Read Alur Tic Mi Jukwenda 28 Bible Online

Tic Mi Jukwenda 28 - Alur bible

Tic Mi Jukwenda 28

¹E ka waboth, walund wang’eyo nia cula nino julwong’o Melita.

²Dhanu ma saine gi juwat dit i kumwa: kum gikudho mac, man gijolo wa ceke, kum koth m’ubecwi, man kum koyo.

³Ento ka Paolo coko with yen eketho gi de i mac, thwol uai i ie ni lietho mi mac, edhokre de ng’ut cinge.

⁴Ka dhanu ma saine gineno yedi m’uliere kum cinge, giwacu gigi kumae, Kuno nyo ng’atuni en e janek, ma, kadok eboth kud i nam, ento Pokolembe ma pwe weke ngo ebed kwo.

⁵Ento ekiro yedine i mac, gin moko ma rac de mbe m’udong’ utime.

⁶Ento giwacu nyo ebikwode, kadi ebipodho bir m’etho: ere ka gikuro hai gineno gin moko ma rac umbe m’utime, giloko pidoigi, man giwacu nia en e mungu.

⁷Nwang’u kakeca bedo ceng’ni ku podho pa rwoth mi cula nino, ma nyinge Publie; m’ejolowa, egwokowa ber ceng’ adek.

⁸E ebedo kumeno, nia won Publio vuto ku kume m’ucek ku thorimo: e Paolo mondo i bang’e, erwo de, eketho cinge de i kume ekeyo ko kume.

⁹Ka maeni timbre, ju m’udong’ de ma gi weg tho i cula nino gibino, gin de kumgi kei:

¹⁰joni bende giyungowa ku yung dupa; e kinde ma wacidho ku yo mi pi, gikelo gin ma cande negowa giketho i combo.

¹¹Man ka dwi adek ukadhu watugo woth ku yo mi pi i combo ma Iskanderia m’ucungo i cula i nindo mi koyo, giranyuthane Umego ma Rut[4].

¹²E waeomo Surakusa, man wario keca ceng’ adek.

¹³Ku kuca wagondra, wawok Regio: e ka ceng’ acel ukadhu sasi tuk, e i ceng’ mir arionde watundo Puteoli;

¹⁴ka ma wanwang’u ie umego, man gikwayu y a wari kugi ceng’ abiro: e kumeno wabino Rumi.

¹⁵E kan umego ma kuca, giwinjo piwa, gibino ning’olowa agbele i Apiforo ku Trestabeme: ka Paolo neno joni, efoyo Mungu, man cwinye doko tek.

¹⁶E ka wamondo i Rumi, juyio ya Paolo bed gire kende gikud asikari m’ukure.

¹⁷Man etimbre, nia ka ceng’ adek ukadhu Paolo lwong’o judongo mi Juyahudi karacelo: e ka gicoko dhoggi, ewacu igi kumae, An, umego, kadok atimo gin moko ngo kum dhanu, kadi kum kura pa wegwa de, ento ku Yerusalem re jumia ni jakol i cing’ Jurumi:

¹⁸ma, ka giluro i lembe para, giyenyo gigonya, kum lembe moko mbe i ia ma mi nek.

¹⁹Ento ka Juyahudi gijai kum lembene, ketho ayenyo ba Kaisari: en e nia abedo ku lembe moko m’adot ko thek mwa re ngo.

²⁰Ka kumeno pi lembe nini alwong’owu wubin wanendra wawec kudu de: kum abedo atwia ku nyoro maeni kum genogen mir Israel.

²¹E giwacu ire kumae, Wagamu waraga moko ngo piri m’uai i Yahudi, umego moko mbe de m’ubino kuni m’ukelo lembe kadi m’uyero piri ma rac de.

²²Ento wayenyo wawinj i beng’i gin ma ii bepido: kum pi pokri maeni, wang’eyo i kaka ceke juyero nia e rac.

²³E ka gituro ire ceng’, gibino dupa i bang’e ka m’ebedo i ie; man ekoro igi lembene, etuco pi ker pa Mungu, man ethokogi pi Yesu, kud i cik pa Musa ku jubila bende, ugambre kugweno cil uthieno.

²⁴Jumoko yio lembe m’eyero, jumoko ke yio ngo.

²⁵E ka cwinygi ripo ngo i kindgi gigi, giai yo ng’ei lembe acel ma Paolo yero kumae, Tipo Maleng’ yang’ uyero dre ni wegwu ku dhu Isaya ma jabila,

²⁶ewacu kumae, Ci ba dhanu maeni, man iwac kumae, Awinja wubiwinjo, man wubing’eyo ki ngo; Anena de wubineno, ere wubing’eyo ki ngo:

²⁷Kum adunde dhanu maeni doko nwang’, Ithgi de dhing’, Wang’gi de gimio; Kara ku ginen ku wang’gi, Ku giwinj ku ithgi, Ku ging’ei kud adundegi, Ku gilokri kendo, Ketho acanggi.

²⁸Ka kumeno dong’ wung’ei, ya both maeni pa Mungu juoro ni Thekdhanumange: gibiwinjo bende.

²⁹E kan eyero lembe maeni, Juyahudi giai, ku poro lembe dit i kindgi.

³⁰Man ebedo oro ario yul i ot pare m’emio ko pinje, man ejolo ceke m’ucidho i bang’e,

³¹m’eyero ko pi ker pa Mungu, m’eponjo ko gin pi Rwoth Yesu Kristu ku tegocwinye ceke, ma ng’atu moko mbe de m’ucere.