Read Alur Yohana 7 Bible Online

Yohana 7 - Alur bible

Yohana 7

¹Yo ng’ei gin maeni Yesu wotho i Galilaya kum eyenyo ngo ewoth i Yahudi, kum Juyahudi giyenyo nege.

²Nwang’u agba mi Juyahudi, ma en e agba mi otbak, udhingo ceng’ni.

³E utumin uwacu ire kumae, Ai kakeni, icidh i Yahudi, kara julubni bende ginen tic peri m’itimo.

⁴Kum ng’atu moko mbe ma timo gin moko ling’, ma en ebeyenyo jung’eye ngbeng’. Tek itimo gin maeni, nyuthri giri ni ng’om.

⁵Kum cil utumin de giyie ngo.

⁶Ka kumeno Yesu wacu igi kumae, Nindo para foduwok ungo; ento nindo mu nuti thiri thiri.

⁷Ng’om copo daguwu ngo; ento an edagu, kum atuco pire, nia tic pare rac.

⁸Wuidh malu i agba: aidho malu i agba maeni ngo, kum nindo para foduromo ngo.

⁹E kan edaru yero lembe maeni igi ebedo asu i Galilaya.

¹⁰Ento ka utumin uidho malu i agba, elund eidho malu bende, kele re ngo, ento calu lwe.

¹¹Ka kumeno Juyahudi giyenye i agba, e giwacu kumae, Eni kani?

¹²Man ng’ur dit ni i kind udul dhanu pire: jumoko wacu kumae, En e ng’atu ma ber: jumange ke wacu kumae, Kumeno ngo, ento erwinyo udul dhanu arwinya.

¹³Ento ng’atu moko mbe m’uyero pire kele ni lworo mi Juyahudi.

¹⁴Ento kan agba tundo i diere Yesu idho malu i hekalu, man eponjo.

¹⁵Ka kumeno Juyahudi igi wang’ lii, giwacu kumae, Ng’atuni ng’eyo nyiguta nenedi ma fokeponjo ngo e?

¹⁶Ka kumeno Yesu dwoko igi lembe ewacu kumae, Ponji para en e para ngo, endre pa ng’atu m’uora.

¹⁷Tek ng’atu moko yenyo etim yeny ma ie yenyo, ebing’eyo pi ponjine, tek en e pa Mungu, kadi ayero gira.

¹⁸Ng’atu m’uyero lembe m’uai i bang’e gire eyenyo dwong’ ire gire: ento ng’atu m’uyenyo dwong’ pa ng’atu m’uore, ng’atuno en e andha, gondri de moko mbe i ie.

¹⁹Musa mio iwu cik ungo, ere ng’atu moko mbe i kindwu m’utimo cikne? Nedi wuyenyo wunega?

²⁰Udul dhanu loko lembe kumae, Pajogi ni ii: ng’a m’uyenyo enegi?

²¹Yesu loko lembe ewacu igi kumae, Atimo tic acel, e wun ceke iwu wang’ lii pire.

²²Musa yang’ umio iwu yaa (ma nia en e pa Musa re ngo, endre mi wego); man wutimo yaa i kum dhanu ceng’ sabatu.

²³Tek dhanu jolo yaa i ceng’ sabatu, kara ku jukadh ku wi cik pa Musa; kwinyo negowu i kuma, kum atito kum ng’atu moko i ceng’ sabatu?

²⁴Kud wupok lembe calu m’anena, endre wupok lembapoka ma pwe.

²⁵Ka kumeno jukucel m’uai Yerusalem giwacu kumae, maeni en e ng’atu ma gibeyenyo gineg ungo?

²⁶Nen, ebeyero kele, giyero ire lem moko ngo. Nyo jubim ging’eyo andha nia maeni en e Kristu?

²⁷Ento wang’eyo ng’atu maeni ka m’eai i ie: ento ka Kristu bino, ng’atu moko mbe ma bing’eyo ka m’eai i ie.

²⁸E ka Yesu kok akoka i hekalu, m’ebeponjo ewacu de kumae, Wung’eya, wung’eyo de ka m’aai i ie; abino de gira ngo, ento ng’atu m’uora en e andha, ma wung’eyo ngo.

²⁹Ang’eye, kum aai i bang’e, man eora.

³⁰Ka kumeno giyenyo kamake: man ng’atu moko mbe m’uketho cinge i kume, kum saa pare fokuwok ungo.

³¹Ento kind udul dhanu dupa giyie; man giwacu kumae, Ka Kristu bibino, ebitimo giranyutha ma sagu maeni ma ng’atuni timo?

³²Jufarisayo giwinjo udul dhanu beng’uro gin maeni pire: e julam ma dongo ku Jufarisayo gioro asikari nimake.

³³Ka kumeno Yesu wacu kumae, Nindo ma nok wanuti wakudu, man acidho ba ng’atu m’uora.

³⁴Wubiyenya, ere wubinwang’a ngo: e ka ma ani i ie, wucopo bino ngo.

³⁵Ka kumeno Juyahudi giweco i kindgi gigi kumae, Ng’atuni bicidho kani ma wakubinwang’e ngo e? ebicidho ba ju m’ulal i kind Juyunani, man ebiponjo Juyunani?

³⁶Lembe maeni m’eyero kumae lembang’o, Wubiyenya, ere wubinwang’a ngo; ka m’abedo i ie de wucopo bino ngo?

³⁷Nie i kajikceng’, ma en e ceng’ ma dwong’ mir agba Yesu cungo ekok akoka, ewacu kumae, Tek rieu nego ng’atu moko, dong’ ebin i bang’a emadhi.

³⁸Ng’atu m’uyia, kulo mi pi mi kwo bithwogre kud i ie, calu lembagora pa Mungu wacu.

³⁹Ento maeni eyero pi Tipo ma ju m’uyie bijolo: kum Tipo Maleng’ fodumire ngo; kum fodi jukuyungo Yesu ngo.

⁴⁰Ka kumeno jumoko ma kind udul dhanu ka giwinjo lembuni giwacu kumae, Maeni en e jabila andha.

⁴¹Jumange giwacu kumae, Maeni Kristu. Ento jumoko wacu kumae, Ang’o, Kristu ai i Galilaya?

⁴²Lembagora pa Mungu wacu ngo nia Kristu ai ba kodhi Daudi, man i Beth-lehem, pacu ma yang’ Daudi bedo i ie?

⁴³Kum kumeno pokri wok i kind udul dhanu pire.

⁴⁴Jumoko m’i kindgi giyenyo gimake; ento ng’atu moko mbe m’uketho cinge i kume.

⁴⁵Ka kumeno asikari gibino ba julam ma dongo ku Jufarisayo; e giwacu igi kumae, Wukele ngo nedi?

⁴⁶Asikari giloko lembe kumae, Ng’atu ma foduweco kumeca mbe.

⁴⁷Ka kumeno Jufarisayo loko igi lembe kumae, Wun bende wurwinyo?

⁴⁸Kind jubim moko nuti m’uyie, kadi kind Jufarisayo de?

⁴⁹Ento udul dhanu maeni m’ung’eyo cik ungo gibedo akwong’a.

⁵⁰Nikodemo (ma ng’atu acel m’i kindgi, m’ular ubino i bang’e), uwacu igi kumae,

⁵¹Cik mwa poko lembe pa ng’atu moko, ma k’elar ewinje ngo, eng’eyo gin m’etimo de ngo?

⁵²Giloko lembe giwacu ire kumae, In bende in i ng’atu m’i Galilaya? Koiyeny, inen de jabila moko mbe m’uai i Galilaya.

⁵³(Man ku ba dhanu ceke ng’atuman udok i ot pare man i ot pare: