Read Alur Tic Mi Jukwenda 3 Bible Online

Tic Mi Jukwenda 3 - Alur bible

Tic Mi Jukwenda 3

¹Nie Petro giku Yohana gibeidho malu i hekalu i saa mi rwo, ma en e saa mir abung’wende.

²E ng’atu moko ma en e jarabala kud i min, jubejuyeye ku ba rupiny ku ba rupiny jukethe dhugola mi hekalu ma julwong’o Leng’ kara ekwai giramia ba ju m’ucikumondo i hekalu;

³ma kan eneno Petro giku Yohana gidhingo mondo i hekalu, epenjo ya egam giramia.

⁴E Petro giku Yohana, ma gitono wang’gi i kume, giwacu kumae, Nen bang’wa.

⁵E eciko ithe i bang’gi, ewacu nyo ebigamu gin moko i bang’gi.

⁶Ento Petro wacu kumae, Mola ma tar ku mola ma kwar de ambe ko; ento gin m’abedo ko, maeno amio iri. Ku nying Yesu Kristu ma Janazareti, wotlii.

⁷E emake ku cinge ma yor acwic, man eting’e malu: e aruca ruca nica tiende ku cogo ma ng’ut tiende de maku tego.

⁸Egam epor malu, ecungo, emaku wotho; man emondo kugi i hekalu, m’ewotho, ku por malu, ku paku Mungu de.

⁹Man dhanu ceke ginene m’ewotho ku paku Mungu de:

¹⁰e ging’eyo, nia en e ng’atu ma naka bedo pi giramia Dhugola Maleng’ mi hekalu; e gipoi igi de wang’ lii kum gin m’utimbre i kume.

¹¹E kinde m’emaku kum Petro giku Yohana, dhanu ceke giring’ni karacelo i bang’gi ma igi wang’ lii, i pondot ma julwong’o pondot pa Suleman.

¹²Man ka Petro neno maeni, edwoko lembe ni dhanu kumae, Wu dhanu pa Israel, iwu wang’ lii kum ng’atuni nedi? kadi wutono weng’wu i kumwa nedi, calu ya waketho ewotho wan ku tego mwa giwa kadi ni kum bedo mwa ma ayi Mungu ni i kume?

¹³Mungu pa Ibrahim, ku pa Isak, ku pa Yakobo de, Mungu pa kwaruwa, eyungo Jatic pare Yesu; ma wumie, wukwere bende i wang’ Pilato, kan eyenyo egonye.

¹⁴Ento wukwero Ng’atu Maleng’ ma Pwe de, wudong’ wulwong’o janek e ma jumi iwu,

¹⁵man wunego Jathek kwo; ma Mungu ketho ecer ku kind ju m’utho; wa jumulembe de kum maeni.

¹⁶Man ni kum yic mi nyinge e nyinge dwoko ng’atuni tek, ma wuneno wung’eyo de: eyo, yioyic ma ni kume e m’uketho ng’atuni doko cu ma ndhu i vutwu ceke.

¹⁷Nie, umego, ang’eyo wutime cobo, calu ma jubim mu bende gitimo,

¹⁸Ento gin ma Mungu lar unyutho ku dhu jubila ceke, nia Kristu pare bisendre, eketho etimbre kakare kumeno.

¹⁹Ka kumeno wulok cwinywu, man wulokru kendo, kara dubo mu kabre woko, kara nindo mi yepocwiny uai i vut Rwoth;

²⁰man kara eor Kristu ma yang’eketho iwu, en e Yesu:

²¹ma polo kojole be cil i nindo mi dwoko gin ceke, ma yang’ Mungu yero pire ku dhu jubila pare maleng’ ma ginuti por eca ngi.

²²Musa wacu andha kumae, Rwoth Mungu biting’o jabila iwu kud i kind juwedu, ma calu an; wubiwinjo gin ceke de i bang’e ma tek eyero iwu.

²³E gini bitimbre, nia ku ba dhanu ceke ma biwinjo jabila maeno ngo, gibinyothri ndhu kud i kind dhanu.

²⁴Eyo jubila ceke m’ugambre kum Samwil ku ju ma gilubo ng’eye de, kagi ceke ma yang’ giyero, gin bende giyero pi cenguni.

²⁵Wun wu wot jubila, man mi lembariba ma Mungu timo ku kwaruwu, m’ewacu ko ni Ibrahim kumae, I kodhini thek ceke m’i ng’om binwang’u mugisa.

²⁶Mungu m’edaru ting’o Jatic pare malu, elar eore iwu kara emi iwu mugisa, ku lokowu kubeng’wu kubeng’wu kum camuco mu.