Read Alur Tic Mi Jukwenda 2 Bible Online

Tic Mi Jukwenda 2 - Alur bible

Tic Mi Jukwenda 2

¹E ka ceng’ mi Pentekote tundo, kagi ceke gibedo karacelo i ka acel.

²E aruca ruca nica ba gin moko ai i polo pami wavuvu m’ukoto, man epong’o ot ceke ka ma gibedo i ie.

³E leb m’ukaru pami lebmac, uwok i wang’gi; man ebedo i wigi kubang’gi nzu.

⁴E kagi ceke Tipo Maleng’ uromogi, man gimaku weco ku dhok ma nge nge, calu wec ma Tipo mio igi.

⁵Nwang’u Juyahudi gibedo Yerusalem, gi dhanu ma lworo Mungu, ma giai kud i thek ceke ma the polo.

⁶Man ka ba gin maeni winjre, udul dhanu gicoko dhoggi karacelo, e lembene loyogi, kum dhanu kubang’gi nzu giwinjo gibeweco ku dhu thugi ma dhe.

⁷E kagi ceke gipoi igi de wang’ lii, giwacu kumae, Nen, joni ceke ma giweco gi Jugalilaya ngo?

⁸Wawinjo ku dhu thuwa ma junyolo kowa kubang’wa ceke ngi nenedi?

⁹Juparthi ku Jumedi man Juelemiti, ku ju m’ubedo i Mesopotamia, i Yahudi man Kapadokia, i Ponto man Asia,

¹⁰i Frugia man Pamfulia, i Misiri man ng’et Libua ma yo ba Kurene, ku jubedo m’uai i Rumi, Juyahudi ku ju ma juloko wang’gi bende,

¹¹Jukrete man ju Arabi, wawinjo gibeweco ku dhu thuwa kwa pi tic ma dwong’ pa Mungu.

¹²E kagi ceke igi wang’ lii, e igi pido kwe, giwacu gigi kumae, Thelembe maeni ang’o?

¹³Ento jumange giyero ku cac kumae, Pigulok ma nyasa merogi en.

¹⁴Ento Petro, m’ucungo giku juwagi apar wi acel, eting’o dwande malu, eyero igi kumae, Wu dhanu mi Yahudi, ku kewu ceke ma wubedo i Yerusalem de, dong’ wung’ei lembe nini, man wucik ithwu kum lem para.

¹⁵Kum joni gimer amera ngo, calu ma wuwacu nyo; kum ceng’ udoko saa adek kende;

¹⁶ento maeni en e lembe m’uyere ni kum jabila ma Yoel:

¹⁷Mungu wacu kumae, Gini bitimbre i kajik ceng’, Abikonjo kum Tipo para moko wi weg kum ceke: Man wotu ku nyigu gibiewo, Awobi mu de gibineno ginmawokiwang’, Judongo mu m’uti ke gibileko lek:

¹⁸Eyo i ceng’ maeno abikonjo kum Tipo para wi jumiru para ma co. Ku jumiru para ma nyir bende; e gibiewo.

¹⁹Man abinyutho musana malu i polo, Ku giranyutha ma piny i ng’om de; Rimo, ku mac, ku lietho mi yiro de:

²⁰Ceng’ bilokre ni mudho, Dwi ke ni rimo, Ma fodi ceng’ pa Rwoth ku wok ungo, Cenguno m’e dwong’ pire de dit:

²¹Gini bitimbre, nia ng’atu ma tek bilwong’o nying Rwoth ebiboth.

²²Wu dhanu pa Israel, wuwinj lembe maeni: Yesu ma Nazareti, en e ng’atu ma Mungu foye iwu ku tic ma dwong’ man musana ku giranyutha ma Mungu timo ni kume i kindwu, cil calu wun de wung’eyo giwu;

²³en, ma jumie ni kum lembagora m’ubedo aketha pa Mungu m’elar eng’eyo, wun de wudong’ wugure ku cing’ juco wunege de:

²⁴ma Mungu ketho ecer, m’egonye ko ku i masendi mi tho: kum ecopre ngo ya ebed kudo.

²⁵Kum yang’ Daudi yero pire kumae, Aneno Rwoth i wang’a thiri thiri; Kum eni yo ku cinga ma yor acwic, kara ia kud upidi:

²⁶Ka kumeno mutoro nego adundena, leba de anyong’a nege; Man ke ring’kuma bende bibedo m’egeno;

²⁷Kum ibiweko ng’eyong’ec para ni Hadeya ngo, Kadi ibimio Ng’atu Maleng’ peri ngo ya enen top.

²⁸Iketho ang’eyo yo mi kwo; Ibiyeng’a ku mutoro i weng’i.

²⁹Umego, acopo yero iwu dwe dwe pi Daudi ma kwaru, nia etho man juyike, man ke odliel pare ni i kindwa cil i ceng’ maeni.

³⁰Kum en e jabila, m’eng’eyo de nia Mungu ng’olo ire ku kwong’, nia kum kodhi mi kume ebiketho ng’atu acel wi komker pare:

³¹en m’elar eneno maeni eyero pi cer ma Kristu bicer ko, nia juweke ni Hadeya ngo, kadi ring’kume de neno top ungo.

³²Yesu maeni Mungu ketho ecer, ma kawa ceke de wa jumulembene.

³³Ka kumeno en ma judo de malu ba cing’ Mungu ma yor acwic, m’ejolo lembang’ola ma Wego ng’olo pi Tipo Maleng’, ekonjo gin maeni, ma wuneno wuwinjo de.

³⁴Kum Daudi idho i polo ngo: ento ewacu en kumae, Rwoth uwacu ni Rwoth para, Jany yo ku cinga ma yor acwic,

³⁵Maram abiketho ko jukwoji ni kom mi tiendi.

³⁶Dong’ juot pa Israel ceke ging’ei ma cwinygi kwio, nia Mungu ketho Yesu maeni ma wugure, ni Rwoth ku Kristu bende.

³⁷Nie ka giwinjo maeni, e ecobo adundegi, man giwacu ni Petro giku jukwenda wagi de kumae, Umego, wabitimo ang’o?

³⁸E Petro wacu igi kumae, Wulok cwinywu, wumak baputisi kubeng’wu kubeng’wu ku nying’ Yesu Kristu ni ruc mi dubo mu; man wubijolo giramia ma Tipo Maleng’.

³⁹Kum lembang’olane en e iwu, man ni nyithindho mu, man ni dhanu ceke ma gibedo bor cen, cil ku ju ma Rwoth Mungu mwa bilwong’o i bang’e.

⁴⁰Man etuco ku lembe mange de dupa, man ethokogi, ewacu kumae, Dong’ wubodhru giwu ni dhanum’utuk maeni m’ugondri.

⁴¹E ju m’ujolo lembe pare gilund gimaku baputisi: man ceng’nica dhanu ma yenyo romo rubanga adek umedogi.

⁴²Man gibedo asu ku ponji mi jukwenda ku ripocwiny de, ku kwen m’angweka man ku rwo de.

⁴³Man lworo makugi kubang’gi ceke: e musana ku giranyutha dupa timbre ni kum jukwenda.

⁴⁴E ju m’uyio ceke gibedo karacelo, piny migi ceke de bedo ariba;

⁴⁵man giloko jupiny migi ku jamni migi de, gipoko de ku ba dhanu ceke, calku canpiny ma ni kum dhanu kubang’gi kubang’gi.

⁴⁶Man ku ba rupiny ku ba rupiny, ma gibedo asu ku cwinygi m’uripo acel i hekalu, ku kwen m’ang’weka de i udigi, gijolo cemo migi ku mutoro kwa kud adunde m’ucungo acel,

⁴⁷ma gipaku ko Mungu, ma gibedo ku bero de ku ba dhanu ceke. E Rwoth ueikumedo igi ju m’uboth ku ba rupiny ku ba rupiny.