Read Alur Yohana 17 Bible Online

Yohana 17 - Alur bible

Yohana 17

¹Yesu yero gin maeni; e eng’ayu wang’e malu de i polo, ewacu kumae, Vwa, saa daru wok; yung Wodi, kara Wodi de yungi:

²cil calu imio ire ng’ol wi kum nzu, kara emi kwo ma rondo ku rondo ni ceke m’imio ire.

³E kwo ma rondo ku rondone e eni, nia ging’ei in m’i Mungu mandha i kendi, ku ng’atu m’ioro, ma Yesu Kristu.

⁴Ayungi i ng’om, adaru timo tic m’imio ira atim.

⁵Vwa, kawono keth abed dwong’ karacelo kudi ku dwong’ ma yang’ abedo ko karacelo kudi ma fodi ng’om de mbe.

⁶Anyutho nyingi ni ju m’imio ira kud i ng’om: gi peri, man imiogi ira: man gidara woro lembe peri.

⁷Kawono ging’eyo nia gin ceke ma tek imio ira uai i beng’i:

⁸kum amio igi lembe m’imio ira; man gijologi, man ging’eyo andha nia aai i beng’i, giyio de nia iora.

⁹Akwayu pigi: akwayu pi ng’om ungo, ento pi ju m’imio ira; kum gi peri:

¹⁰man gin ceke ma para gi peri, man ma peri de gi para: abedo dwong’ de ni kumgi.

¹¹Anuti i ng’om kendo ngo, gin re gini i ng’om, man abino i beng’i. Vwa Maleng’, gwok ju m’imio ira i nyingi, kara gibed acel, calu wan.

¹²Kinde ma fodi wani karacelo kugi, agwoko ju m’imio ira i nyingi: akurogi de, ng’atu acel de mbe i kindgi m’urwinyo, ndhu wod nyoth kende; kara lembagora pa Mungu timbre kakare.

¹³Ento kawono abino i beng’i; e gin maeni ayero i ng’om, kara gibed kud anyong’a para m’upong’ i igi.

¹⁴Adaru mio igi lem peri; ng’om de dagugi, kum gi mi ng’om ungo, cu calu an a mi ng’om ungo.

¹⁵Akwayu ngo nia ikabgi kud i ng’om, ento nia igwokgi ni ng’atu ma rac.

¹⁶Gi rai ng’om ungo cil calu an de a mi ng’om ungo.

¹⁷Dwokgi leng’ ku lemandha: lembe peri en e lemandha.

¹⁸Cil calu iora i ng’om, e kumeno an bende aorogi i ng’om.

¹⁹Adwokra leng’ gira pigi, kara gin bende judwokgi leng’ i lemandha.

²⁰Joni kendgi ngo m’abekwayu pigi, endre pi ju m’ubeyio ira bende ni kum lem migi;

²¹kara gin ceke gibed acel; cil calu in, Vwa, ini i ia, an de ani ii, kara gin de gibed i iwa: kara ng’om uyi nia iora.

²²Man dwong’ m’idaru mio ira amio igi; kara gibed acel, cil calu wan wan acel;

²³ani i igi, in de ini i ia, kara giteng’ni i acel; kara ng’om ung’ei nia iora, man imarugi de, cil calu imaru an.

²⁴Vwa, ayenyo nia gin bende m’imio ira wabed kugi karacelo ka m’ani ie, kara ginen dwong’ para, m’imio ira: kum imara ma fodi ng’om ku thekre ngo.

²⁵E Vwa ma pwe, ng’om ung’ei ngo, ento an ang’ei; joni bende ging’eyo nia iora;

²⁶man aketho ging’ei nyingi, man abiketho eng’eire: kara mer m’imara ko bed i igi, an de i igi.