Read Alur Tic Mi Jukwenda 21 Bible Online

Tic Mi Jukwenda 21 - Alur bible

Tic Mi Jukwenda 21

¹E kan etimbre nia kindwa liero ku joca e wacidho ku yo mi pi, wabino atira Kos, urwone ke Rodo, waai keca wabino Patara:

²e ka wanwang’u combo m’ukadhu lokaca Foiniki, waidho i ie, wacidho ko ku yo mi pi.

³E ka waweko Kupro unen yor acam, wacidho Cami ku yo mi pi, e wanyiko Turo; kum keca ka ma combo olo ie ter.

⁴E ka wanwang’u julub wario keca ceng’ abiro: e joni wacu ni Paolo ku Tipo, nia kud enyon i Yerusalem.

⁵E ka ceng’ nica thum kakare, waai wacidho i woth mwa; e kagi ceke ku mongi ku nyithindhgi de, gilwokowa ram wakadhu ko ku i adhurane: e warum piny dhu wath, warwo, man wamothra;

⁶e wadong’ waidho i combo, gin ke giloko gidok thugi kendo.

⁷E ka wadaru wot ma waai ko Turo, watundo Tolemai: e wamotho umego, wario de wakugi ceng’ acel.

⁸Urwone waai, wabino Kaisaria: e wamondo i ot pa Filipo ma jayer lembayong’a ma juboth ko, ma en e ng’atu acel ma kind juabiro, wabedo i bang’e.

⁹Nie ng’atuno jumanyir pare gin ang’wen ma gi sumba, ma giewo.

¹⁰E ka wario keca ceng’ moko, jabila moko ma nyinge Agabo uai i Yahudi loro piny.

¹¹E ebino i bang’wa, eting’o thondh pier Paolo, etwio ko tiende ku cinge, ewacu kumae, Tipo Maleng’ uwacu kumae, Juyahudi ma i Yerusalem gibitwio ng’atu ma won thondh pier maeni kumeni, gibikethe de i cing’ Thekdhanumange.

¹²E ka wawinjo gin maeni, wan ku ju ma kakeca de wakwaye ya kud eidh Yerusalem.

¹³E Paolo lund uloko lembe kumae, Wubeywak, wuluro ko adundena nedi? kum abedo ayika mi twic kende ngo, ento mi tho bende i Yerusalem pi nying Rwoth Yesu.

¹⁴E kan ekwero loko pidoie, waweke, wawacu kumae, Dong’ yeny ma i Rwoth uyenyo e m’utimbre.

¹⁵E yo ng’ei ceng’ maeni wating’o jamni mwa waidho Yerusalem.

¹⁶Man jumoko ma kind julub ma Kaisaria bende wacidho wakugi, ma gikelo ng’atu acel mi Kupro, ma nyinge Nason, en e jalub ma con, ma wabicibedo wakugi.

¹⁷E ka watundo Yerusalem, umego gijolowa ku mutoro.

¹⁸E urwone Paolo mondo ba Yakobo wakugi; nwang’u judongo ceke ginuti.

¹⁹E kan emotho gi, egonyo gin ma Mungu timo acel acel i kind Thekdhanumange ni kum tic pare.

²⁰Gin de, ka giwinjo maeni, giyungo Mungu; man giwacu ire kumae, Umego, ineno nia dhanu m’uyio ma kind Juyahudi gi rubanga swa ngi; man gin ceke ava cik utimogi:

²¹man giwinjo piri, nia iponjo Juyahudi ceke m’i kind Thekdhanumange ya giwek Musa, nia ku gitim yaa kum nyithindho migi, kadi kuragi de ku gikwany.

²²Ka kumeno ang’o? gibiwinjo andha nia ibino.

²³Ka kumeno tim maeni ma wawacu iri: Dhanu ang’wen nuti bang’wa ma lembang’ola ni i wigi:

²⁴igam joni, wudwokru leng’ wukugi, iwodh jupiny igi, kara gigwar wigi: e dhanu ceke gibing’eyo nia lembe ma giwinjo piri en e lemandha ngo; ento nia in giri bende iwotho atira, iworo cik de.

²⁵Ento pi Thekdhanumange ma giyio, wagoro, wang’olo nia dong’ gigwokri gigi kum gin ma julamu ni ayi gin m’acwia, man ni rimo, ku gin ma judeyo adeya, man kum tarwang’.

²⁶E Paolo lund ugamu jono, man urwone kan edwokre leng’ gikugi gimondo i hekalu, m’enyutho ko nia ceng’ mi dwokrileng’ utimbre kakare, maram lam uwodhre ko pigi ceke kubang’gi kubang’gi.

²⁷E ka ceng’ abiro dhingo thum, Juyahudi ma Asia, ka ginene i hekalu, githubo i udul dhanu ceke man giketho cing’gi i kume,

²⁸gikok kumae, Dhanu mir Israel, wukonywa: Janduni en e ng’atu m’uponjo dhanu ceke ku kaka ceke kum dhanu, kum cik de kum ka maeni bende; man ke ekelo dhanu mi Yunani de i hekalu, man ecido kamaleng’ maeni.

²⁹Kum gilar ginene i adhura giku Trofimo ma Jaefeso, e ma giwacu nyo Paolo kele i hekalu.

³⁰E adhura ceke bewoi swa, dhanu de ring’ni karacelo; e gimaku Paolo, giywaye woko kud i hekalu: e giciko dhugolane rit.

³¹E ka gibeyenyo nege, rwonglembene tundo ba jego ma dit mir udul asikari, nia rop uromo Yerusalem ceke.

³²E ndhu ndhu nica egamu asikari ku ju ma jego de, man gikonjri kugi piny i bang’gi: e joni, ka gineno jego ma dit kud asikari de, giweko fodo Paolo.

³³E jego ma dit ulund ubino ceng’ni, emake de, man eng’olo ya jutwie ku nyoro ario; e epenjo nia en e ng’a, man edubo ang’o.

³⁴E juman kok ku lembe migi tung’, juman ku lembe migi tung’, i kind njuru dhanu: e kan ecopo ng’eyo the rop maeni ngo cu kum woi mi dhanu, eng’olo y a jutere i ot ma tek.

³⁵E kan ewok wi gin ma juidho ko i ot, nwang’u asikari giyeye ayeya kum rop mi njuru dhanu;

³⁶kum udul dhanu gilubo ng’eye, ma gikok kumae, Wucwale cen.

³⁷E ka jumaku tero Paolo i ot ma tek, ewacu ni jego ma dit kumae, Acopo yero lembe moko iri? Man ewacu kumae, Ing’eyo dhu Juyunani?

³⁸Ka kumeno in i Jamisiri ngo ma nyamaca teng’o ali, m’utelo wi dhanu rubanga ang’wen i yamba mi Jukwori?

³⁹Ento Paolo wacu kumae, An a Jayahudi, mi Tarso i Kilikia, an a dhanu mir adhura ma nok ungo: e akwei, ya ikoiyi ayer ni dhanu.

⁴⁰E kan eyio, Paolo, m’ucungo wi gin ma juidho ko i ot, ejuko dhanu ku cinge; man ka giling’ ti, eyero igi ku dhu Juebrania, ewacu kumae,