Read Alur Tic Mi Jukwenda 1 Bible Online

Tic Mi Jukwenda 1 - Alur bible

Tic Mi Jukwenda 1

¹Lembagora ma kwong’a m’atimo, E Theofilo, pi gin ceke ma Yesu maku timo ku ponjo de,

²cil i ceng’ ma jujole ie malu, yo ng’ei lembang’ola m’eng’olo ni kum Tipo Maleng’ ni jukwenda ma yang’ egoyo nying’gi:

³man ku ng’ei masendi pare enyuthre gire igi ma kwo ku gin dupa ma piembre ngo, m’ewok ko i wang’gi nindo pier ang’wen, m’eyero ko pi gin mi ker pa Mungu de:

⁴man, ka gicokri karacelo gikugi, eng’olo igi ya ku giwok kud i Yerusalem, ento dong’ gikur lembang’ola ma Wego ng’olo, ma, ewacu, yang’ wuwinjo i bang’a:

⁵kum Yohana mio baputisi ku pi andha ento wun re wubimaku baputisi ku Tipo Maleng’ ma fodi nindo dupa kukadhu ngo.

⁶Ka kumeno, ka gicokri karacelo, gipenje, giwacu kumae, Rwoth, idwoko ker ni Israel nindo maeni?

⁷E ewacu igi kumae, Meni iwu ngo ma nia wung’ei nindone kadi orone, ma Wego ketho gire ka tegone.

⁸Ento wun wubinwang’u tego, nwang’u Tipo Maleng’ uwok i wiwu: man wubibedo jumulembe para i Yerusalem, man i Yahudi ngung’ ku Samaria de, man cil i tung’ ng’om bende.

⁹E kan edaru yero lembe maeni, kinde ma gibenene, e juting’e malu; afuru de jole kud i wang’gi.

¹⁰E kinde ma gibeneno i polo tel nwang’u ebecidho, nen, dhanu ario gicungo i vutgi ku kendi ma tar;

¹¹ma giwacu bende kumae, Wu dhanu mi Galilaya, wucungo wubeneno i polo nedi? Yesu maeni, ma jujole kud i kindwu malu i polo no, ebibino kumeca calu ma wunene ram ecidho ko i polo.

¹²Gilund gidok Yerusalem ma giai ko wi got Zeituni, m’e kago ku Yerusalem, woth ma juwotho ko mi ceng’ sabatu.

¹³E ka gidaru mondo i ie, giidho i ot ma malu, ka ma gibedo i ie; Petro giku Yohana man Yakobo kud Andrea, Filipo giku Thoma, Bartolomayo giku Matayo, Yakobo wod Alfayo, man Simon Zelote, man Yuda wod Yakobo.

¹⁴Joni ceke gibedo ru kum rwo ku cwinygi m’uripo acel, karacelo ku mon, man Mariamu ma min Yesu, ku utumin mire de.

¹⁵Ceng’ nica Petro cungo malu i kind umego, (nwang’u udul dhanu gicoko dhoggi karacelo, giyenyo romo dak acel ku pier ario,) ewacu kumae,

¹⁶Umego, meni lembagora pa Mungu ma yang’ Tipo Maleng’ uyero ku dhu Daudi pi Yuda, m’e jatel wi ju m’umaku Yesu, uol utimbre be kakare.

¹⁷Kum jukwane wakugi, man enwang’u maka pare i tic maeni.

¹⁸(Nie ng’atuni ng’iewo podho ku sukulia mi camuco pare, e egam epodho agura wie, e dieie kak, cindie ceke de oie woko.

¹⁹Lembene meny ma dhanu ceke m’i Yerusalem ging’eyo; ketho julwong’o podho maeni ku dhu thugi kumae, Akeldama, thelembene kumae, Podho mi rimo.)

²⁰Kum egore kumae i kitabu mi Zaburi, Wek kabedo pare dong’ ndhu kende, Ng’atu moko kud ubed i ie: man, Tic pare dong’ ng’atu mange maki.

²¹Ka kumeno kud i kind dhanu ma wabedo ru wakugi por ma Rwoth Yesu bedumondo man ebedewok ko woko kud i kindwa,

²²ugambre kum baputisi ma Yohana mio, rama ceng’ uwok ko ma juting’e ie malu kud i kindwa, i kind joni maku ng’atu acel wadok jumulembe wakugi be pi cer pare.

²³E giketho juario, Yusuf ma julwong’o Barsaba, ma won mire nyinge Yusto, man Matia.

²⁴E girwo, giwacu kumae, In, i Rwoth, m’ung’eyo adunde dhanu yu, nyuth ng’atu m’ifoyo ku kind juario maeni,

²⁵kara elag kaka i tic maeni ku mi kwenda bende ma Yuda podho i ie, kara eci gire kakare ma dhe.

²⁶E gituro wel i wigi; man wel upodho wi Matia; e jukwane ku jukwenda apar wi acel.