Read Alur Jurumi 15 Bible Online

Jurumi 15 - Alur bible

Jurumi 15

¹Nie wan ma wa tek maku wayei mulima mi ju ma ng’ic, man ku wanyai mutoro i iwa giwa.

²Ku ba dhanu ceke m’i kindwa dong’ ng’atuman unyai mutoro i wadi pi maeno m’e ber, mi teng’oteng’.

³Kum Kristu bende nyayu mutoro i ie gire ngo; ento, calu egore kumae, Cac mi ju m’ucayu in upodho i wia.

⁴Kum gin ma yang’ ugore egore pi ponji mwa, kara ni kum twiocwiny man ni kum jukojuk mi lembagora pa Mungu wabed ku genogen.

⁵Nie Mungu ma won twiocwiny ku jukojuk umi iwu ya wubed ku pidoic acel ng’atuman ku wadi man ku wadi calku Kristu Yesu:

⁶kara ku cwi nywu m’ucungo acel man ku dhogwu acel wuyung Mungu ma won Rwoth mwa Yesu Kristu.

⁷Kum kumeno wujolu cil calu Kristu bende jolowu, ni dwong’ pa Mungu.

⁸Kum ayero nia Kristu judatu dwoke ni jatim mi yaa pi lemandha pa Mungu, kara edwok lembang’ola m’umire ni wegwa tek,

⁹man kara Thekdhanumange yung Mungu pi kisa pare; calu egore kumae, Pi maeni abituci i kind Thekdhanumange, Man abiwero ni nyingi.

¹⁰Man kendo ewacu kumae, Anyong’a negwu, wu Thekdhanumange, karacelo ku dhanu pare.

¹¹Man kendo kumae, Wupak Rwoth, wu Thekdhanumange ceke; Man dong’ dhanu ceke gipake.

¹²Man kendo, Isaya wacu kumae, Ulag Yese bibedo nuti, Man ng’atu ma biwok nibimo wi Thekdhanumange; Thekdhanumange de bigeno i kume.

¹³Nie dong’ Mungu mi genogen upong’wu kud anyong’a ceke ku kwiocwiny i yic ma wuyio, kara wusegru i genogen, i tego pa Tipo Maleng’.

¹⁴Man an gira bende ang’eyo piwu andhandha, juwada, ya wun giwu wupong’ ku bero, wupong’ ku ng’eyong’ec ceke, ma wucopo jukru ko bende.

¹⁵Endre agoro iwu ku tegocwiny ma sagu i ng’ete moko, calu abeketho wupoi kendo, kum bero m’uai ba Mungu m’umire ira,

¹⁶kara abed jatic pa Kristu Yesu ni Thekdhanumange, m’abetimo tic mi lamulam mi lembanyong’a pa Mungu ma juboth ko, kara lam ma Thekdhanumange dok m’eyire, m’edoko leng’ ni kum Tipo Maleng’.

¹⁷Ka kumeno abedo ku kulula para i Kristu Yesu i gin ma pa Mungu.

¹⁸Kum abibedo ku tegocwiny ungo m’ayer ko pi gin moko ndhu maeni ma Kristu timo ni kuma, pi woro mi Thekdhanumange, ku lembe man tic bende,

¹⁹i tego mi giranyutha ku musana, i tego pa Tipo Maleng’; ketho ugambre i Yerusalem, man i ng’ete cil i Iluriko, adaru yero lembanyong’a ma juboth ko pa Kristu kot;

²⁰eyo, m’akeco nik ayer lembanyong’a ma juboth ko, i ka ma nying’ Kristu lwongre i ie ngo, kara kud agom wi kathere pa ng’atu mange;

²¹ento, calu egore kumae, Gibineno, gi ju ma pire fokuwok igi ngo, Man ju ma fokuwinjo ngo gibing’eyo.

²²Kum kumeno bende yo cere ira wang’ udul ma kud abin ko i beng’wu:

²³ento kawono, ma kakara dong’ umbe kendo i ng’ombuni, man ava bino i beng’wu nega rundi maeni dupa,

²⁴kinde ma tek acidho i Spania (kum ageno ya abinenowu i woth para, man wubitera de i yo para ma kuca, tek walar wabedo wakudu ma cwinya kwio ko moko),

²⁵ento kawono awacu, acidho Yerusalem, m’atimo ko ni jumaleng’.

²⁶Kum ebedo ber ni Makedoni kud Akaya ya gijok ajok moko pi ju ma canpiny unegogi kind jumaleng’ ma i Yerusalem.

²⁷Eyo, ebedo igi ni mutoro; man gi jubanja migi. Kum tek juketho Thekdhanumange gidok jurib gin migi mi tipo, banja mi joca ni i bang’gi ya gitim igi bende i gin mi kum.

²⁸Ka kumeno kan adaru maeni, man adaru mwono ayi kum nying’ maeni, abikadhu kud i beng’wu cik i Spania.

²⁹Man ang’eyo nia, kan abino i beng’wu, abibino i pong’ mi mugisa pa Kristu.

³⁰Nie akwayuwu, umego, ni kum Rwoth mwa Yesu Kristu, man ni kum mer mi Tipo, ya wuii karacelo wakudu i rwo mu ni Mungu pira;

³¹kara aboth ni ju ma gi juco i Yahudi, man kara timotim para ma pi Yerusalem uyire ni jumaleng’;

³²kara abin i beng’wu kud anyong’a ni kum yeny ma Mungu yenyo, man anwang’ yom karacelo wakudu.

³³Nie Mungu mi kwiocwiny ubed kudu ceke. Amen.