Read Alur Jurumi 1 Bible Online

Jurumi 1 - Alur bible

Jurumi 1

¹Paolo, jamiru pa Yesu Kristu, ma julwong’e ebed jakwenda, ma jukoye pi lembanyong’a ma juboth ko pa Mungu,

²m’elar eng’olo ni kum jubila pare i

³pi Wode, ma junyolo mi kodhi Daudi calku kum,

⁴m’enyuthre ku tego ya en e Wod Mungu, calku tipo mi leng’cwiny, ni kum cer ma kind ju m’utho; ndhu Yesu Kristu Rwoth mwa,

⁵ma ni kume wanwang’u bero man kwenda, ni woro mi yioyic i kind thek ceke, pi nyinge;

⁶i kind joni wun bende, julwong’owu ya wubed pa Yesu Kristu:

⁷ni dhanu ceke ma gini i Rumi, ma jumer pa Mungu, ma julwong’ogi gibed jumaleng’: Bero iwu man kwiocwiny m’uai ba Mungu Wegwa man Rwoth Yesu Kristu.

⁸Ku kwong’a, afoyo Mungu para ni kum Yesu Kristu piwu ceke, kum yioyic mu yik i ng’om ngung’.

⁹Kum Mungu m’atimo ire yor i cwinya i lembanyong’a ma juboth ko pa Wode, en e jamulembe para, maram aweko lwong’o ko nyingwu ki ngo i rwo para thiri thiri

¹⁰m’akwayu ko kwac, nia tek ebedo miero ira kawono ku yo moko ma naka k’emiero ngo ku yeny ma Mungu yenyo ya abin i beng’wu.

¹¹Kum ava nenowu benega dit, kara ami iwu giramia moko mi tipo, kara lembe cung i iwu;

¹²lembene eni, kara an ku wun de wajukra i kumwu, ng’atuman kum yioyic pa wadi man kum pa wadi, mu ku para de.

¹³Man ayenyo ngo nik wubed cobo, umego, nia wang’ udul akeco ya abin i beng’wu (man cil ku kawono de ecere ira), kara abed ku nying’ moko m’acego i kindwu bende, cil calu ma i dong Thekdhanumange.

¹⁴An a jarabanja mi Juyunani ku mi ju ma sai, mi jurieko ku mi jukusegu bende.

¹⁵Kumeno, ku tego m’i ia ceke, abedo ayika ni yero lembanyong’a ma juboth ko iwu bende ma wuni i Rumi.

¹⁶Kum lewic unega ngo kum lembanyong’a ma juboth ko: kum en e tego pa Mungu mi both ni dhanu ceke kubang’gi kubang’gi m’uyio; ku kwong’a ni Jayahudi, man ni Jayunani bende.

¹⁷Kum bedopwe pa Mungu nyuthre i ie uai ba yioyic utundo kum yioyic; calu egore kumae, Ento weg bedopwe bikwo ni kum yioyic.

¹⁸Kum kwinyo pa Mungu ai kud i polo unyuthre kum gin ceke ma ayi Mungu mbe i kume man gondri ceke de mi dhanu, m’ucero lemandha i gondri;

¹⁹kum gin pa Mungu ma jung’eyo enyuthre i igi; kum Mungu nyuthe igi.

²⁰Kum gin pare ma nen ungo ugambre i kacwic mi ng’om dong’ nen terere, m’eng’eire ni kum gin m’ucwire, cil tego pare mi nja man rucwic; kara kalokolembe m’i wigi bed umbe igi:

²¹kum, gin ma ging’eyo Mungu, giyunge ngo calu en e Mungu, kadok afoya de gifoye ngo; ento gidoko jukuhaya i lembapora migi, man adundegi ma kite mbe yutho.

²²I tuco ma gituco ko gigi ya gi riek, gidoko jukusegu,

²³man giweko dwong’ pa Mungu ma nyothre ngo pi giracwia mir ayi dhanu ma nyothre, ku mi winyo, ku mi yedi ma tiendgi ang’wen ang’wen, ku mi gin ma lak i ng’om de.

²⁴Kum kumeno Mungu wekogi i awanya ma rac mir adundegi ni sasa, kara gibed umbe yung mi kumgi i kindgi gigi:

²⁵kum giloko lemandha pa Mungu ku ndra, man girwo ni giracwia pa Mungu gitimo ire de kaka Jacwic, ma Jamugisa mi nja. Amen.

²⁶Kum lembe nini Mungu wekogi ni awanyakum mi sasa: kum mon migi bende giloko tic mi kurajo ni ma mi kurajo ngo:

²⁷man co bende kumeno, ma giweko tic mi mon ma kurajo, gicwaku mac ther awanya ma rac migi ng’atuman ku wadi man ku wadi, ma co ku co wadi gitimo ko gin m’umaku piny ungo, man ginwang’u cul mi kier migi m’uromogi i igi gigi.

²⁸Man cil calu gikwero bedo ku Mungu i ng’eyong’ec migi, Mungu kuriogi ni pidoic ma rac, ma gitimo ko gin ma maku ku jutim;

²⁹ma gipong’ ku gondri ceke, ku dubo, ku ketho cwiny hai kum piny, kud akece; gipong’ ku kumira, ku nego nek, ku dhau, kud awondi, kud adegi; juyer nying’ ma kwe kwe,

³⁰juyer nying’ ma rac, weg adegi ni Mungu, jucac, ju ma tingri, ku jukulula, ku jutheb dubo, ku ju ma juco ni junyodo migi,

³¹ma ng’eyong’ec umbe kugi, ku jung’eny lembariba, ma mer mi wat umbe kugi, ma kisa mbe kugi:

³²gin, ma ging’eyo le mbapoka pa Mungu, ya ju m’ucikutimo wagi gin ma kumeni giromo ku tho, gikutimo wagi gin maeni atima kende ngo, ento giyio karacelo ku ju m’ucikutimogi bende.