Read Alur Tic Mi Jukwenda 8 Bible Online

Tic Mi Jukwenda 8 - Alur bible

Tic Mi Jukwenda 8

¹Saul de yio ya etho. Ceng’ nica ragedo ma dit uwok kum kanisa ma ni i Yerusalem; e kagi ceke julalugi nge nge i ng’om Yahudi man Samaria, jukwenda re m’udong’.

²E dhanu ma lworo Mungu giyiko Stefano, man giketho ywak ma dit i wie.

³Ento Saul unyotho kanisa, m’emondo ko ku ba udi ku ba udi, m’eywayu ko co ku mon de eketho gi i odkol.

⁴Ka kumeno ju ma julalugi nge nge gicidho ku yero lembe nini.

⁵E Filipo loro piny i adhura ma Samaria, man eyero igi pi Kristu.

⁶E udul dhanu giciko ithgi ku cwinygi m’uripo acel ni lembe ma Filipo yero, ka giwinjo, gineno ku giranyutha m’etimo de.

⁷Kum tipo m’ucido ma ni ii dhanu dupa, giwok woko kud i igi, ma gikok akoka ku dwandgi ma tek: ju ma kumgi tho nding’ de dupa, ku weg abala mi tielo, kumgi kei.

⁸E mutoro ma dit ubedo nuti i adhura maeno.

⁹Nwang’u ng’atu acel nuti, ma nyinge Simon, ma naka betimo ajoga i adhura nica, eketho i dhanu ma Samaria de wang’ lii, m’ekethre gire nia en e ng’atu ma dit:

¹⁰ma dhanu ceke de giciko ithgi i bang’e, dhanu ma sai ku dhanu ma pigi yik de, giwacu kumae, Ng’atuni en e tego maeno pa Mungu ma julwong’o Dwong’.

¹¹E giciko ithgi i bang’e, kum nindo dupa eketho igi wang’ lii kud ajoga pare.

¹²Ento ka giyio Filipo m’ubeyero lembanyong’a mi ker pa Mungu ku nying’ Yesu Kristu, e gimaku baputisi, co ku mon de.

¹³Simonne bende eyio: e kan emaku baputisi, gidong’ gibedo giku Filipo; e kan ebeneno giranyutha ku musana ma dit de m’utimbre, ie wang’ lii.

¹⁴Nie ka jukwenda ma ni i Yerusalem giwinjo nia Samaria jolo lembe pa Mungu, gioro Petro giku Yohana i bang’gi:

¹⁵ma, ka giloro piny, gifwo pigi, kara gijol Tipo Maleng’:

¹⁶kum fodi epodho wi jumoko ngo m’i kindgi: fodi gimaku baputisi ku nying Rwoth Yesu kende.

¹⁷E gilund giketho cing’gi i wigi, man gijolo Tipo Maleng’.

¹⁸Nie ka Simon uneno ya Tipo Maleng’ umire ni kum cing’ ma jukwenda ketho, ewodho igi sente,

¹⁹ewacu kumae, Mi tego maeni ira bende, kara ng’atu ma tek aketho cinga i kume ejol Tipo Maleng’.

²⁰Ento Petro wacu ire kumae, Mola ma tar peri nyothri ko giri, kum iwacu nyo giramia pa Mungu junwang’u ku sente.

²¹Kaperi mbe kadok kume moko de i lembe maeni: kum adundeni bedopwe ngo i wang’ Mungu.

²²Ka kumeno lok cwinyi kum dubo peri maeni, man irwo ni Rwoth, kuno nyo jubiweko pidoic mir adundeni woko iri.

²³Kum aneno nia ini i ulecu mi gin ma kec man i twic mi camuco.

²⁴E Simon udwoko lembe ewacu kumae, Wurwo pira ba Rwoth, kara gin ma wuwacu no moko kud uwok i kuma.

²⁵Ka kumeno joni, ka gidaru tuco man giyero lembe pa Rwoth, e gidok i Yerusalem, man giyero lembanyong’a ma juboth ko i pacu dupa mi Jusamaria.

²⁶Ento malaika pa Rwoth uyero ni Filipo, ewacu kumae, Ai malu, ici yor ariwa ma piny ba yo m’uai Yerusalem uloro Gaza: ng’ombe ng’om ngele.

²⁷E eai malu ecidho: nen, Jaethiopia, en e jamugumba ma won ng’ol ma dit the Kandake ma rwoth ma dhaku wi Juethiopia, m’ebedo wi piny m’akana pare ceke, m’ebino de nirwo i Yerusalem;

²⁸man ebedwogo adwoga ebedo de i magali pare, man ebesomo kitabu pa jabila ma Isaya.

²⁹E Tipo wacu ni Filipo kumae, Cor ceng’ni, man iwoth kum magali maeni.

³⁰E Filipo ringo i bang’e, ewinjo ebesomo Isaya ma jabila, e epenjo kumae, Ing’eyo gin m’isomo no?

³¹Edwoko lembe kumae, Acopo nenedi, tek ng’atu moko kutelo wia ngo? E ekwayu Filipo idh gibed gikude.

³²Nwang’u kaka lembagora pa Mungu m’esomone e eni, Jupeye calu rombo ba kathum; Man calu nyathi rombo bedo ling’ i wang’ junyaryuke, En de kumeno ealu dhoge ngo:

³³I jwik pare pokolembe pare kabre woko: Ng’a bikoro pi dhanum’utuk i kume? Kum kwo pare jukabu woko kud i ng’om.

³⁴E jamugumba loko lembe ni Filipo ewacu kumae, Akwei, jabila yero maeni pi ng’a? pire gire, kadi pi ng’atu mange?

³⁵E Filipo alu dhoge, man etheko kum lembagora maeni, eyero ko ire pi Yesu.

³⁶Man ka gibecidho i yo, gitundo kum pi moko; e jamugumba wacu kumae, Nen, pi eni; girang’o m’ucera ku maku baputisi?

³⁷E Filipo wacu kumae, Tek iyio kud adundeni ceke icopo. Man eloko lembe ewacu kumae, Ayio, nia Yesu Kristu en e Wod Mungu.

³⁸E eng’olo nia magali ukoucungi: e Filipo giloro i pi, giku jamugumba; man emie baputisi.

³⁹E kinde ma giai kud i pi, Tipo Rwoth urwinyo ku Filipo biti; e jamugumba dong’ unene kendo ngo, kum ecidho i yo pare ma anyong’a nege.

⁴⁰Ento judong’ junwang’u Filipo i Azoto: e kan ebekadhu akadha eyero lembanyong’a ma juboth ko i adhura ceke ram etundo ko Kaisaria.