Read Alur Yohana 21 Bible Online

Yohana 21 - Alur bible

Yohana 21

¹Yo ng’ei gin maeni Yesu nyuthre gire kendo ni julub dhu nam Tiberia; man enyuthre kumae,

²Nwang’u Simon Petro man Thoma ma julwong’o Didumo, ku Nathanael ma Kana mi Galilaya, man wot Zebedayo, ku juario mange ma kind julubne gibedo karacelo.

³Simon Petro wacu igi kumae, Acitwomo rec. Giwacu ire kumae, Wan bende wabino wakudu. Gitugo woth, giidho de i yei; ento diewor nino gikwanyu gin moko ngo.

⁴Ento ka piny umaku ru, Yesu cungo dhu wath: ento julub ging’eyo ngo nia en e Yesu.

⁵Yesu lund uwacu igi kumae, Nyithindho, giracama moko ni kudu? Giloko lembe ire kumae, Umbe.

⁶Man ewacu igi kumae, Bol voi i ng’et yei ma yor acwic, e wubinwang’u. Ka kumeno gibolo, man kawono gicopo ywaye ngo ni udul rec.

⁷Ka kumeno jalub maeno ma Yesu maru wacu ni Petro kumae, En e Rwoth. Kum kumeno ka Simon Petro winjo nia en e Rwoth, etwio kanzu pare i kume (kum nwang’u ekendo bongu ma yo the wagi kende), e epiei i nam.

⁸Ento julub wadi gibino i yei ma nok (kum dhu wath udong’ bor ungo, ento eyenyo romo bol dak ario), gibeywayu voi pong’ ku rec i ie.

⁹E ka gidaru loro dhu wath, gineno cukmac keca, ku rec ma juketho i wie, man kwen.

¹⁰Yesu wacu igi kumae, Wukel kum rec moko ma wutwomo kawono.

¹¹Ka kumeno Simon Petro idho i yei man eywayu voi dhu wath, ku rec ma dongo pong’ i ie, dak acel ku pier abic wi adek: man kadok gi dupa kumeni de voine yec ungo.

¹²Yesu wacu igi kumae, Wubin wucam. E ng’atu acel de mbe i kind julub ma cwinye tek m’epenje ko kumae, In i ng’a? kum ging’eyo nia en e Rwoth.

¹³Yesu bino, eting’o kwen de, man emio igi, ku rec de kumeno.

¹⁴Maeni doko wang’ adege ma Yesu nyuthre ie ni julub, yo ng’ei cer m’ecer ko ku kind ju m’utho.

¹⁵Kum kumeno ka gidaru camu, Yesu wacu ni Simon Petro kumae, Simon, wod Yona, imara ma sagu joni? E eloko ire lembe kumae, Eyo, Rwoth; ing’eyo nia ameri. Ewacu ire kumae, Mi cam ni nyithi rombe para.

¹⁶Ewacu ire kendo wang’ arionde, Simon, wod Yona, imara? Ewacu ire kumae, Eyo, Rwoth; ing’eyo nia ameri. Ewacu ire kumae, Kwai rombe para.

¹⁷Ewacu ire wang’ adege kumae Simon, wod Yona, imara? Can unego Petro kum epenje wang’ adege kumae, Imara? Man ewacu ire kumae, Rwoth, ing’eyo gin ceke; ing’eyo nia ameri. Yesu wacu ire kumae, Mi cam ni rombe para.

¹⁸Andhandha, ayero iri kumae, Ma fodi in i ayada, itwiri giri, iwotho de ka ma ii yenyo: endre kan ibiti, ibirieyo cingi, man ng’atu mange e ma bitwio iri, biteri de ka m’iyenyo ngo.

¹⁹Karaman eyero maeni, m’enyutho ko maram tho m’ebiyungo ko Mungu bibedo ko. Man kan edaru yero lembuni, ewacu ire kumae, Lub ng’eya.

²⁰Petro, m’ulokre, eneno jalub ma Yesu maru belubo ng’eigi; en e ng’atu m’ujeng’ i kore bende dhu cemo mir uthieno, m’uwacu de kumae, Rwoth, ng’a m’ucibi?

²¹E ka Petro nene ewacu ni Yesu kumae, Rwoth, ng’atu maeni ke bitimo ang’o?

²²Yesu wacu ire kumae, Tek ayenyo nia ebed cil m’abino, en e ang’o iri? ilub ng’eya.

²³Lembuni lund uyik kind umego, nia jalub maeno bitho ngo: ento Yesu wacu ire ngo, nia ebitho ngo; ento kumae, Tek ayenyo nia ebed cil m’abino, en e ang’o iri?

²⁴En e jalub maeni m’unyutho lembe pi gin maeni, m’ugoro gin maeni de: man wang’eyo nia nyutholembe pare en e andha.

²⁵Gin mange de dupa nuti ma Yesu timo, ma tek jugoro pigi kubang’gi kubang’gi, kud i bang’a cil ng’om dho ngi ciromo ngo ku buku ma jubigoro.