Read Alur Jurumi 16 Bible Online

Jurumi 16 - Alur bible

Jurumi 16

¹Aketho Foibe ma nyamegwa i weng’wu, ma en e jatic ma dhaku mi kanisa ma eni i Kenkre:

²kara wujole i Rwoth, calu m’umaku jumaleng’, man kara wukonye i gin ceke ma cande ni i kume i beng’wu: kum en gire bende en e jakonyjo dupa, man ira an nini de.

³Wumoth Priskila man Akula ma gi jutic wada i Kristu Yesu,

⁴ma gipielo ng’utgi gigi piny pi kwo para; amio foyofoc igi a kenda ngo, endre kanisa mi Thekdhanumange ceke bende:

⁵man wumoth kanisa ma ni i ot migi. Wumoth Epaineto ma jamerna, ma en e mwoka mir Asia ni Kristu.

⁶Wumoth Mariamu, m’emule ku tic ma dit iwu.

⁷Wumoth Androniko ku Yunia, ma gi wedina, gi jukol wakugi de, ma pigi yik de kind jukwenda, ma gilar gibedo i Kristu ira.

⁸Wumoth Amplia ma jamerna i Rwoth.

⁹Wumoth Urbano ma jatic wadwa i Kristu, man Stakus ma jamerna.

¹⁰Wumoth Apele m’e ng’atu ma jufoye i Kristu. Wumoth ju ma gi juot pa Aristobulo.

¹¹Wumoth Herodioni ma wada. Wumoth ju ma gi juot pa Narkiso, ma gini i Rwoth.

¹²Wumoth Trufaina ku Trufosa, ma gimuli ku tic i Rwoth. Wumoth Persi ma jamer, m’emule dit ku tic i Rwoth.

¹³Wumoth Rufo ma julwong’e i Rwoth, man min mire ma en e ma de.

¹⁴Wumoth Asunkrito, ku Flegoni, ku Herme, ku Patroba, ku Herma, kud umego ma gibedo gikugi de.

¹⁵Wumoth Filologo ku Yulia, man Nereu ku nyamin mire, man Olumpa ku jumaleng’ ceke ma gibedo gikugi.

¹⁶Wumothru ku cwiocwic ma leng’. Kanisa pa Kristu ceke gimothowu.

¹⁷Nie akwayuwu, umego, wunen ju ma giketho pokri man kaka ma ketho dhanu kier, ma tung’ ku ponji ma wugamu ng’eyo: man wulokru woko kud i bang’gi.

¹⁸Kum ju ma kumeno gitimo ni Rwoth mwa Kristu ngo, endre ni usauigi gigi: man giwondo adunde mi ju m’ung’eyo lembe ngo ku wec migi ma mit ma yom de.

¹⁹Kum woro mu uyik tir ba dhanu ceke. Ka kumeno anyong’a nega piwu: endre ayenyo wubed riek kum maeno m’e ber, man cobo ni maeni m’e rac.

²⁰Man Mungu mi kwiocwiny binyono Jok the tiendwu fodi nyanok. Bero pa Rwoth mwa Yesu Kristu bed i beng’wu.

²¹Timoteo ma jatic wada mothowu; man Lukio ku Yason, man Sosipatro, ma wedina.

²²An a Tertio, m’agoro waraga maeni, amothowu i Rwoth.

²³Gayo ma jagwokna, man mi kanisa ceke de emothowu. Erasto jagwok sente mir adhura de mothowu, man Kwarto m’umego.

²⁴Bero pa Rwoth mwa Yesu Kristu bed i beng’wu kpo. Amen.

²⁵Nie ire m’ecopo ketho wunyang’ calku lembanyong’a para ma juboth ko ku lembayera pa Yesu Kristu, calku lembanyutha mi lembamung’a m’ukandre ling’ i nindo ma rondo ku rondo,

²⁶ento kawono enyuthre, man ni kum lembagora pa Mungu mi jubila, calku lembang’ola pa Mungu ma nja, juketho eng’eire cil ni thek ni woro mi yioyic:

²⁷ni Mungu ma riek e kende, ni kum Yesu Kristu, dwong’ ma rondo ku rondo ubed ire. Amen.