Read Alur Yohana 15 Bible Online

Yohana 15 - Alur bible

Yohana 15

¹An a tiend ulok mandha, Vwa ke jatipodho.

²Ku ba janga ceke ma ni i ia ma cego nyinge ngo, ekabe woko: man ku ba janga ceke ma cego nyinge, elonye, kara eceg nyinge ma sagu.

³Kawono wu leng’ ni kum lembe m’ayero iwu.

⁴Wubed i ia, an de i iwu. Calu jange copo cego nyinge gire ngo, tek ebedo kum tiende ngo; wun de kumeno wucopo ngo, tek wubedo i ia ngo.

⁵An a tiend ulok, wun wu jange: Ng’atu m’ubedo i ia, an de i ie, ng’atuno cego nyinge dupa: kum wucopo timo gin moko ngo nge kuda.

⁶Tek ng’atu moko bedo i ia ngo, jubaye woko calu jange, ener de; e jucokogi, jubologi de i mac, man giwang’.

⁷Tek wubedo i ia, lem para de bedo i iwu, wupenj gin ma tek wuyenyo, manebitimbre iwu.

⁸I maeni Vwa doko dwong’ ya wucego nyingwu dupa; man wubibedo julubna.

⁹Cil calu Wego mara, e an bende amaruwu: wubed i mema.

¹⁰Tek wuworo cik para, wubibedo i mema; cil calu aworo cik pa Vwa, abedo de i merne.

¹¹Giki maeni ayero iwu, kara anyong’a para bed i iwu, kara anyong’a mu de’pong’.

¹²Maeni cik para, nia wumeru, cu calu amaruwu.

¹³Ng’atu moko mbe m’ubedo ku mer ma sagu maeni, nia ng’atu moko mi kwo pare pi jurimbe.

¹⁴Wun wu jurimba, tek wutimo gin m’ang’olo iwu.

¹⁵Ugambre kawono alwong’owu jumiru ngo; kum jamiru ng’eyo ngo gin ma Rwoth pare timo: ento alwong’owu jurimo; kum gin ceke m’awinjo ba Vwa aketho wung’eyo.

¹⁶Wugoyo wia ngo, ento an e m’agoyo wiwu, akethowu de, kara wucidh wuceg nyingwu, nyingwune de dong’: kara gin ma tek wukwayu ba Wego ku nyinga, emi ginde iwu.

¹⁷Ang’olo gin maeni iwu, kara wumeru.

¹⁸Tek ng’om udaguwu, wung’eyo nia edaga ma fodi k’edaguwu ngo.

¹⁹Dok wun wu mi ng’om, kuno di ng’om umaru ma pare: ento kum wun wu mi ng’om ungo, ento agoyo wiwu kud i ng’om, kum kumeno ng’om udaguwu.

²⁰Wupoi kum lembe m’ayero iwu kumae, Jamiru sagu rwodhe ngo. Tek ginyayu ragedo i kuma, gibinyayu ragedo i kumwu bende; tek giworo lembe para, gibiworo mu bende.

²¹Ento gin maeni ceke gibitimo i kumwu pi nyinga, kum ging’eyo ng’atu m’uora ngo.

²²Tek abino ayero igi de ngo, kuno di dubo migi mbe: ento kawono gimbe ku gin ma gilok wie lembe kum dubo migi.

²³Ng’atu m’udagu an nwang’u edagu Vwa bende.

²⁴Tek atimo tic i kindgi ngo ma ng’atu mange mbe ma fodutimo, kuno di dubo migi mbe: ento kawono gidaru nena gidaga de waku Vwa.

²⁵Ento maeni timbre, kara lembe m’ugore i cik migi kumae, utimbre kakare, Gidaga mananu.

²⁶Ento ka Jajuk ubino, m’abioro i beng’wu m’uai ba Wego, en e Tipo mi lemandha, m’uai ba Wego, ebinyutho lembe pira:

²⁷e wun bende wubinyutho lembe, kum wubedo i bang’a ugambre ku kwong’a.