Read Alur Jurumi 11 Bible Online

Jurumi 11 - Alur bible

Jurumi 11

¹Ka kumeno awacu kumae, Mungu coro dhanu pare ceni? Awene. Kum an bende an a Jaisraeli, mi kodhi Ibrahim, mi suru pa Benyamin.

²Mungu coro dhanu pare m’elar eng’eyogi cen ungo. Kadi wung’eyo ngo gin ma lembagora pa Mungu wacu pir Elia? maram ekwayu ko Mungu kum Israel kumae:

³Rwoth, ginego jubila peri, gimugo pemblam peri; man adong’ akenda, man giyenyo ka kwona.

⁴Ento lembadwoka pa Mungu wacu ire nik ang’o? Dhanu m’udong’ ira gira gi rubanga abiro, ma fodi gikurumo conggi ngo ni Bal.

⁵Cil kumeno i nindo ma kawono nini bende donge m’udong’ calku goyo nying’ mi bero nuti.

⁶Ento tek en e ni kum bero, nwang’u en e ni kum tic kendo ngo: kum tek en e kumeni ngo nwang’u bero en e bero kendo ngo.

⁷Ka ke ang’o? Maeno ma Israel ubeyenyo, maeno enwang’u ngo; ento ju ma jugoyo nying’gi ginwang’e man donge m’udong’ judwoko cwinygi nwang’:

⁸calu egore kumae, Mungu mio igi tipo mi rip rip, wang’ kara ku ginen, man ith kara ku giwinji, cil i ceng’ maeni nini.

⁹Man Daudi wacu kumae, Dong’ mesa migi dok ni uwic, man ngbak, Ku gin ma redhojo, ku cul de igi:

¹⁰Dong’ wang’gi yuthi, kara ku ginen, Man igung’ ng’eigi piny thiri thiri.

¹¹Ka kumeno awacu kumae, Gikier kara gipodhi? Awene: ento ni kum podho migi both uwok ni Thekdhanumange, kara enyai ngiri i igi.

¹²Nie tek podho migi en e lonyo mi ng’om, man ruvwa migi de lonyo ni Thekdhanumange; pong’ migi sagu dit ungo?

¹³Ento ayero iwu wu ju ma wu Thekdhanumange. Kum kumeno kum an a jakwenda mi Thekdhanumange, ayungo tic para;

¹⁴tek ku yo moko acopo ketho ngiri neg ju ma wa kum acel wakugi, man kara abodh jumoko m’i kindgi.

¹⁵Kum tek cor ma jucoro kogi cen en e pot ma jupoto ko ng’om, joi ma jujolo kogi ke bibedo girang’o, ndhu kwo ngo m’uai ba ju m’utho?

¹⁶Man tek cam ma kwong’a bedo leng’, cam dho bende bedo kumeno.

¹⁷Ento tek jange moko juturo woko, man in, ma in ulemo m’i thim, juroi i kindgi, man macen wudoko jurib wukugi mir ulag mi mio mir ulemo;

¹⁸kud iluli kum jange: ento tek iluli, en e in ungo m’uyeyo ulage ento ulage re m’uyeyo in.

¹⁹Ka kumeno ibiwacu kumae, Jange juturo woko, kara juroya i ie.

²⁰Ber; juturo gi woko ni kum yioyic migi m’umbe, man ni kum yioyic peri icungo. Kud ibed ku pidoic mi tingri, endre ilwor:

²¹kum tek Mungu weko jange ma dhe ngo, e ebiweko in de ngo.

²²Ka kumeno wunen bero ku kwaya pa Mungu: yo ba ju m’upodho, kwaya; endre yor i beng’i, bero pa Mungu, tek ibedo asu i bero pare: tek kumeno ngo e in bende jubitong’i.

²³Man joca bende, tek gibedo asu ngo i yioyic migi m’umbe, jubiroyogi i ie: kum Mungu copo royogi i ie kendo.

²⁴Kum tek jutong’i woko kud i maeno ma en e ulemo m’i thim ma ma dhe, man juroi tung’ ku ma dhe i ulemo ma ber; maeni ma gi jange ma dhe, jubiroyogi i ulemo migi gigi ma sagu dit ungo?

²⁵Kum ayenyo ngo, umego, ya wubed cobo ni giramung’a maeni, kara kud wubed riek i weng’wu giwu, nia ng’et nwang’cwiny upodho wi Israel, cil ma pong’ mi Thekdhanumange wok ko;

²⁶man ku meno Israel ceke biboth: cil calu egore kumae, Jagony bibino m’ebiai i Sayuni; Ebikabu gin ma ayi Mungu mbe i kume kum Yakobo:

²⁷Man maeni en e lembariba para igi, Kinde m’abikabu dubo migi woko.

²⁸Man pi lembanyong’a ma juboth ko, gi judegi piwu: endre pi goyo nying’, gi jumer pi kwaru.

²⁹Kum giramia ku lwong’o pa Mungu lokri mbe kude.

³⁰Kum calu wun yang’ wu juco ni Mungu, ento kawono wudaru nwang’u kisa ni kum camuco migi,

³¹cil kumeni joni bende kawono gi juco, kara ni kum kisa m’unyuthre iwu gin bende kawono ginwang’ kisa.

³²Kum Mungu ciko ceke karacelo ni camuco, kara kisa nege kum ceke.

³³Ei karamb thuth mi lonyo mi rieko ku ng’eyong’ec pa Mungu mire ma! karamb pokolembe pare ma yenjre ngo, man yo pare de ma lure ngo!

³⁴Kum ng’a m’ung’eyo pidoic pa Rwothi? kadi ng’a ma japorlembe pare?

³⁵kadi ng’a ma lar mio ire, man ebicule ire kendo?

³⁶Kum gin ceke ai i bang’e, man ni kume, man ire. Dwong’ ma rondo ku rondo ubed ire. Amen.