Read Alur Tic Mi Jukwenda 19 Bible Online

Tic Mi Jukwenda 19 - Alur bible

Tic Mi Jukwenda 19

¹Man etimbre, nia, kinde ma Apolo ni i Korinto, Paolo m’udaru kadhu kud i ng’om ma yo malu ebino Efeso, man enwang’u julub moko:

²e epenjogi kumae, Wujolo Tipo Maleng’ ka wuyio? Giloko lembe de giwacu ire kumae, Ungo, kadok awinja de wawinjo ngo nia Tipo Maleng’ umire.

³Man ewacu kumae, Ka kumeno jumio iwu baputisi ma mir ang’o? Giwacu kumae, Baputisi pa Yohana.

⁴Paolo wacu kumae, Yohana mio baputisi mi lokocwiny, ewacu ni dhanu nia dong’ giyi ng’atu ma bilubo ng’eye, en e Yesu.

⁵E ka giwinjo maeni, e jumio igi baputisi ku nying Yesu.

⁶Nie ka Paolo ketho cinge i kumgi, Tipo Maleng’ uwok i wigi; e gimaku weco ku dhok mange, man giewo.

⁷Dhanune ceke giyenyo romo apar wi ario.

⁸Man emondo i kacokri eyero de ku tegocwinye nindo mi dwi adek, ebedeluro i lembe man ethokogi pi lembe mi ker pa Mungu.

⁹Ento ka jumoko cwinygi doko nwang’ man giwor ungo, gicido Yojuni i wang’ udul dhanu, eai i bang’gi, ekoyo julubne de, ebedeluro i lembe ku ba rupiny ku ba rupiny i kisoma pa Turano.

¹⁰Gin maeni timbre nindo mi rundi ario: ketho dhanu ceke m’ubedo i Asia giwinjo lembe pa Rwoth, Juyahudi ku Juyunani bende.

¹¹E Mungu timo musana ma dit ku cing’ Paolo:

¹²ketho nia jugamu kitambala ku bongu mi tic m’i kume, jutero ba ju ma kumgi lith, e kumgi kei ndhu, tipo ma rac de ai woko kud i igi.

¹³Ento Juyahudi moko bende ma giwotho swa, gi weg ajoga, gimaku lwong’o nying Rwoth Yesu wi ju ma weg tipo ma rac giwacu kumae, Wakwong’owu ku Yesu ma Paolo beyero pire.

¹⁴Nwang’u Skewa acel, e Jayahudi, ma jalam ma dit, wote de abiro nuti ma gitimo maeni.

¹⁵Tipo ma rac uloko lembe ewacu igi kumae, Yesu ang’eyo, Paolo de ang’eyo; ento wun wu jukani?

¹⁶E ng’atu ma won tipo ma rac upodho i wigi, esagu gin ario de, eloyogi ndhu, ketho gipiei kud i oduno muneru ma kumgi ju rem de.

¹⁷Lembene yik ba dhanu ceke, Juyahudi ku Juyunani de, ma gibedo Efeso; e lworo podho i wigi ceke, nying Rwoth Yesu de doko dwong’.

¹⁸Man dhanu dupa bende ma giyio gibino, gituco, giyero pi tic migi de.

¹⁹Weg ajoga de m’i kindgi ma nok ungo gikelo kitabu migi karacelo giwang’ugi de i wang’ dhanu ceke; gikwanu wel pinje de, ginwang’u etundo sente mi mola ma tar rubanga pier abic.

²⁰Ka kumeno lembe pa Rwoth unyai udoko dit ma sagu.

²¹Nie yo ng’ei gin maeni, Paolo keco i cwinye, nia kan ekadhu ku i Makedoni kud Akaya de y a ecidh Yerusalem ewacu kumae, Yo ng’ei cidho kuca, akoneno Rumi be.

²²E kan eoro juario ma kind ju ma timo ire ucidh i Makedoni, Timoteo gikud Erasto, en gire edong’ tundu i Asia.

²³Man i nindo maeno i dhanu bepido rr kum lembe mi Yojuno.

²⁴Kum ng’atu acel ma nyinge Demetrio, ma jabodho mi mola ma tar, m’etimo hekalu mi mola ma tar mir Artemi, ma kelo kuloka ma nok ungo ni jubodho;

²⁵m’ecokogi karacelo, ku weg tic ma calu maeni de, man ewacu kumae, Paco, wung’eyo nia wanwang’u lonyo ku bodho maeni.

²⁶Wuneno wuwinjo de, nia i Efeso kende ngo, ento cil i Asia ceke kpr kpr, Paolo maeni ethoko dhanu dupa man ewingogi, ewacu nia mungu ma juthiedho ku cing’ ya gi mungu ngo:

²⁷man bodho mwa maeni kende ngo ma jumaru cayu; ento hekalu mir Artemi ma mungu ma nyaku ma dit bende jubidwoke doko mananu, jubikabe woko ku kadwong’ pare ma naka Asia ku ng’om ceke girwo i bang’e.

²⁸E ka giwinjo lembe maeni kwinyo pong’ogi, man gikok, giwacu kumae, Artemi mi Juefeso e dwong’.

²⁹E adhura pong’ ku yakni: man gikonjri kro i kacokri, ka gidaru maku Gayo gikud Aristarko, gi dhanu ma Makedoni, ma giwotho ku Paologi.

³⁰E ka Paolo yenyo emond ba dhanu, julub gicere.

³¹Dhanu moko mir Asia bende, ma gi jurimbe, gioro lembe i bang’e gikwaye nia kud emond i kacokri.

³²Ka kumeno jumoko gikok ku lembe acel, jumoko ke ku lembe mange: kum cokri bedo wuu; dhanu kucel ma dit ging’eyo lembe ma gicokri i kume ngo.

³³Gidong’ giwodho Iskander kud i kind udul dhanu, ma Juyahudi gikethe i wang’ dhanu. Man Iskander ujukogi ku cinge, man eyenyo etit thelembe ni dhanu.

³⁴Ento ka ging’eyo nia en e Jayahudi, kagi ceke gikok ku dwandgi acel i kinde ma yenyo romo saa ario kumae, Artemi mi Juefeso e dwong’.

³⁵Ka jagorlembe juko udul dhanu, ewacu kumae, Wu Juefeso, dhanu makani ma kung’eyo nia adhura mi Juefeso e jakur hekalu mir Artemi ma dwong’, kud ayi de m’uai ba Zeu upodho pinyi?

³⁶Kum jucopo piemo kum gini ngo, maku wubed moth, man kud wutim lembe vur vur.

³⁷Kum wukelo dhanu maeni kakeni, ma gi juyak hekalu ngo kadi gi jucid mungu mwa ma nyaku de ngo.

³⁸Ka kumeno tek Demetrio, ku jubodho wadi ma ni i bang’e, lembe ni i igi kum ng’atu moko, katitlembe bedo ayaba, man jutitlembe de ginuti: wek gidotri.

³⁹Ento tek wuyenyo lembe moko i gin mange ebing’eny i vora ma juketho.

⁴⁰Kum andha jumaru dotowa kum rop maeni ma tin, kum there mbe: man pi lembe maeni there bititre iwa ngo kum udul dhanu maeni.

⁴¹E kan edaru yero kumeno, elalu cokri.