Read Alur Yohana 14 Bible Online

Yohana 14 - Alur bible

Yohana 14

¹Adundewu kud upidi: wuyi Mungu, i wuyi an bende.

²I ot pa Vwa udi ma beco dupa nuti; dok ebedo kumeno ngo, kuno di ayero iwu; kum acidho niyiko kabedo iwu.

³Man tek acidho niyiko kabedo iwu, abibino kendo, abijolowu de i bang’a gira; kara ka m’ani ie, wun bende wubed keca.

⁴Man ka m’acidho i ie, wung’eyo yoje.

⁵Thoma wacu ire kumae, Rwoth, wang’eyo ngo ka m’icidho i ie; wang’eyo yoje nenedi?

⁶Yesu wacu ire kumae, An a yo ku lemandha, ku kwo de: Ng’atu acel de mbe ma bino ba Wego, ndhu ni kuma re.

⁷Tek nwang’u wung’eya, kuno di wung’eyo Vwa bende: ugambre kawono wung’eye, wunene de.

⁸Filipo wacu ire kumae, Rwoth, nyuth iwa Wego, e eromowa.

⁹Yesu wacu ire kumae, Nindo ma wabedo wakudu ie hai ngi e, fodi ing’eya ngo, Filipo? ng’atu m’uneno an nwang’u eneno Wego; nedi iwacu kumae, Nyuth iwa Wego?

¹⁰Iyio ngo nia ani i Wego, man Wego de ni i ia? lembe m’ayero iwu ayero gira ngo: ento Wego m’ubedo i ia etimo tic pare.

¹¹Wuyia nia ani i Wego, Wego de ni i ia: kadi wuyia ni kum tic m’atimo.

¹²Andhandha, awacu iwu kumae, Ng’atu m’uyio ira, tic m’atimo ebitimo bende; ebitimo tic ma sagu maeni de; kum acidho ba Wego.

¹³Man gin ma tek wubikwayu ku nyinga e abitimo ginde, kara Wego dok dwong’ i Wod;

¹⁴Tek wubikwaya ku gin moko ku nyinga, abitimo ginde.

¹⁵Tek wumara wubiworo cik para.

¹⁶Man abikwayu Wego, e ebimio iwu Jajuk mange, kara wubed wukugi nja ku nja,

¹⁷en e Tipo mi lemandha: ma ng’om copo jolo ngo; kum enene ngo, kadok ang’eya de eng’eye ngo; wun re wung’eye; kum ebedo i beng’wu, man ebibedo i iwu.

¹⁸Abiwekowu rwa ngo: abino i beng’wu.

¹⁹Fodi nyanok, e ng’om binena kendo ngo; ento wun wunena: kum abedo kwo, wun bende wubibedo kwo.

²⁰I ceng’ maeno wubing’eyo nia ani i Vwa, wun de wuni i ia, an de ani i iwu.

²¹Ng’atu m’ubedo ku cik para, m’uworogi de, en e ng’atu m’umara: ng’atu m’umara de Vwa de bimare, man abimare, abinyuthra de ire.

²²Yuda (Iskariote ngo) uwacu ire kumae, Rwoth, ebedo nenedi nia ibinyuthri iwa, ni ng’om ke ngo e?

²³Yesu loko lembe ewacu ire kumae, Tek ng’atu moko mara, ebiworo lem para: Vwa de bimare, man wabibino i bang’e wabitimo kabedo mwa de i bang’e.

²⁴Ng’atu m’umara ngo eworo lembe para ngo: lembe de ma wuwinjo en e para ngo, ento pa Vwa m’uora.

²⁵Giki maeni ayero iwu, ma fodi wabedo wakudu.

²⁶Ento Jajuk, ma Tipo Maleng’, ma Wego bioro ku nyinga, ebiponjowu ku gin ceke, man ebipoyowu kum lembe ceke m’ayero iwu.

²⁷Aweko kwiocwiny i beng’wu; amio iwu kwiocwiny para: amio iwu calu ma ng’om mio ngo. Adundewu kud upidi, kadok lworo de kud unege.

²⁸Wuwinjo maram ayero ko iwu kumae, Acidho, man adwogo i beng’wu. Tek wumara, kuno di anyong’a negowu, kum acidho ba Wego: kum Vwa saga.

²⁹Kawono de ayero iwu ma foketimbre ngo, kara, kan etimbre, wuyi.

³⁰Wabiweco wakudu hai ngo, kum jadit mi ng’om ubebino: gin moko m’ebedo ko mbe i ia;

³¹ento kara ng’om ung’ei nia amaru Wego, man calu Wego mio ira cik, e an bende atimo kumeno. Wuai, wacidhu.