Read Alur Tic Mi Jukwenda 20 Bible Online

Tic Mi Jukwenda 20 - Alur bible

Tic Mi Jukwenda 20

¹E yo ng’ei rop m’uthum Paolo ma nwang’u elwong’o julub i bang’e ejukogi de, emothogi, e eai ecidho i Makedoni.

²E kan ekadhu kud i theng’ ng’ombuca, emio igi juk de ma dit, ecidho i Yunani.

³E kan ebedo dwi adek kuca, e Juyahudi gipido lembe i kume kinde ma nik etug woth ecidh i Cami ku yo mi pi, ie keco y a ebidok ku yo Makedoni.

⁴Ju ma gicidho gikugi gijik Asia, Sopater ma Beroya, wod Puro; man mi Jutesaloniki ke, Aristarko man Sekundo; man Gayo ma Derbe, ku Timoteo; man mir Asia ke, Tukiko giku Trofimo.

⁵Ento joni gilar gicidho, gidong’ gikurowa i Troa.

⁶E waai Filipi ku yo mi pi ka ceng’ mi kwen ma thobi mbe i ie kadhu, e watundo i bang’gi Troa i ceng’ abic; ka ma wario i ie ceng’ abiro.

⁷I ceng’ ma kwong’ane ma yenga, ka wacokra karacelo ning’weko i kwen, Paolo giweco gikugi, nwang’u ie pido ya urwone ebicidho; man eyero hai maram piny udoko ko diewor ma ling’.

⁸Thala de dupa i ot ma malu ka ma wacokra ie karacelo.

⁹Nwang’u jalawobi acel ma nyinge Eutuko ubedo i wang’ot, ma nindo ma dit unuro kume; man ka Paolo becidho ku yero lembe ma sagu, ng’atuno ma nindo pare sage epodho piny kud i ot mir adege, man juting’e m’etho.

¹⁰E Paolo gam uloro piny, eriebre i wie, egwake ewacu kumae, Kud wutimbru swa; kum kwone nuti i ie.

¹¹E kan eidho malu, eng’weko i kwen de, man ecamu, giweco gikugi hai de, maram piny uru ko, e eai woko.

¹²Gidong’ gikelo nyiruno m’ebedo kwo, e cwinygi kwio.

¹³Ento wan, ma walar wacidho ba combo, wacidho Aso ku yo mi pi iwa wacu nyo wabicigamu Paolo kuca: kum eng’olo kumeno, ie caku en ya ewoth ku wi ng’om.

¹⁴E ka warombo wakugi Aso, wagame, wabino kugi Mitulene.

¹⁵E waai keca ku yo mi pi, urwone watundo kum Kio; ceng’ mir adege wagudo Samo; e ceng’ mir ang’wende watundo Mileto.

¹⁶Kum Paolo keco ya ekadh Efeso ku yo mi pi, kara kud egal i Asia; kum ewotho pio pio, kara tek ecopre, ceng’ Pentekote ubin unwang’e Yerusalem.

¹⁷E eoro lembe kud i Mileto ucidho Efeso, ulwong’ judong kanisa ubin i bang’e.

¹⁸Ka gibino i bang’e, ewacu igi kumae, Wun wung’eyo giwu, ugambre i ceng’ ma tienda lar unyono i Asia, maram wabedo ko kudu nindo ceke,

¹⁹m’atimo ko ni Rwoth ku pidoia ma mol kwa, man ku piwang’, ku masendi bende m’umvang’a kum rieko lembe mi Juyahudi;

²⁰maram alworo ko ngo niyero iwu gin ceke m’ubedo ni kuloka, ku ponjowu kele, man ku ba udi ku ba udi

²¹abedatuco ni Juyahudi ku Juyunani bende ya gilok cwinygi ba Mungu, man gibed ku yioyic yo ba Rwoth mwa Yesu Kristu.

²²Man nen, kawono, cwinya twire ya aci Yerusalem m’ang’eyo ko gin ma biciwok i kuma kuca ngo:

²³ento Tipo Maleng’ utuco ira ku bang’ adhura ceke, ewacu nia kol ku ruvwa bekura.

²⁴Ento aneno kwo para mit ungo i wang’a, ento kara adar bedo para, ku tic m’agamu ba Rwoth Yesu, ya atuc lembanyong’a ma juboth ko mi bero pa Mungu.

²⁵Man kawono, nen, ang’eyo nia wun ceke, m’awotho i kindwu ayero iwu pi ker, wubineno wang’a kendo ngo.

²⁶Kum kumeno tinuni atuco iwu, ya an a leng’ ni rimb dhanu ceke.

²⁷Kum alworo ngo niyero iwu lembapora pa Mungu ceke.

²⁸Wubed ku weng’wu giwu, kud udul ceke, ma Tipo Maleng’ uketho wudoko julieu i ie kara wumi cam ni kanisa pa Rwoth m’eng’iewo ku rimbe gire.

²⁹Ang’eyo yo ng’ei ai para urudi ma rac bimondo i kindwu, ma kisa mbe kugi kum udul;

³⁰man kud i kindwu dhanu moko biai, ma biyero lembe ma tung’, kara giwing’ julub ulub ng’eigi.

³¹Kum kumeno wukuru, wupoi ya calu nindo mi rundi adek aweko juko dhanu ngo kubang’gi kubang’gi diewor ku dieceng’ ku piwang’.

³²Kawono athierowu ni Mungu, man ni lembe mi berone, ma copo teng’owu, ma copo mio iwu camupacu de kind dhanu ceke ma judwokogi leng’.

³³Ng’atu moko mbe m’aneno mola ma tar pare mit i wang’a, kadi mola ma kwar, kadi kendi de.

³⁴Wung’eyo giwu nia cing’ maeni timo ni canpiny m’unega, ni ju ma wanuti wakugi de.

³⁵I gin ceke amio iwu por, nia ku tic ma wumulu ko kumeni maku wukony ju ma ng’ic, wupoi de kum lembe pa Rwoth Yesu, nia ewacu en kumae, Mio en e mugisa ma sagu gamu.

³⁶E kan edaru yero kumeno, e erum piny man girwo gikugi ceke.

³⁷E kagi ceke giywak dit, gigwaku ng’ut Paolo gicwio limbe de,

³⁸ma can unegogi ma sagu kum lembe m’eyero, nia gibineno wang’e kendo ngo. E gitere i yo pare ba combo.