Read Alur Tic Mi Jukwenda 14 Bible Online

Tic Mi Jukwenda 14 - Alur bible

Tic Mi Jukwenda 14

¹A Etimbre de i Ikonio nia gimondo karacelo i kacokri mi Juyahudi, man giyero, m’uketho udul dhanu ma dit mi Juyahudi ku mi Juyunani de giyio.

²Ento Juyahudi ma giwor ungo gipiko lembe i pidoic mi Thekdhanumange, man giketho cwinygi doko kwar kum umego.

³Ka kumeno gibedo kuca hai ma gibeyero ku tegocwiny i Rwoth m’enyutho lembe mi berone, m’eketho giranyutha ku musana de utimbre ku cing’gi.

⁴Ento udul dhanu mir adhura kindgi pokre; jukucel udong’ ku Juyahudi, jukucel ke ku jukwenda.

⁵E ka juoli i wigi gi ju ma Thekdhanumange ku Juyahudi ku jubim migi de, kara gitimgi rac dit gicanygi de ku kidi,

⁶lembene tuc i ithgi, man giringo bang’ adhura mi Lukaonia, ku Lustra, ku Derbe de, cil i ng’om m’utwodogi bende:

⁷e giyero lembanyong’a ma juboth ko kuca.

⁸Nwang’u ng’atu moko bedo i Lustra, ma won abala i tiende, abalane gambre kud i min, ma fokewotho ki ngo.

⁹Ng’atuno winjo ka Paolo beyero: ma, kan etono wang’e i bang’e, eng’eyo de nia yioyic pare nuti ma tito kume,

¹⁰ewacu ku dwande ma dit kumae, Cung atira wi tiendi. Man epor malu emaku wotho.

¹¹E kan udul dhanu gineno gin ma Paolo timo, giting’o dwandgi malu, giwacu ku dhu Lukaonia kumae, Mungu giloro piny i bang’wa ni ayi dhanu.

¹²E gilwong’o Barnaba ya Zeu; Paolo ke Herme, kum en e jadit mi lembayera.

¹³E jalam mi Zeu ma hekalu pare ni i nyim adhura, ekelo koni dhiang’ ku thiuboko ma ber de dhugang’, man eyenyo etim lam karacelo kud udul dhanu.

¹⁴Ento ka jukwenda, Barnaba giku Paolo, giwinjo maeni, giyeco kendi migi, e gipiei i kind udul dhanu, gikok akoka,

¹⁵giwacu kumae, Paco, wutimo gin maeni nedi? Wan wa dhanu ma ku kum calu wun, man wakelo iwu lembe ma ber, kara wulokra ku kum gin maeni ma kite mbe ni Mungu ma kwo m’ucwio polo ku ng’om ku nam de, ku gin ceke ma ni i igi de:

¹⁶ma i dhanum’utuk m’ubedukadhu eyio y a thek ceke giwoth i yo migi gigi.

¹⁷Ento ewekre gire ngo ku mulembe, kum etimo ber man emio iwu koth m’uai i polo ku oro ma cam cek ie ber de, eyeng’o adundewu ku cemo ku mutoro bende.

¹⁸E gidwoko wi udul dhanu si si ku wec maeni ya ku gitim lam igi.

¹⁹Ento Juyahudi giai i Antiokia kud Ikonio gibino keca; e ka giloko pidoi udul dhanu, gicanyu Paolo ku kidi, man giywaye woko kud i adhura, ma giwacu nyo etho.

²⁰Ento ka julub gitieke gbur, eai malu, emondo de i adhura: urwone gicidho Derbe giku Barnaba.

²¹E ka giyero lembanyong’a ma juboth ko i adhura nino, man giloko wang’ dhanu dupa doko julub, gidok Lustra, kud Ikonio, man Antiokia de,

²²ma gicikuteng’o ko ng’eyong’ec mi julub, gicikujukogi de ya gibed asu i yioyic man nia wakowamondo be ku masendi dupa i ker pa Mungu.

²³E ka giketho judongo igi ku ba kanisa ndri, girwo de ma giweko ko cam, githierogi ni Rwoth, ma giyie.

²⁴E gikadhu ku i Pisidia, man giwok Pamfulia.

²⁵E ka giyero lembene i Perga, giloro piny Atalia;

²⁶giai kuca gicidho Antiokia ku yo mi pi, ka ma juthierogi i ie ni bero pa Mungu pi tic ma gidaru timo.

²⁷E ka giwok, man gicoko kanisa karacelo, gigonyo pi gin ceke ma Mungu timo kugi, man nia eyabu dhu yioyic ni Thekdhanumange bende.

²⁸E girio nindo ma nok ungo ku julub.