Read Alur Jurumi 10 Bible Online

Jurumi 10 - Alur bible

Jurumi 10

¹Umego, yeny mir adundena man kwayukwac para ma ba Mungu en e pigi, ya gibothi.

²Kum anyutho pigi nia gibedo kud amora pi Mungu, endre calku ng’eyong’ec ungo.

³Kum ma fodi gi cobo kum bedopwe pa Mungu, ma gibeyenyo de ya giketh migi e m’ucungi, gidwokri gigi wor ungo ni bedopwe pa Mungu.

⁴Kum Kristu en e kajik mi cik ni bedopwe ni dhanu ceke m’uyio kubang’gi kubang’gi.

⁵Kum Musa goro ya ng’atu m’utimo bedopwe ma en e mi cik ebibedo ni kum maeno.

⁶Endre bedopwe ma en e mi yioyic uwacu kumae, Kud iwac ku i adundeni kumae, Ng’a ma biidho i polo? (lembene eni, nikelo Kristu piny:)

⁷kadi, Ng’a ma biloro piny i vur ma there mbe? (lembene eni, niting’o Kristu ku kind ju m’utho).

⁸Ento ewacu ang’o? Lembe maeni ni kago kudi, i dhogi, man i adundeni: lembene eni, lembe mi yioyic, ma wayero:

⁹kum tek ibituco ku dhogi ya Yesu en e Rwoth, man ibiyio kud adundeni nia Mungu ting’e ku kind ju m’utho, e ibiboth:

¹⁰kum kud adunde dhanu yio ni bedopwe; man ku dhok lembatuca jutuco ni both.

¹¹Kum lembagora pa Mungu wacu kumae, Ng’atu ma tek uyie jubinyayu lewic i wie ngo.

¹²Kum tung’ tung’ umbe kind Juyahudi ku Juyunani: kum Rwoth acel e ma Rwoth mi ceke man ke elony ni ceke m’ulwong’e;

¹³kum, Ng’atu ma tek bilwong’o nying Rwoth ebiboth.

¹⁴E gibilund lwong’e nenedi ma fodi gikuyie ngo? man gibiyie nenedi ma fodi gikuwinje ngo? man gibiwinjo nenedi ma jayero mbe?

¹⁵man gibiyero nenedi, tek juorogi ngo? cil calu egore kumae, Ei karamb ber mi tiend ju m’ukelo lembanyong’a ma juboth ko mi gin ma ber!

¹⁶Ento kagi ceke giciko ithgi kum lembanyong’a ma juboth ko ngo. Kum Isaya wacu kumae, Rwoth, ng’a m’uyio rwonglembe mwa?

¹⁷Kum kumeno yioyic uwok ni kum winjo, winjo ke ni kum lembe pa Kristu.

¹⁸Ento awacu kumae, Giwinjo ngo? Eyo, andha, Dwandgi meny i ng’om ceke, Lembe migi de tundo cil i kajik mi ng’om.

¹⁹Ento awacu kumae, Israel ung’eyo ngo? Ku kwong’a Musa wacu kumae, Abinyayu ngiri i iwu kum maeno ma thek ungo, Ku thek de ma ng’eyong’ecne mbe abinyayu ng’ecwiny i iwu.

²⁰Man Isaya e won tegocwiny ma dit, man ewacu kumae, Anwangra ku ju ma giyenya ngo; Anyuthra ni ju m’upenja ngo.

²¹Ento pi Israel ewacu kumae, Ceng’ du ari nithang’u cinga ni ju ma gi juco man jupiem.