Read Alur Tic Mi Jukwenda 5 Bible Online

Tic Mi Jukwenda 5 - Alur bible

Tic Mi Jukwenda 5

¹Ento ng’atu moko ma nyinge Anania, giku Safira ma cege, ging’iewo jupiny moko,

²man ekanu wel jupiny kucel, cege de giribri kude i lembene, man ekelo kume kucel, ekethe the tiend jukwenda.

³Ento Petro wacu kumae, Anania, Jok upong’o adunden inedi m’icwayu ko ndra ni Tipo Maleng’, m’ikanu ko kum welpiny mi ng’omi?

⁴Kinde m’eni i beng’i, nwang’u en e peri ngo? man kan idaru loke, ebedo i tego peri ngo? Iyio gino wok i adundeni pirang’o? icwayu ndra ni dhanu ngo, ento ni Mungu.

⁵E ka Anania winjo lembe nini epodho bir e cwinye kadhu ndhu; man lworo ma dit apila podho wi dhanu ceke ma giwinjo maeni.

⁶E awobi giai giboye de, gitere woko gicigiyike.

⁷Man eyenyo romo kinde mi saa adek yo ng’eye, ka cege, ma fokung’eyo gin m’utimbre ngo, umondo.

⁸E Petro wacu ire kumae, Yer ira tek wuloko ng’om ku piny mae. Man ewacu kumae, Eyo, ku piny maeno.

⁹Ento Petro wacu ire kumae, Wugewuripo lembe ya wumul ko Tipo Rwoth nedi? nen, tiend ju m’uyiko cweri gi ni dhugola, man gibiteri woko.

¹⁰E ndhu ndhu nica epodho bir etho ndhu, man gitere woko gicigiyike ba cware.

¹¹E lworo ma dit upodho wi kanisa ceke, ku wi dhanu ceke de ma giwinjo gin maeni.

¹²Man giranyutha ku musana dupa timbre kind dhanu ku cing’ jukwenda: kagi ceke de gibedo ku cwinygi m’uripo acel i pondot pa Suleman.

¹³Ento i kind dong’ dhanu m’udong’ ng’atu moko mbe ma cwinye tek m’eribre ko kugi: ento ayunga re dhanu yungogi;

¹⁴man juyic gimedri m’usagu ba Rwoth, udul jumaco ku jumamon bende:

¹⁵ketho giwodho cil ju ma kumgi lith giterogi woko i gengi, gipielogi wi kavuto ku wi par bende, kara ka Petro bekadhu, kuno nyo tipone biumo ng’atu moko m’i kindgi.

¹⁶Udul dhanu bende giai i adhura m’utieko Yerusalem, gicoko dhoggi ma gikelo ko ju ma kumgi lith, ku ju ma tipo m’ucido besendogi: e kumgi kei kubang’gi ndri.

¹⁷Ento jalam ma dit uai malu, ku ju ma gibedo gikugi ceke (ma en e pokri mi Jusadukayo), e ngiri pong’ogi

¹⁸e giketho cing’gi kum jukwenda, man gicwalugi i odkol.

¹⁹Ento malaika pa Rwoth uyabu dhugola mi odkol ku diewor, ewodhogi woko, man ewacu kumae,

²⁰Wucidh wucung i hekalu wuyer lembe ceke ni dhanu pi Kwo maeni.

²¹E ka giwinjo maeni, gimondo i hekalu ka mombwa maku thumo, giponjo de. Ento jalam ma dit uwok, ku ju ma gibedo gikugi de, man gicoko dhu dilo, ku judongo mi nyikwai Israel de, e gioro ya jugamgi i odkol jukelgi.

²²Ento asikari m’ucidho giwok ginwang’u gimbe i odkol; man giloko gidok, giyero kumae,

²³Wawok wanwang’u dhu odkol ubedo acika kubang’e, jukur de gicungo dhugola: ento ka wayabu, wanwang’u ng’atu moko mbe i ie.

²⁴Nie ka jadit mi hekalu ku julam ma dongo giwinjo lembe maeni, igi pido mumbe i kumgi maram lembene binyai ko.

²⁵E ng’atu acel ubino uyero igi kumae, Nen, dhanu ma wukethogi i odkol gini i hekalu gicungo gibeponjo dhanu.

²⁶E jadit mi hekalu kud asikari gilund gicidho, gikelogi, endre ku kero ngo; kum gilworo dhanu, gimaru canyugi ku kidi.

²⁷E ka gikelogi, gikethogi i wang’ dilo. E jalam ma dit upenjogi,

²⁸ewacu kumae, Wang’olo iwu ma tek ya kud wuponj ku nying’ maeni: nen, wuromo Yerusalem ceke ku ponji mu, wuyenyo wukel rimb ng’atuno i wiwa de.

²⁹Ento Petro giku jukwenda wagi de giloko lembe giwacu kumae, Wakoworo Mungu be ma sagu woro dhanu.

³⁰Mungu pa kwaruwa ting’o Yesu malu, ma nwang’u wunege, ma wuliere ko wi yen.

³¹En Mungu dode ku cinge ma yor acwic ya ebed Jaker ku Jalar, kara emi lokocwiny ni Israel, ku ruco dubo.

³²Wan de wa jumulembe mi ginduni; man Tipo Maleng’ bende, ma Mungu mio ni ju m’uwore.

³³Ento joca, ka giwinjo maeni, ethumo adundegi, e giyenyo gineggi.

³⁴Ento ng’atu acel ma Jafarisayo ai malu i kind dilo, ma nyinge Gamaliel, m’e jaeuthecik, m’e ng’atu ma pire ber ni dhanu ceke, man eng’olo ya gikogiketh joca cen tundu.

³⁵Man ewacu igi kumae, Wu dhanu pa Israel, wubed ku weng’wu i kumwu giwu kum joni, ni gin ma wuyenyo timo.

³⁶Kum nwang’u ka fodi ceng’ maeni kuwok ungo Theuda wodhre, m’eketho pire yik ya en e m’e en; e dhanu moko, ma va dak ang’wen, ging’ino i kume: e junege; man ju m’uwore ceke, julalugi, e gidoko yaca.

³⁷Yo tok ng’atuni ke, Yuda ma Galilaya i ceng’ ma jugoro nying’ ewodhre, man ecoko dhanu kucel i kume: en bende erwinyo; e ju ma giwore ceke, julalugi nge nge.

³⁸E kawono abeyero iwu kumae, Kud wutim gin moko kum joni, wuwekgi: kum tek lembapora maeni kadi tic maeni ai ba dhanu, ebirany:

³⁹ento tek eai ba Mungu, wubicopo ranjugi ngo; kuno nyo jubinwang’u ya wubetimo ali cil kum Mungu.

⁴⁰Man giwinjo dwande: e ka gilwong’o jukwenda i bang’gi, gidong’ gifodogi afoda man ging’olo igi ya ku giyer ku nying’ Yesu, e giwekogi gicidho.

⁴¹E ka kumeno giai kud i dilo, ma anyong’a negogi kum jukwanu ya giromo sendri mai jujwigo kogi kum Nying’ maeni.

⁴²E ku ba rupiny ku ba rupiny, i hekalu kud i udigi de, giweko ponjo ku yero de ki ngo ya Yesu en e Kristu.