Read Alur Yohana 9 Bible Online

Yohana 9 - Alur bible

Yohana 9

¹Kan ebekadhu, eneno ng’atu ma wang’e cor ugambre i kanyol pare.

²Man julubne gipenje, giwacu kumae, Japonji, ng’a m’udubo, ng’atuni, kadi junyodo pare, ketho junyole ma wang’e cori?

³Yesu dwoko lembe kumae, Ng’atuni dubo ngo kadok junyodo pare de: ento kara tic pa Mungu nyuthre i kume.

⁴Wakowatimu tic pa ng’atu m’uora be, ma fodi ceng’ nuti: diewor ubebino, ma ng’atu moko mbe ma copo timo ie tic.

⁵Ma fodi ani i ng’om, an a der mi ng’om.

⁶Kan eyero kumeno, eng’ulo lau i ng’om, man etimo ulobo ku laune, man ewiro ulobo i wang’ ng’atu ma wang’e cor,

⁷ewacu ire kumae, Cidhi, ilog i kut mi Siloam (thelembene ka juloke, Or). Ka kumeno ecidho, elogo de, man ebino m’eneno.

⁸Ka kumeno juwadi, ku ju ma yang’ ginene, nia en e jakwaipiny, giwacu kumae, Maeni en e ng’atu ma bedo bekwayu piny e ngo?

⁹Jumange wacu kumae, En e en: jumange ke wacu kumae, Ungo, endre e calu en. Ewacu kumae, An a en.

¹⁰Ka kumeno giwacu ire kumae, E ka weng’i yabre nenedi?

¹¹Eloko lembe kumae, Ng’atu ma julwong’o Yesu etimo ulobo ewiro i wang’a de, man ewacu ira kumae, Ci Siloam, ilogi: ka kumeno acidho alogo, e wang’a lero.

¹²Giwacu ire kumae, Ng’atuno nikani? Ewacu kumae, Ang’eyo ngo.

¹³Gitero ng’atu ma naka wang’e corne ba Jufarisayo.

¹⁴Nwang’u ceng’ ma Yesu timo ie ulobone man eyabu wang’e de en e ceng’ sabatu.

¹⁵Ka kumeno Jufarisayo bende gipenje kendo maram wang’e lero ko. Man ewacu igi kumae, Eketho ulobo i wang’a, man alogo, e aneno piny eni.

¹⁶Ka kumeno jumoko ma kind Jufarisayo giwacu kumae, Ng’atuni ai ba Mungu ngo, kum ekwiro ceng’ sabatu ngo. Ento jumoko wacu kumae, Ng’atu ma jadubo copo timo giranyutha ma kumeni nenedi? E pokri ni i kindgi.

¹⁷Ka kumeno giwacu kendo ni ng’atu ma wang’e cor, Iwacu ang’o pire, ni weng’i m’eyabu? E ewacu kumae. En e jabila.

¹⁸Ka kumeno Juyahudi giyio pire ngo nia naka wang’e cor, ka wang’e lero kendo, ma fodi gikulwong’o junyodo pare ngo en e ng’atu ma wang’e lerone,

¹⁹man gipenjogi giwacu kumae, Maeni wodwu, ma wuwacu nia junyole ma wang’e cori? e ka kawono ke eneno piny nenedi?

²⁰Junyodo pare giloko lembe giwacu kumae, Wang’eyo nia maeni en e wodwa, nia junyole de ma wang’e cor:

²¹ento maram eneno ko piny kawono, wang’eyo ngo; kadi nia ng’a m’uyabu wang’e de wang’eyo ngo: wupenje; wang’e teng’ni, ebiyero gire.

²²Junyodo pare giyero lem maeni, kum gilworo Juyahudi: kum Juyahudi gidaru ripo lembe, nia tek ng’atu moko bituco ya en e Kristu, e jubikabe woko kud i kacokri.

²³Ka kumeno junyodo pare wacu kumae, Wang’e teng’ni; wupenje.

²⁴Ka kumeno gilwong’o ng’atu ma yang’ wang’e cor wang’ arionde, giwacu ire kumae, Mi yung ni Mungu: wang’eyo nia ng’atuni en e jadubo.

²⁵Ka kumeno eloko lembe kumae, Kadok en e jadubo, ang’eyo ngo: ang’eyo gin acel, nia, naka wang’a cor, kawono re aneno piny.

²⁶Gilund gipenje kumae, Etimi nenedi? eyabu weng’i nenedi?

²⁷Eloko lembe igi kumae, Ayero iwu kawono, e wuwinjo ngo; wuyenyo wuwinj lembene kendo nedi? wun bende wuyenyo wudok julubne?

²⁸Man gi caye, giwacu kumae, In i jalubne; ento wan wa julub Musa.

²⁹Wang’eyo nia yang’ Mungu weco ku Musa: ento pi ng’atuno, wang’eyo ngo ka m’eai i ie.

³⁰Ng’atuni dwoko lembe wacu igi kumae, Ei, maeni en e gin ma wang’u ijo, nia wung’eyo ngo ka m’eai i ie, enke eyabu wang’a.

³¹Wang’eyo nia Mungu winjo weg dubo ngo: ento tek ng’atu moko jarwo ni Mungu, etimo yeny ma ie yenyo de, e ewinje.

³²Ugambre ma ng’om uthekre fodi juwinjo ngo nia ng’atu moko yabu wang’ ng’atu ma junyole ma wang’e cor.

³³Tek ng’atuno ai ba Mungu ngo, ecopo timo gin moko ngo.

³⁴Giloko lembe giwacu ire kumae, Junyoli ndhu i dubo, man iponjo wani? E girieme woko.

³⁵Yesu winjo nia girieme woko; kan enwang’e de, ewacu ire kumae, Iyio ni Wod Mungu?

³⁶Eloko lembe ewacu kumae, En e ng’a, Rwoth, kara ayi ire?

³⁷Yesu wacu ire kumae, Inene, man en e en ma wubeweco wukude nini.

³⁸Ewacu kumae, Rwoth, ayio. E erwo ire.

³⁹Yesu wacu kumae, Kum lembapoka abino i ng’ombuni, kara ju ma neno piny ungo ginen; man kara ju ma neno piny ke gidok ni abinga.

⁴⁰Jumoko mi Jufarisayo ma gibedo kugi giwinjo lembe maeni, man gipenje kumae, Wan bende wan abinga?

⁴¹Yesu wacu igi kumae, Tek wun abinga, kuno di dubo mbe kudu: ento kawono wuwacu kumae, Waneno piny: kum kumeno dubo mu dong’.