Read Alur Jurumi 12 Bible Online

Jurumi 12 - Alur bible

Jurumi 12

¹Ka kumeno, umego, akwayuwu ku kisa pa Mungu, ya wuthier kumwu ubed ni lam ma kwo, ma leng’, ma yire ni Mungu, ma en e rwo mu mi tipo.

²Man kud wuporu ku ng’om maeni: endre wubed ma kothwu lokre ni kum dwoko pidoiwu nyen, kara wung’ei yeny ma Mungu yenyo m’e ber m’e yire de m’e cu ma ndhu de.

³Kum ayero, ni kum bero m’umire ira, ni dhanu ceke ma ni i kindwu kubang’gi kubang’gi, ng’atuman ie kud upid pire gire ma sagu ma maku ie pidi; ento ie pid kumeni calu pidoie bedo nger, calu mukero mi yioyic ma Mungu daru mio ni dhanu ceke kubang’gi kubang’gi.

⁴Kum cil calu wabedo ku wathkum dupa i kum acel, man wathkum ceke tic migi acel ungo:

⁵kumeni wan, ma wa dupa, wa kum acel i Kristu, man wan ceke wa wathkum ng’atuman pa wadi man pa wadi.

⁶Man ma wabedo ku giramia ma tung’ tung’ calku bero maeni m’umire iwa, tek en e lembila, dong’ wacu calku yioyic maka mwa;

⁷kadi timotim, dong’ wamira giwa ni timotim mwa; kadi ng’atu m’uponjo de, ni ponji pare;

⁸kadi ng’atu m’ujuko juk de ni jukojuk pare: ng’atu m’umio de, dong’ etime k’abamba; ng’atu m’ubimo bim de, ebim kud amora; ng’atu ma kisa nege de, enege k’anyong’a.

⁹Dong’ mer ubed umbe umbili. Dag hai maeno m’e rac; mok kum maeno m’e ber.

¹⁰I mer mir umego wumeru ku ber ng’atuman ku wadi man ku wadi; i lembe mi yung dong’ ng’atuman uting’ wadi ma sagu en;

¹¹i amora i molkum ungo; i yauni mi tipo; ma wubetimo ko ni Rwoth,

¹²ma anyong’a benegowu i genogen; ma wutwio ko cwinywu i masendi; ma wubedo ko asu i rwo;

¹³ma wukony ko jumaleng’ ku canpiny m’unegogi; ma wugwok ko welo ber.

¹⁴Mi mugisa ni ju m’unyayu ragedo i kumwu; mi mugisa, man kud wukwong’ kwrong’.

¹⁵Anyong’a negwu ku ju ma anyong’a negogi; wuywak ku ju m’uywak.

¹⁶Wubed ma pidoiwu ripo acel man kum wadi man kum wadi. Kud wuketh pidoiwu kum gin ma dit, endre iwu pid pi gin ma nweng’. Kud wubed riek i weng’wu giwu.

¹⁷Kud wucul wang’ gin ma rac ni ng’atu moko. Iwu pid pi gin ma ber i wang’ dhanu ceke.

¹⁸Tek ecopre, calu eni i iwu, wubed ma cwinywu kwio ku dhanu ceke.

¹⁹Jumer, kud wucul kwor mi kumwu giwu, ento wuwek kaka ni kwinyo pa Mungu: kum egore kumae, Culo kwor en e para; abiculo an, Rwoth uwacu.

²⁰Ento tek jadegini kec ubenege, mi ire cam; tek rieu unege, mi emadhi: kum i tim m’itimo ko kumeni ibicoko cukmac i wie.

²¹Tic ma rac kud uloi, endre isag tic ma rac ku bero.