Read Alur Yohana 20 Bible Online

Yohana 20 - Alur bible

Yohana 20

¹Nwang’u i ceng’ ma kwong’ane ma yenga, Mariamu Magdalene eidho pir kugweno ba liel m’aroka i cana, kinde ma fodi piny col col, man eneno kidi ng’iele woko ku dhu liel m’aroka i cana.

²Elund ekwanyu ng’wec, ebino de ba Simon Petro, giku jalub wadi ma Yesu maru, man ewacu igi kumae, Giwodho Rwoth kud i liel m’aroka i cana, wang’eyo de ngo ka ma gikethe i ie.

³Ka kumeno Petro wok woko, giku jalub wadi, man gicidho yo ba liel m’aroka i cana.

⁴Gin ario de giringo karacelo: jalub wadi de sagu Petro ku ng’wec, elar etundo ba liel m’aroka i cana;

⁵man kan egung’ eneno i ie de, eneno bongu ma nwang’ uvuto; endre emondo i ie ngo.

⁶Ka kumeno Simon Petro m’ubelubo ng’eye bende bino, man emondo i liel m’aroka i cana; man eneno bongu ma nwang’ uvuto,

⁷man kitambala, m’ubedo i wie, evuto karacelo ngo ku bongu ma nwang’, ento ebedo adola ka kende,

⁸Jalub wadi m’ular utundo ba liel m’aroka i cana, ulund umondo bende eneno, eyio de.

⁹Kum fodi ging’eyo lembagora pa Mungu ngo, nia ebikoai kendo be ku kind ju m’utho.

¹⁰Kum kumeno julub gidok thugi kendo.

¹¹Ento Mariamu cungo acunga yo woko kum liel m’aroka i cana ku ywak: e kumeno, kan ebeywak, egung’ eneno i liel m’aroka i cana;

¹²man eneno malaika ario ku kendi ma tar gibedo abeda, acel yo ku wie, acel ke yo ku tielo, ka ma kum Yesu kouvuto i ie.

¹³E giwacu ire kumae, Dhaku, iywak nedi? Ewacu igi kumae, Kum gikabu Rwoth para woko, ang’eyo de ngo ka ma gikethe i ie.

¹⁴Kan eyero kumeno elokre yo ng’eye, man eneno Yesu cungo, ere eng’eyo ngo nia en e Yesu.

¹⁵Yesu wacu ire kumae, Dhaku, iywak nedi? iyenyo ng’a? En m’ewacu nyo en e jatipodho, ewacu ire kumae, Rwoth, tek itere kamange, yer ira ka m’ikethe i ie, kan abitere kamange.

¹⁶Yesu wacu ire kumae, Mariamu. Elokre, ewacu ire de ku dhu Juebrania, Raboni; ma juwacu kumae, Japonji.

¹⁷Yesu wacu ire kumae, Kud imul kuma; kum fodi aidho ba Wego ngo; ento ci ba utumira, man iwac igi nia abecidho ba Vwa ba Wegwu de, ba Mungu para man Mungu mu.

¹⁸Mariamu Magdalene ubino uwacu ni julub kumae, Aneno Rwoth; nia eyero ire lembe maeni de en.

¹⁹Nwang’u ceng’ nica en e ceng’ ma kwong’a ma yenga, ka piny udoko uthieno, nwang’u dhugola de bedo acika ka ma julub ni i ie, ni Iworo m’unegogi ni Juyahudi, e Yesu bino ecungo de i diere, ewacu igi kumae, Kwiocwiny ubed i beng’wu.

²⁰E kan edaru yero maeni, enyutho igi cinge ku ng’ete. Ka kumeno anyong’a nego julub ka gineno Rwoth.

²¹Ka kumeno Yesu wacu igi kendo, Kwiocwiny ubed i beng’wu; calu Vwa ora, an de aorowu kumeno.

²²Kan eyero maeni, eyuyo i wigi, man ewacu igi kumae, Wujol Tipo Maleng’:

²³dhanu ma tek wuweko dubo migi woko, e dubo migi wekre igi; dhanu ma tek wucero dubo migi, e giceri igi.

²⁴Ento nwang’u Thoma, ma julwong’o Didumo, ma en e ng’atu acel ma kind apar wi ario, embe i bang’gi kinde ma Yesu bino.

²⁵Ka kumeno julub wadi giwacu ire kumae, Waneno Rwoth. Ento ewacu igi kumae, Tek aneno poyo musumali i cinge ngo, aroyo lweta de ngo i poyo musumali, aroyo cinga de ngo i wang’ ng’ete, abiyio ngo.

²⁶Yo ng’ei ceng’ abora julubne ginuti kendo i ie, man Thoma de gini karacelo kugi. Yesu bino, nwang’u dhugola bedo acuca, man ecungo i diere, ewacu kumae, Kwiocwiny ubed i beng’wu.

²⁷Elund ewacu ni Thoma kumae, Riei lweti kakeni, inen cinga de; riei cingi de, iroi i wang’ ng’eta: man kud ibed ma yic umbe, ento ma yic nuti.

²⁸Thoma loko lembe ewacu ire kumae, Rwodha ku Munguna.

²⁹Yesu wacu ire kumae, Kum idaru nena, iyio: mugisa ni ju ma gineno ngo, ento giyio.

³⁰Ka kumeno Yesu timo giranyutha mange dupa i wang’ julub m’ugore i kitabu maeni ngo:

³¹ento maeni gore kara wuyi nia Yesu en e Kristu, ma Wod Mungu; man kara ka wuyio wubed ku kwo i nyinge.