elund ekonjo pi i alibi, man emaku lwoko tiend julubne, eyweyogi de ku bongu logo m’etwio i piere.

⁶Elund ebino ba Simon Petro; Ewacu ire kumae, Rwoth, ilwoko tienda?

⁷Yesu dwoko lembe ewacu ire kumae, Gin m’atimo ing’eyo ngo kawono; ento ibing’eyo macen.

⁸Petro wacu ire kumae, Ibilwoko tienda ki ngo. Yesu loko lembe ire kumae, Tek alwoki ngo, nwang’u maka peri mbe i bang’a.

⁹Simon Petro wacu ire kumae, Rwoth, tienda kende ngo, ento cinga ku wia bende.

¹⁰Yesu wacu ire kumae, Ng’atu m’ujom can logo nege ngo ento mi lwoko tiende kende, endre e leng’ ceke; wun de wu leng’, ento ceke re ngo.

¹¹Kum eng’eyo ng’atu ma bicibe; kum kumeno ewacu kumae, Wun ceke wu leng’ ungo.

¹²Kum kumeno kan edaru lwoko tiendgi, egamu kendi pare de, man ebedo piny kendo, ewacu igi kumae, Wung’eyo gin m’atimo iwu?

¹³Wulwong’a Japonji, man Rwoth: e wuyero dre; kum an a kumeno.

¹⁴Kumeno tek an, m’a Rwoth man Japonji, alwoko tiendwu, maku wun bende wulwok tiendwu man pa wadi man pa wadi.

¹⁵Kum amio iwu por, kara wun bende wutim calu atimo i beng’wu.

¹⁶Andhandha, awacu iwu kumae, Jamiru sagu jadit pare ngo; kadok jakwenda de sagu ng’atu m’uore ngo.

¹⁷Tek wung’eyo gin maeni, mugisa iwu tek wutimogi.

¹⁸Ayero piwu ceke ngo; ang’eyo ju m’alwong’o: ento kara lembagora pa Mungu timbre kakare kumae, Ng’atu m’ucamu kwen para eting’o ufunytiende i kuma.

¹⁹Ugambre kawono ayero iwu ma foketimbre ngo, kara, kan etimbre, wubin wuyi nia an a en.

²⁰Andhandha, awacu iwu, ng’atu m’ujolo ng’atu m’aoro nwang’u ejolo an; man ng’atu m’ujolo an nwang’u ejolo ng’atu m’uora.

²¹Ka Yesu daru yero kumeno, e cwinye ng’abre, man etuco, ewacu kumae, Andhandha, ayero iwu, nia ng’atu acel m’i kindwu biciba.

²²Julub ginendri, kum cwinygi ni jiji kum ng’atu m’eyero pire.

²³Nwang’u ng’atu acel ma Yesu maru ma kind julub ubedo dhu mesa, m’ejeng’ ajeng’a kor Yesu.

²⁴Ka kumeno Simon Petro gwele, man ewacu ire kumae, Wac iwa ng’atu m’eyero pire en e ng’a.

²⁵Kan ejeng’ kumeno kor Yesu ewacu ire kumae, Rwoth, en e ng’a?

²⁶Ka kumeno Yesu loko lembe kumae, En e ng’atu, m’abigwio ire kwen, abimio ire de. E kan egwio kwen, eting’e emie ni Yuda, ma wod Simon Iskariote.

²⁷Yo ng’ei gamu kwende, e Jok umondo i ie. Ka kumeno Yesu wacu ire kumae, Gin m’itimo, tim pio.

²⁸Nwang’u ng’atu moko mbe dhu mesa m’ung’eyo nia pirang’o eyero ire kumeni.

²⁹Kum jumoko wacu nyo, kum usau ni ba Yuda, Yesu wacu ire kumae, Ng’ieu gin ma cande ni kumwa mir agba; kadi nia emi gin moko ni jucan.

³⁰E kan edaru gamu kwen, ewok woko ndhu ndhu nica: nwang’u en e diewor.

³¹Ka kumeno kan edaru wok woko, Yesu wacu kumae, Kawono juketho Wod dhanu doko dwong’, Mungu de doko dwong’ i ie;

³²man Mungu bidwoke dwong’ i ie gire, e ebidoko dwong’ de pio.

³³Nyithindho ma thindho, fodi wabedo kudu nindo ma nok. Wubiyenya: man calu awacu ni Juyahudi kumae, Ka m’acidho i ie, wucopo bino ngo; kawono de ayero iwu kumeno.

³⁴Amio iwu cik ma nyen, ya wumeru; cil calu amaruwu, nia wun bende wumeru.

³⁵Kum kumeni dhanu ceke bing’eyo nia wu julubna tek wumeru.

³⁶Simon Petro penje kumae, Rwoth, ici dho kani? Yesu loko lembe kumae, Ka m’acidho i ie, icopo lubo ng’eya ngo kawono; ento ibilubo ng’eya macen.

³⁷Petro wacu ire kumae, Rwoth, nedi acopo lubo ng’ei ngo kawono? Abimio kwo para piri.

³⁸Yesu loko lembe kumae, Ibimio kwo peri pira? Andhandha, awacu iri kumae, Kulok bikok ungo, ma fodi k’ikwera wang’ adek ungo.