Read Alur Tic Mi Jukwenda 17 Bible Online

Tic Mi Jukwenda 17 - Alur bible

Tic Mi Jukwenda 17

¹Nie ka gikadhu kud i pacu Amfipoli, kud Apolonia de, e gibino Tesaloniki, ka ma kacokri mi Juyahudi ni ie:

²man calu kura Paolo emondo i bang’gi, man ku ba ceng’ sabatu adek gicikuluro lembe i lembagora pa Mungu gikugi,

³eyabu i lembe enyutho de ya Kristu kosendre be, man eai kendo de ku kind ju m’utho; man nia Yesu maeni, m’ayero iwu pire nini, en e Kristu.

⁴E jumoko m’i kindgi giloko pidoigi, man giribri ku Paolo ku Silagi: udul Juyunani ma dit de ma lworo Mungu, ku mon ma dongo de nyanok ungo.

⁵Ento Juyahudi, ma ngiri benegogi, gigamu jumoko ma rac ma kind dhanu ma sai, e ka gicoko njuru dhanu, ginyayu rop i adhura; e gicori kum ot pa Yason, giyenyo giwodh joca woko ni dhanu.

⁶E ka ginwang’ugi ngo, gidong’ giywayu Yason kud umego moko i wang’ jubim mir adhura, gikok kumae, Joni ma ginyotho ng’om gibino keni bende,

⁷ma Yason ujologi; man joni ceke gitimo tung’ ku cik pa Kaisari, giwacu ya ubimo mange nuti, en e Yesu.

⁸Man gisendo udul dhanu ku jubim mir adhura de, ka giwinjo gin maeni.

⁹E ka gigamu jupiny ma Yason ku juwagi gigonjri ko, e giwekogi y a gicidhi.

¹⁰Man umego gioro Paolo giku Sila pio pio ku diewor nica gicidho Beroya: gin ka gitundo kakeca gimondo i kacokri mi Juyahudi.

¹¹Nie joni gi riek ma sagu ju ma Tesaloniki kum gijolo lembene ku pidoigi ma yot, giyenyo i lembagora pa Mungu ku ba rupiny ku ba rupiny, tek gin maeni en e andha.

¹²Ka kumeno dupa m’i kindgi giyio; mon Juyunani ma dongo, ku jumaco de, nyanok ungo.

¹³Ento ka Juyahudi ma Tesaloniki ging’eyo nia Paolo yero lembe pa Mungu Beroya de, gicidho kuca bende, ma gibethubo kind udul dhanu gisendogi de.

¹⁴E aruca ruca nica umego gilund gioro Paolo ucidho agbele dhu nam: Sila gucu Timoteo gidong’ keca.

¹⁵Ento ju ma gilwoko Paolo gitere cik Athene: e ka gigamu lembang’ola m’ulwong’o Sila giku Timoteo ya gibin i bang’e pio pio, e gicidho.

¹⁶Nie kinde ma Paolo bekurogi i Athene, edieng’o cwinye kan eneno adhurane dhir kud ayi m’acwia.

¹⁷Kum kumeno gibegiporo lembe i kacokri giku Juyahudi ku ju ma lworo Mungu de, man i katali ku ba rupiny ku ba rupiny ku ju ma girombo kugi bende.

¹⁸Jurieko moko ma gi Juepikurio ku Justoiki girombo kugi. Man jumoko wacu kumae, Jakemo maeno yenyo yero nik ang’o? jumange wacu kumae, Kuno nyo e jayer pi mungu ma welo: kum eyero pi Yesu ku pi cer bende.

¹⁹E gigame, gitere Areopago, gipenje kumae, Iyio wang’ei ponji ma nyen maeni m’ibeyero no?

²⁰Kum ikelo gin ma fo’wakung’eyo ngo ba ithwa: ka kumeno nie wayenyo wang’ei thelembe mi gin maeni.

²¹(Nie Juathene ku welo m’ubedo i kindgi gidaru nindo migi ku gin moko mange ngo, ndhu ku yero kadi ku winjo gin moko ma nyen.)

²²Man Paolo cungo i dier Areopago, ewacu kumae, Wu dhanu mir Athene, aneno i gin ceke wuyenyo ka mungu dit.

²³Kum kan abekadhu, man aneno gin mi rwo mu, anwang’u pemblam de ma karamblembe ni i kume kumae, NI MUNGU MA JUKUNG’EYO NGO. Nie gin ma wurwo i bang’e ma wubedo cobo pire nini, e ma ayero iwu pire.

²⁴Mungu m’ucwio ng’om ku gin ceke ma ni i ie de, en, m’e Rwoth mi polo ku ng’om de, ebedo i hekalu ma jugomo ku cing’ ungo;

²⁵kadok ku cing’ dhanu de jutimo ire ngo, calu ya can gin moko benege, kum en e m’emio kwo ni giki ceke, ku lietho m’i igi de, ku gin ceke;

²⁶man etimo thek ceke mi dhanu kud acel kara gibed i wang’ ng’om ceke, nwang’u eng’olo rundi migi m’aketha, ku kieu mi kabedo migi;

²⁷kara giyeny Mungu, tek kuno nyo giyenye e ginwang’e, kadok abora de ebor ungo kudwa kubang’wa nzu:

²⁸kum wakwo man wawotho, wabedo de ni kume; calu jurieko mu moko giwacu kumae, Kum wan de wa nyikwaye.

²⁹Ka kumeno tek wa nyikwai Mungu, maku ku wawac nia nyo Rucwic calu mola ma kwar, kadi mola ma tar, kadi kidi ma jung’iko ku bodho man ku rieko mi dhanu.

³⁰Nie nindo ma jubedo ie cobo, wang’ Mungu kadhu kud i wie; ento kawono eng’olo ni dhanu ceke ku kaka ceke ya gilok cwinygi:

³¹kum eketho ceng’ m’ebipoko ie lembe mi ng’om i bedopwe ku ng’atu m’eketho: kum maeni emio gin ma ketho kwiocwiny ni dhanu ceke, kum eketho ecer ku kind ju m’utho.

³²Nie ka giwinjo pi cer mi ju m’utho, jumoko gicayu acaya; ento jumoko giwacu kumae, Wabiwinjo pi maeni kendo i beng’i.

³³Ka kumeno Paolo ai woko kud i kindgi.

³⁴Ento jumoko gimoko i kume, giyie de: kind joni moko Dionusio ma Jaareopago, dhaku ke ma nyinge Damari, giku jumange de.