Read Alur Tic Mi Jukwenda 23 Bible Online

Tic Mi Jukwenda 23 - Alur bible

Tic Mi Jukwenda 23

¹Man Paolo, m’eneno dilo tel, ewacu kumae, Umego, abedo i wang’ Mungu ku pidocwiny ma ber ceke cil i ceng’ maeni.

²E jalam ma dit ma nyinge Anania ng’olo ni ju m’ucungo ceng’ni ya gipad dhoge.

³Paolo lund uwacu ire kumae, Mungu bipedi, in i gang’ m’afuya ku vulo: ibedo mi poko lembe para calku cik, e idong’ ing’olo ya jugoya tung’ ku ciki?

⁴E ju m’ucungo i vute giwacu kumae, Icayu jalam ma dit pa Mungu?

⁵E Paolo wacu kumae, Ang’eyo ngo, umego, nia en e jalam ma dit: kum egore kumae, Kud iyer lem marac kum jabim mi juthu.

⁶Ento ka Paolo ng’eyo nia jukucel gi Jusadukayo jukucel ke gi Jufarisayo, ekok her i dilo kumae, Umego, an a Jafarisayo, a wod Jafarisayo: jupoko lembe i wia kum genogen ku cer mi ju m’utho.

⁷E kan ewacu kumeno, e piem ugapre kind Jufarisayo ku Jusadukayo de; e dhanu m’ucokri gipoko igi dra.

⁸Kum Jusadukayo giwacu nia cer umbe, kadok malaika, kadok tipo ento Jufarisayo gituco ario de.

⁹E piem ujai dit: jugorcik moko ma kind Jufarisayo gicungo, gipiemo, giwacu kumae, Wanwang’u dubo moko ngo i ng’atuni: kuno nyo tipo kadi malaika weco en i bang’e, ka nedi ke?

¹⁰E ka piem udoko dit, jego ma dit, lworo nege ya jumaru yeco Paolo tung’ tung’, eng’olo nia asikari gilor piny gigame ku tego kud i kindgi, gikele i ot ma tek.

¹¹Diewor m’ulube de Rwoth ucungo i vute, ewacu kumae, Cwinyi bed tek: kum calu ituco pira Yerusalem, e ibikonyutho lembe kumeno be i Rumi bende.

¹²E ka piny uru, Juyahudi giribri karacelo, man gitwiri gigi ku kwong’, giwacu nia gibicamu giracama kadi madhu giramadha de ngo ma fodi gikunego Paolo ngo.

¹³E ju ma gikwongri kumeno gi sagu pier ang’wen.

¹⁴Man gibino ba julam ma dongo ku judongo de, giwacu kumae, Watwira giwa ku kwong’ ma dit, ya wabibilo gin moko ngo ma fodi wakunego Paolo ngo.

¹⁵Nie ka kumeno wun ku dilo de wunyuth ni jego ma dit nia eketh Paolo lor piny i beng’wu, calu ya wuyenyo wung’i i lembe pare cu ma sagu: e wan, ka fodi ewok ceng’ni ngo, nwang’u wayikra ma wanege ko.

¹⁶Ento wod nyamin Paolo winjo nia gikanu adhi, e ebino emondo i ot ma tek eyero ni Paolo.

¹⁷E Paolo lwong’o jego acel i bang’e, ewacu kumae, Ter jalawobi maeni ba jego ma dit; kum ebedo ku nyawec moko m’eyer ire.

¹⁸Ka kumeno ecoke, man etere ba jego ma dit, ewacu kumae, Paolo ma jakol ulwong’a i bang’e, man epenja ya akel jalawobi maeni i beng’i m’ebedo ku nyawec moko m’eyer iri.

¹⁹E jego ma dit umake ku cinge, man ecoro kude cen, man epenje mung’ mung’ kumae, En e lembang’o m’ibedo ko m’iyenyo iyer ira?

²⁰Man ewacu kumae, Juyahudi giripo dhoggi, nia gipenji iter Paolo piny urwo ba dilo, calu iyenyo ipenj thelembe pare cu ma sagu.

²¹Ka kumeno kud iyi igi: kum dhanu pier ang’wen ku wie gikanu adhi ire, ma gitwiri gigi ku kwong’, nia gicamu ngo gimadhu de ngo ma fodi gikunege ngo: e kawono gibedo ayika, ma gibekuro ko lembang’ola m’i beng’i.

²²Ka kumeno jego ma dit uweko nyiruno cidho, kan eng’olo ire kumae, Kud iwac ni ng’atu moko ki nia inyutho lem maeni ira.

²³Man elwong’o jego ario i bang’e, ewacu kumae, Keth asikari dak ario bed ayika gici gijik i Kaisaria, ku ju ma weg kana de pier abiro, ku ju ma weg tong’ ke dak ario, i saa adek mi diewor:

²⁴man eng’olo igi ya gikel riuni, kara giketh Paolo i wie, gitere ko bo ba Feliki ma jabim.

²⁵Man egoro waraga kumae:

²⁶Klaudio Lusia ni jabim ma dwong’ Feliki, moth iri.

²⁷Ng’atu maeni Juyahudi make gibeyenyo nege, kan abino i bang’gi kud asikari alare ko nwang’u awinjo nia en e Jarumi,

²⁸Kum ayenyo ang’ei thelembe m’uketho gidote, atere piny ba dilo migi:

²⁹adong’ anwang’u nia gidote kum penji mi cik migi, ento en e gin ma romo ku nek kadi twic de ngo.

³⁰E ka junyutho ira nia jubipido lembe kum ng’atuni, e aore i beng’i eno, awacu ni weg adote pare bende nia dong’ gidote kud i weng’i.

³¹Kum kumeno asikari, gigamu Paolo calu jung’olo igi, gitere ku diewor nica Antipatri.

³²Ento urwone giweko weg riuni e ma gidong’ gicidho kude, gin ke gidok ba ot ma tek:

³³joca de, ka gitundo Kaisaria gimio waraga ni jabim, giketho Paolo de i wang’e.

³⁴E kan esome, epenjo ka thugi; e kan ewinjo nia e dhanu ma Kilikia,

³⁵ewacu kumae, Abiwinjoi cu nwang’u weg adote peri bende giwok: man eng’olo ya jukure i Odtiti pa Herode.