Read Alur Tic Mi Jukwenda 7 Bible Online

Tic Mi Jukwenda 7 - Alur bible

Tic Mi Jukwenda 7

¹Man jalam ma dit uwacu kumae, Gin maeni kumeno?

²Man eloko kumae, Umego ku wego de, wukowuwinji: Mungu mi dwong’ unyuthre ni wegwa ma Ibrahim, kan eni i Mesopotamia, ka fodi ebedo i Haran ungo,

³man ewacu ire kumae, Dong’ iai woko kud i ng’om ma thu, kud i kind jupeu de, man ibin i ng’om m’abinyutho iri.

⁴E elund eai kud i ng’om mi Jukaldayo, man ebedo i Haran: ku kuca, ka won utho, Mungu dake i ng’ombuni, ma wubedo i ie kawono:

⁵man emio ire aba i ie ngo, ungo, ma romo tiende de ngo: man eng’olo ya ebimie ire ni jupiny pare, ni nyikwaye de yo ku ng’eye, ma fodi nyathin pare de mbe.

⁶E Mungu wacu calu mae, nia nyikwaye bibedo i ng’om ma nyo ci, nia jubidwokogi de ni ng’eca, man jubitimogi rac rundi dak ang’wen.

⁷E Mungu wacu kumae, Abipoko lembe mi thek ma gibedo ng’eca igi: e yo ng’eye gibiai woko, man gibitimo ira kakeni.

⁸Man emio ire lembariba mi yaa: ka kumeno Ibrahim unyolo Isak, man i ceng’ mir aborane etimo yaa i kume; Isak de nyolo Yakobo, Yakobo ke nyolo kwaru apar wi ario.

⁹Man kwaru, ma nyeko timogi kum Yusuf, ging’iewe i Misiri; e Mungu de ni i bang’e,

¹⁰elare de kud i can pare ceke, man emio ire bero ku rieko i wang’ Farao m’ubimo mi Misiri; man edwoke ni jabim wi Misiri ku wi ot pare de ceke.

¹¹Nie ndru podho i Misiri ku Kanan ngung’, ku can ma dit. Giracama de kwaruwa nwang’u ngo.

¹²Ento ka Yakobo winjo ya cam nuti i Misiri, elar eoro kwaruwa wang’ acel.

¹³Mir arionde Yusuf ung’eire ni utumin; man thek pa Yusuf ung’eire ni Farao.

¹⁴E Yusuf uoro, man elwong’o Yakobo ma won mire ubin i bang’e, ku jupagi ceke, dhanu pier abiro wi abic.

¹⁵E Yakobo loro piny i Misiri; e egam etho, giku kwaruwa de;

¹⁶man juyeyogi juterogi kuca i Cekem, e jukethogi i odliel ma Ibrahim ung’iewo ku jupiny mi mola ma tar ba wot Emor ma i Cekem.

¹⁷Ento ka nindo ma lembang’ola ma yang’ Mungu ng’olo ni Ibrahim udhingo timbre, dhanune ginyai gimedri i Misiri,

¹⁸rama ubimo mange camu ko ker i Misiri, m’ung’eyo Yusuf ungo.

¹⁹Ng’atuca bombo thek mwa, man etimo rac kum kwaruwa, ya gibai mukere migi woko kara ku gibed kwo.

²⁰I nindo nica junyolo Musa, man kite leng’ mumbe; e jugwoke i ot pa won dwi adek:

²¹e ka jubaye, nya Farao uting’e, man etunge ka wode ma dhe.

²²Man juponjo Musa ku rieko ceke mi Jumisiri; ebedo dwong’ de i lembe pare i tic pare de.

²³Ento kinde ma rundi pare maku doko pier ang’wen, lembe wok i adundene ya elieu jupagi ma gi nyithi Israel.

²⁴Man kan eneno ng’atu acel ma jutime rac, egam elare, man eculo kwor pi ng’atu ma jubesendo, egam enego Jamisiri:

²⁵e ie wacu ya jupagi ging’eyo nia Mungu bemio igi both ku cinge en e Musa; karaman ging’eyo ngo.

²⁶Urwone ewok i bang’gi kinde ma gibenyego, man eyenyo etheggi, ewacu kumae, Paco, wun umego; wutimo rac ba juwedu nedi ma ng’atuman utimo ba wadi man ba wadi e?

²⁷Ento ng’atu acel m’utimo rac kum wadi ucwale mire cen, ewacu kumae, Ng’a m’uketho idok jabim i wiwa ku japoklembe de?

²⁸Iyenyo inega, pami nyaworo inego Jamisiri?

²⁹E Musa piei kum lembe nini, man edoko jabedo i ng’om Midiani, ka m’enyolo ie wote ario.

³⁰E ka rundi pier ang’wen uthum malaika wok i bang’e i yamba mi got Sinai, i lebmac ma i yen m’udinyo.

³¹E kinde ma Musa nene, ie wang’ lii kum giranena maeno: e kan ecoro ceng’ni nineno, dwand Rwoth ubino kumae,

³²An a Mungu pa kwaru, Mungu pa Ibrahim, man pa Isak, man pa Yakobo. E kum Musa miel, man ebedo ku tegocwiny ungo m’enen ko.

³³Man Rwoth uwacu ire kumae, Gony wara woko kud i tiendi: kum ka m’icungo i ie en e ng’om ma leng’.

³⁴Aneno can mi dhanu para andha ma gini i Misiri, man awinjo ba cur migi, e aloro piny nigonyogi: kawono koibin, abiori i Misiri.

³⁵Musa maeni ma gikwere, giwacu kumae, Ng’a m’uketho idok jabim ku japoklembe de? e en nini e ma Mungu ore nibedo jabim ku jalar bende ku cing’ malaika m’uwok i bang’e i yen m’udinyo.

³⁶Ng’atuni e m’utelo wigi woko, ku yo ng’ei musana ku giranyutha de m’etimo i Misiri, man i nam Makwar, kud i yamba de rundi pier ang’wen.

³⁷En e Musa maeno m’ewacu ni nyithindho pa Israel kumae, Mungu biting’o iwu jabila kud i kind juwedu, ma calu an.

³⁸Maeni en ma yang’ eni i kanisa i yamba giku malaika m’uweco i bang’e i got Sinai, man ku kwaruwa bende: m’egamu wec mi kwo ya emi iwa:

³⁹kwaruwa giyio ngo ya gibed wor ire, ento gicore cen, e gilokri ku i adundegi ni Misiri,

⁴⁰giwacu ni Harun kumae, Thiedh iwa’mungu ma bitelo wiwa: kum Musa maeni, ma naka telo wiwa m’uwodhowa kud i ng’om Misiri, wang’eyo gin m’utimbre i kume ngo.

⁴¹Man i ceng’ maeca githiedho nyathi dhiang’, e gikelo lam ni ayi gin m’acwia nica, man gifoiri kum tic mi cing’gi.

⁴²Ento Mungu lokre, man ekunogi ya gitim ni udul mi polo; calu jugoro i kitabu mi jubila kumae, Wumio ira lim m’anega ku lam de I yamba nindo pier ang’wen, E juot pa Israeli?

⁴³Man wuting’o hema pa Molok, Ku cero mi mungu ma Refan bende, Ayi gin ma wutimo ya wurwo i bang’gi: E abiterowu cen ng’ei Babeli.

⁴⁴Kwaruwa gibedo ku hema mi lembatuca i yamba, cil calu eng’olo m’ewacu ni Musa, ya etime calu ayi m’eneno.

⁴⁵Ma kwaruwa bende, i nindo migi, gikelo i ie giku Yocuwagi ka gimwonyo ng’om mi thek, ma Mungu riemo woko kud i wang’ kwaruwa, cil i ceng’ pa Daudi;

⁴⁶m’unwang’u bero i wang’ Mungu, man epenjo ya enwang’ kabedo ni Mungu pa Yakobo.

⁴⁷Ento Suleman e m’udong’ ugomo ot ire.

⁴⁸Ento Ng’atu ma Malu Ngbir bedo i udi ma jugomo ku cing’ ungo; calu yang’ jabila wacu kumae,

⁴⁹Polo en e komker para, Ng’om ke kom mi tienda: Ot manedi ma wubigomo ira? Rwoth uwacu: Kadi kani ma kayom para?

⁵⁰Cinga cwio gin maeni ceke en ungo?

⁵¹Wun ma ng’utwu cikre ma wukutimo yaa ngo kum adundewu kum ithwu de, wucero Tipo Maleng’ thiri thiri: calu ma yang’ kwaruwu gibegitimo, e wun bende wutimo kumeca.

⁵²Jubila makani ma yang’ kwaruwu gikunyayu ragedo i kumgi ngo? man ginego ju ma gilar ginyutho kabino pa Ng’atu ma Pwe; ng’atu ma kawono wudoko jucibne ku junekne;

⁵³wun ma wujolo cik calu malaika ng’olo, ere wuwore ngo.

⁵⁴E ka giwinjo gin maeni ethumo adundegi, man ging’enjo lakgi i kume.

⁵⁵Ento en, ma Tipo Maleng’ urome, eneno i polo tel, man eneno dwong’ pa Mungu, ku Yesu de m’ucungo yo ku cing’ Mungu ma yor acwic,

⁵⁶man ewacu kumae, Nen, aneno polo yabre, ku Wod dhanu m’ucungo acunga yo ku cing’ Mungu ma yor acwic.

⁵⁷Ento gin gikok ku dwandgi ma tek, giculo ithgi de, e gikonjri i kume vur;

⁵⁸e gibaye woko kud i adhura, man gicanye ku kidi: jumulembe de giketho kendi migi the tiend jalawobi ma nyinge Saul.

⁵⁹E gicanyu Stefano ku kidi, m’ebelwong’o Rwoth, ewacu kumae, Rwoth Yesu, joi tipona.

⁶⁰E erum piny, man ekok ku dwande ma tek kumae, Rwoth, kud iketh dubo maeni i kumgi. E kinde m’eyero maeni, enindo.