Read Alur Tic Mi Jukwenda 15 Bible Online

Tic Mi Jukwenda 15 - Alur bible

Tic Mi Jukwenda 15

¹E dhanu moko giai i Yahudi giloro piny man giponjo umego, giwacu kumae, Tek wutimo yaa ngo calu kura pa Musa, wucopo both ungo.

²E ka Paolo giku Barnaba gibedo ku piem ku penji dit i kindgi ku joca, e umego ging’olo ya Paolo giku Barnaba, ku juwagi mange, giidh Yerusalem ba jukwenda ku judongo kum penji maeni.

³Ka kumeno, gi ju ma kanisa belwokogi i yo migi nica, gikadhu kud i Foiniki ku Samaria de, ma giyero pi lokocwiny mi Thekdhanumange: e ginyayu mutoro ma dit i umego ceke.

⁴E ka giwok Yerusalem kanisa ku jukwenda man judongo de gijolo gi, e gigonyo pi gin ceke ma Mungu timo kugi.

⁵Ento jumoko mi pokri mi Jufarisayo m’uyio gicungo, giwacu kumae, Maku jutim yaa i kumgi, jucik igi de ya giwor cik pa Musa.

⁶E jukwenda ku judongo gicokri karacelo niporo lembe maeni.

⁷E yo ng’ei penji ma dupa de, Petro cungo, man ewacu igi kumae, Umego, wung’eyo nia rundica Mungu goyo wia kud i kindwu, kara Thekdhanumange winj lembanyong’a ma juboth ko ma i dhoga, giyi de.

⁸Man Mungu, ma ng’eyo adunde, enyutho lembe igi, m’emio igi Tipo Maleng’, cil calu emio iwa;

⁹man ekoyowa tung’ wakugi ngo, elonyo adundegi de ni kum yioyic.

¹⁰Nie ka kumeno wumulo i Mungu nedi, ma wuketho ko mberembere i ng’ut julub ma kwaruwa ku wan de yeyo loyowa e?

¹¹Ento wayio ya wabiboth ni kum bero pa Rwoth Yesu, calu gin.

¹²E udul dhanu ceke giling’ ti; gidong’ giwinjo Barnaba giku Paolo ma gibegonyo pi giranyulha ku musana de ma Mungu timo kugi i kind Thekdhanumange.

¹³Yo ng’ei bedo ling’ migi, Yakobo loko lembe, ewacu kumae, Umego, wuwinj dwanda:

¹⁴Simeon ugonyo iwa maram yang’ Mungu liewo ko Thekdhanumange ku kwong’a kara ewodh dhanu moko kud i kindgi pi nyinge.

¹⁵E lembe nini ripo gbe ku lembe mi jubila; calu egore kumae,

¹⁶Yo ng’ei gin maeni abidwogo, Abiting’o hema pa Daudi m’upodho kendo; Man abiting’o ginde m’ubam kendo, Abiketho ecungo de:

¹⁷Kara dong’ dhanu m’udong’ uyeny Rwoth, Ku Thekdhanumange ceke ma nyinga lwongre i kumgi,

¹⁸Rwoth uwacu en, m’eketho gin maeni ng’eire ugambre por yang’ con.

¹⁹Kum kumeno awacu para, nia ku wanyai can i ju ma Thekdhanumange m’uloko cwinygi ni Mungu;

²⁰ento dong’ wagoru igi, ya giceri ni acidi mir ayi gin m’acwia, ku tarwang’, ku gin ma judeyo adeya de, man ku rimo.

²¹Kum Musa bedo ku dhanu m’uyero pire ku bang’ adhura ceke, ma jusomo i kacokri ku ba ceng’ sabatu ugambre kum dhanum’utuk ma con.

²²E elund ebedo ber ni jukwenda ku judongo de, ku kanisa ngung’, ya gigoi wi dhanu moko mi juwagi, giorgi de Antiokia karacelo ku Paolo gi man Barnaba; nying’ dhanune, Yuda ma julwong’o Barsaba, giku Sila, ma judongo ma kind umego:

²³e gioro lembe kumae i cing’gi, Jukwenda kud umego ma dongo, ni umego ma gi mi Thekdhanumange i Antiokia, ku Cami, man Kilikia, moth iwu:

²⁴Kum wawinjo nia jumoko m’uai i bang’wa gisendowu ku lembe, ma giloko ko ng’eyong’ec mu; ma wakumio igi lembang’olane wan ungo;

²⁵ebedo ber iwa, ma cwinywa ripo acel, ya wagoi nying’ dhanu waor i beng’wu karacelo ku jumer mwa ma Barnaba ku Paolo,

²⁶gi ju ma cwinygi ai kum kwo migi pi nying Rwoth mwa Yesu Kristu.

²⁷Ka kumeno waoro Yuda giku Sila, gin bende gibiyero lembuno gin ku dhoggi.

²⁸Kum ebedo ber ni Tipo Maleng’, iwa de, ya ku waketh ter i wiwu ma sagu gin maeni m’ubedo dre:

²⁹ya wuceru ni gin ma julamu ni ayi gin m’acwia, man kum rimo, man kum gin ma judeyo adeya, man kum tarwang’; tek wugwokru ni gin maeili nwang’u ebibedo ber iwu. Dong’ wubedi.

³⁰Kum kumeno joca, ka jucikogi, giloro piny Antiokia; man ka gicoko udul dhanu karacelo, gimio igi waraga.

³¹E ka gisomo, anyong’a negogi dit kum jukne.

³²Man Yuda giku Sila, ma gin bende gi jubila, gijuko umego ku lembe dupa, giteng’o kogi.

³³E ka girio kuca nindo moko, e jucikogi ku bang’ umego ma cwinygi kwio ma gidok ko ba ju m’uorogi.

³⁴Ento ebedo ber ni Sila ya ebed kuca.

³⁵Ento Paolo giku Barnaba re gidong’ migi Antiokia, ma gibeponjo gibeyero lembe pa Rwoth, giku juwagi mange bende dupa.

³⁶Ka ceng’ moko kadhu Paolo wacu ni Barnaba kumae, Dong’ wadok kendo walieu umego ku bang’ adhura ceke ma wayero ie lembe pa Rwoth, wanen maram gibedo ko.

³⁷E Barnaba yenyo ya gici giku Yohanagi bende, ma julwong’e Marko.

³⁸Ento Paolo ie wacu ya e ber ungo gici kugi en m’ewekogi Pamfulia, gicidho gikugi ngo i tic.

³⁹E giloko dhoggi ngle, ketho gipokri, e Barnaba dong’ ugamu Marko, e ma gidong’ gicidho gikude Kupro ku yo mi pi:

⁴⁰ento Paolo dong’ ufoyo pare Sila, e ma giwotho gikude, kan umego daru thierogi ni bero pa Rwoth.

⁴¹Man ekadhu kud i Cami ku Kilikia, m’eteng’o ko kanisa.