Read Alur Yohana 6 Bible Online

Yohana 6 - Alur bible

Yohana 6

¹Yo ng’ei gin maeni Yesu eidho loka nam mi Galilaya, ma en e nam mi Tiberia.

²Udul dhanu ma dit de lubo ng’eye, kum gineno giranyutha m’etimo kum ju ma kumgi lith.

³E Yesu idho got malu, man ebedo kuca ku julubne.

⁴Nwang’u kadhukuwijo ma en e agba mi Juyahudi, udhingo.

⁵Ka kumeno Yesu m’uting’o wang’e malu, m’eneno de udul dhanu ma dit ubebino i bang’e, ewacu ni Filipo kumae, Wabing’iewo kwen kani, kara joni gicami?

⁶Ewacu lembe maeni m’emulo ko ie: kum eng’eyo en gin m’ebitimo.

⁷Filipo loko lembe ire kumae, Kwen mi denarii dak ario de ciromo kugi ngo, ma ka kubang’gi nzu ging’wenyo nyanok nyanok.

⁸Acel m’i kind julubne, en e Andrea, m’umin Simon Petro, uwacu ire kumae,

⁹Nyathinyir acel ni keni, ma lungu kwend nganu abic ni kude, ku rec ario: ento maeni ang’o i kind adhudhe ma kumeni?

¹⁰Yesu wacu kumae, Wuketh dhanu bed piny. Nwang’u kakeca lum dit i ie. Kum kumeno jumaco gibedo piny, welgi yenyo romo rubanga abic.

¹¹E Yesu ting’o lungu kwen; e kan efoyo pire, epoko ni ju m’ubedo piny; rec bende kumeno calu ma giyenyo.

¹²E ka giyeng’, ewacu ni julubne kumae, Wucok kodine m’udong’, kara gin moko kud urwiny.

¹³E gicokogi, man gipong’o katoko apar wi ario ku kodi lungu kwend nganu abic m’udong’ ni ju m’ucamu.

¹⁴Nie ka dhanu neno giranyutha m’etimo, giwacu kumae, Maeni jabila andha m’ubebino i ng’om.

¹⁵Ka kumeno Yesu m’ung’eyo ya giyenyo bino make ku tego, ya gikethe ni ubimo, eai kendo ecidho wi got e kende.

¹⁶Ka piny udoko uthieno julubne giloro piny dhu nam;

¹⁷e giidho i combo, man gibecidho Kapernaum loka nam. E i kinde maeni piny uyutho, Yesu de fodi ubino i bang’gi ngo.

¹⁸E wang’ nam de maku tuk kum yamu ma dit m’ukoto.

¹⁹Ka kumeno ka gikiewo ma yenyo romo ungolo abic kadi abiro, gineno Yesu m’ubewotho ku wi nam, ebedhingo combo de: e lworo makugi.

²⁰Ento ewacu igi kumae, En e an; lworo kud unegwu.

²¹Ka kumeno giyenyo gijole i combo: e eni eni combo tundo i ng’om ka ma gibecidho i ie.

²²Urwone udul dhanu m’ucungo loka nam uneno nia yei mange mbe kakeca, ento acel, nia Yesu de mondo ngo ku julubne i combo, ento ya julubne gicidho kendgi

²³(ento yei moko ai i Tiberia ubino ceng’ni ka ma gicamu ie kwen yo ng’ei foyofoc ma Rwoth ufoyo):

²⁴e kan udul dhanu neno nia Yesu mbe kakeca, kadok julubne de, gin gigi gimondo i yei, man gibino Kapernaum, ma gibeyenyo ko ka Yesu.

²⁵Ka ginwang’e de loka nam, giwacu ire kumae, Japonji, ibino kakeni awene?

²⁶Yesu dwoko lembe igi ewacu kumae, Andhandha, awacu iwu, Wuyenya ngo kum wuneno giranyutha, ento kum wucamu lungu kwen wuyeng’.

²⁷Kud wutim pi cam ma nyothre, endre pi cemo m’ubedo mi kwo ma rondo ku rondo ma Wod dhanu bimio iwu: kum Wego, ma Mungu, mwono ayi i kume.

²⁸Ka kumeno giwacu ire kumae, Wabitimo ang’o, kara watim tic pa Mungu?

²⁹Yesu loko lembe ewacu igi kumae, Maeni tic pa Mungu ya wuyi ng’atu m’eoro.

³⁰E giwacu ire kumae, Ka kumeno itimo giranyutha ang’o kara wanen, e wayii bende? itimo ang’o?

³¹Yang’ wegwa gicamu mana i yamba; calu egore kumae, Emio igi kwen m’uai i polo gicam.

³²Ka kumeno Yesu wacu igi kumae, Andhandha, ayero iwu, Kwen m’uai i polo Musa mio iwu en ungo; ento Vwa e m’umio iwu kwen mandha m’uai i polo.

³³Kum kwen pa Mungu en e maeno m’uai i polo loro piny, man; emio kwo de ni ng’om.

³⁴E giwacu ire kumae, Rwoth, bedimi iwa kwen maeni thiri thiri.

³⁵Yesu wacu igi kumae, An a kwen mi kwo: ng’atu m’ubino i bang’a kec binege ngo, ng’atu m’uyia de rieu binege ki ngo.

³⁶Ento awacu iwu, nia wunena, ere fodi wuyio ngo.

³⁷Ceke ma Wego mio ira gibibino i bang’a: ng’atu m’ubino i bang’a de abibaye woko ki ngo.

³⁸Kum aloro kud i polo piny, nitimo yeny ma ia yenyo an ungo, ento yeny ma i ng’atu m’uora yenyo re.

³⁹Man maeni en e yeny ma i ng’atu m’uora yenyo re, ya kum ceke m’emio ira moko kud urwiny ira, endre aketh ecung i kajikceng’.

⁴⁰Kum maeni en e yeny ma i Vwa yenyo nia ceke kubang’gi m’uneno Wod, m’uyie de, ubed ku kwo ma rondo ku rondo; man abiting’e malu i kajikceng’.

⁴¹Ka kumeno Juyahudi ging’ur i kume, kum ewacu kumae, An a kwen m’uai i polo loro piny.

⁴²Man giwacu kumae, Maeni Yesu ngo, ma wod Yusuf, ma wang’eyo won ku mini? kawono ewacu nenedi kumae, Aai i polo aloro pinyi?

⁴³Yesu loko lembe ewacu igi kumae, Kud wung’ur i kindwu giwu.

⁴⁴Ng’atu moko mbe ma copo bino i bang’a, tek Wego m’uora kupeye ngo: man abiketho ecungo i kajikceng’.

⁴⁵Egore i lem jubila kumae, Gin ceke gibinwang’u ponji ba Mungu. Dhanu ceke kubang’gi m’uwinjo ba Wego, m’ugamu ng’eyo de gibino i bang’a.

⁴⁶En e nia ng’atu moko neno Wego ngo, ndhu ng’atu m’uai ba Mungu, e m’uneno Wego.

⁴⁷Andhandha, ayero iwu kumae, Ng’atu m’uyio ebedo ku kwo ma rondo ku rondo.

⁴⁸An a kwen mi kwo.

⁴⁹Yang’ wegwu camu mana i yamba, man githo.

⁵⁰Maeni kwen m’uai i polo loro piny, kara ng’atu m’ucamu kume moko kud etho.

⁵¹An a kwen mi kwo m’uai i polo loro piny: tek ng’atu moko camu kwen maeni, ebibedo rondo ku rondo: eyo kwen de m’abimio en e ring’ kuma, pi kwo mi ng’om.

⁵²Ka kumeno Juyahudi gipiembri i kindgi, giwacu kumae, Ng’atu maeni copo mio ring’ kume iwa ya wacam nenedi?

⁵³Ka kumeno Yesu wacu igi kumae, Andhandha, awacu iwu, Tek wucamu ring’ kum Wod dhanu ngo, wumadhu rimbe de ngo, wumbe ku kwo i iwu giwu.

⁵⁴Ng’atu m’ucamu ring’ kuma m’umadhu rimba de ebedo ku kwo ma rondo ku rondo; man abiketho ecungo i kajikceng’.

⁵⁵Kum ring’ kuma en e cemo mandha, rimba de en e giramadha mandha.

⁵⁶Ng’atu m’ucamu ring’ kuma m’umadhu rimba de ebedo i ia, an de abedo i ie.

⁵⁷Calu Wego ma kwo ora, man abedo de ni kum Wego; kumeno ng’atu m’ucama en bende ebibedo ni kuma.

⁵⁸Maeni kwen m’uai i polo loro piny: calu ma yang’ wego camu ngo, man githo; ng’atu m’ucamu kwen maeni re bibedo rondo ku rondo.

⁵⁹Eyero lem maeni i kacokri, kinde m’eponjo i Kapernaum.

⁶⁰Ka kumeno kind julubne dupa, ka giwinjo maeni, giwacu kumae, Maeni lembe ma tek ng’a ma copo winje?

⁶¹Ento Yesu m’ung’eyo i ie gire ya julubne ging’ur kum maeni, ewacu igi kumae, Maeni ketho wukieri?

⁶²Ka kumeno ang’o tek wubineno Wod dhanu beidho ka m’elar ebedo i ie?

⁶³En e tipo ma mio kwo; kum kulokane mbe: lembe m’adaru yero iwu gi tipo, gi kwo de.

⁶⁴Ento jumoko nuti i kindwu m’uyio ngo. Kum Yesu ng’eyo ku kwong’a ju m’uyio ngo, man ng’atu ma bicibe.

⁶⁵Man ewacu kumae, Kum lembe nini awacu iwu nia ng’atu moko mbe ma copo bino i bang’a, tek emire ire ku ba Wego ngo.

⁶⁶Kum maeni kind julubne dupa gidok cen, man giwotho kugi kendo ngo.

⁶⁷Ka kumeno Yesu wacu ni ju apar wi ario kumae, Wun bende wuyenyo wucidhi?

⁶⁸Simon Petro loko lembe ire kumae, Rwoth, wabicidho ba ng’a? In i won lembe mi kwo ma rondo ku rondo.

⁶⁹E wadaru yio wang’eyo de nia in i Ng’atu Maleng’ pa Mungu.

⁷⁰Yesu loko lembe igi kumae, Agoyo wiwu an ungo wun apar wi ario, man kindwu acel en e wonabali?

⁷¹Karaman eyero pi Yuda ma wod Simon Iskariote, kum en e ng’atu ma bicibe, en e acel m’i kind juapar wi ario.