Read Alur Tic Mi Jukwenda 22 Bible Online

Tic Mi Jukwenda 22 - Alur bible

Tic Mi Jukwenda 22

¹Umego ku wego de, wukowuwinj lembe para ma kawono abetito iwu.

²E ka giwinjo nia ebeyero igi ku dhu Juebrania, giling’ m’usagu: man ewacu kumae,

³An a Jayahudi, ma junyola i Tarso ma Kilikia, ento apidha re jupidha i adhura maeni, ku the tiend Gamaliel, juponja cu calku kura cik pa kwaruwa, ma ava Mungu tima, cil calu etimowu tinuni:

⁴man anyayu ragedo kum Yojuni cil mi nek ngi, m’atwio ko co ku mon de man acwalugi i odkol.

⁵Calu jalam ma dit bende nyutho pira, ku dilo ceke mi judongo bende: m’agamu waraga de i bang’gi ni umego, man acidho Dameski, kara akel ju ma ni kuca bende Yerusalem ku uno kara jusendgi.

⁶Man etimbre, nia ka wabewotho, wadhingo Dameski de, calu nyangu ma the dieceng’, e ndhu ndhu nica der uai i polo caru piny ngbeng’i kuma.

⁷E apodho i ng’om, man awinjo dwal uwacu ira kumae, Saul, Saul, inyayu ragedo i kuma nedi?

⁸Man adwoko lembe kumae, In i ng’a, Rwoth? En ke edwoko lembe ira kumae, An a Yesu ma Nazareth m’ibenyayu ragedo i kuma.

⁹Man ju ma wawotho wakugi gineno der andha, ento giwinjo dwal ungo m’uweco i bang’a.

¹⁰An ke awacu kumae, Abitimo ang’o, Rwoth? Rwoth uloko ira lembe kumae, Ai malu, icidh imond i Dameski; ka jubiyero iri kuca pi gin ceke ma juketho iri ya itim.

¹¹E kan acopo neno piny ungo kum rieny mi der maeno, e ju ma wawotho wakugi gidong’ gipeya ku cinga ka wabino Dameski.

¹²E ng’atu moko ma nyinge Anania, m’e jalwor Mungu calku cik, ma pire ber de ni Juyahudi ceke m’ubedo kuca,

¹³ebino i bang’a, ecungo i vuta e ewacu ira kumae, Umira Saul, mak neno piny. E aneno bang’e ndhu i saa nica.

¹⁴Man ewacu kumae, Mungu pa kwaruwa kethi kara ing’ei gin ma ie yenyo, inen Ng’atu ma Pwe de, man iwinj dwal m’uai i dhoge bende.

¹⁵Kum ibibedo jamulembe pire ni dhanu ceke kum gin m’ineno m’iwinjo de.

¹⁶Kawono igalu nedi? ai malu, mak baputisi, lwok dubo peri woko, m’ilwong’ ko nyinge bende.

¹⁷E etimbre, nia, kan adwogo Yerusalem, e kinde m’arwo i hekalu, piny urwinyo kuda biti,

¹⁸e aneno ebeweco i bang’a kumae, Tim pio, iwodhri tho kud i Yerusalem kum gibijolo lembatuca ma pira ngo i beng’i.

¹⁹Man adwoko lembe kumae, Rwoth, ging’eyo gin ya i kacokri kubang’gi ceke abedafodo ju m’uyio iri acwalugi i odkol de:

²⁰e ka rimb Stefano ma jamulembe peri cwir, nwang’u an de acungo i vute, ayia de ayio, akuro kum kendi mi ju m’unege de.

²¹Man ewacu ira kumae, Cidhi: kum abiori ngbir ba Thekdhanumange.

²²E giwinje maram etundo ko kum lembe mae; e giting’o dwandgi malu, giwacu kumae, Wukab wagi ng’atu ma kumeno woko kud i ng’om: kum maku kud ebed kwo.

²³E ka gikok, gibayu kendi migi de woko, giketho utur de i lietho,

²⁴e jego ma dit ung’olo ya jutere i ot ma tek, ewacu nia jubiluro i lembe pare ku fodo, kara eng’ei thelembe m’uketho jukok kumeno i kume.

²⁵E ka gitwie ku foto, Paolo wacu ni jego m’ucungo i vute kumae, Cik uyio ya ifod ng’atu ma Jarumi, ma fodi jukupoko lembe pare rac ungo?

²⁶Ka jego winjo kumeni, ecidho ba jego ma dit, ewacu kumae, Iyenyo timo ang’o? kum ng’atu maeni en e Jarumi.

²⁷E jego ma dit ubino ewacu ire kumae, Koiwac ira, in i Jarumi’ Man ewacu kumae, Eyo.

²⁸Jego ma dit uloko lembe kumae, Anwang’u paker maeni ku piny ma dit. Man Paolo wacu kumae, Ento an junyola anyola Jarumi.

²⁹E ju ma giyenyo gilur i lembe pare ging’eny wany kud i kume: e jego ma dit bende lworo make kan eng’eyo nia en e Jarumi, man kum etwie.

³⁰Ento urwone, kum eyenyo eng’ei thelembe ma Juyahudi dote i kume cu, egonye, man eng’olo ya julam ma dongo ku dilo ceke gicokri karacelo, man ekelo Paolo piny ekethe i wang’gi de.