Read Alur Jurumi 2 Bible Online

Jurumi 2 - Alur bible

Jurumi 2

¹Kum kumeno, E dhanu, in ma tek inuti m’ipoko lembe gin m’iloko wie lembe mbe: kum gin m’ipoko lembe pa wedu i ie, meca ipoko lembe rac i wii giri; kum in m’ipoko lembe icikutimo wagi gino.

²Man wang’eyo nia lembapoka pa Mungu en e calku lemandha kum ju m’ucikutimo wagi gino.

³E dhanu, iwacu nyo ibiboth ni pokolembe pa Mungu, in m’ipoko lembe wi ju m’ucikutimo wagi gin maeni, ma in de itimo wagi gino?

⁴Kadi icayu lonyo mi bero pare ku twiocwiny pare man mwonyolembe pare m’emwonyo hai, m’ing’eyo ko ngo nia bero Mungu unyebi kum lokocwinyi?

⁵Ento ku lubo adundeni ma nwang’ ma lokre ngo ikanu kwinyo iri giri i ceng’ mi kwinyo ku nyuthonyuth mi pokolembe ma pwe pa Mungu:

⁶m’ebimio ni dhanu ceke kubang’gi kubang’i ng’atuman calku tic pare:

⁷ni ju ma ni kum twiocwiny i timober giyenyo dwong’ ku yung man nyothri ngo, kwo ma rondo ku rondo:

⁸ento ni ju ma weg ali, m’uworo lemandha ngo, endre m’uworo gondri, kwinyo man ng’ecwiny bibedo nuti,

⁹man masendi ku ndiba, wi ng’eyong’ec mi dhanu kubang’e kubang’e m’utimo rac, ma kwong’ane pa Jayahudi, man pa Jayunani bende;

¹⁰ento dwong’ ku yung man kwiocwiny ni dhanu ceke kubang’gi kubang’gi m’utimo ber, ku kwong’ane ni Jayahudi, man ni Jayunani bende:

¹¹kum dhanu tung’ tung’ ungo ni Mungu.

¹²Kum dhanu ceke ma gidubo ma cik umbe kugi gibirwinyo bende ma cik umbe kugi: man dhanu ceke m’udubo the cik jubipoko lembe i wigi ku cik;

¹³kum juwinj cik awinja gi pwe ngo i wang’ Mungu, endre jutim cik e ma jubikwanugi pwe;

¹⁴(kum ka Thekdhanumange ma gimbe ku cik gitimo gin mi cik ni kum kurajo, joni, ma gimbe ku cik, gin gi cik igi gigi;

¹⁵kum ginyutho tic mi cik m’ugore i adundegi, ma pidocwinygi nyuthogi kudo, man porolembe migi ma kuman ku kuman ma dotogi kadi ma gonyo lembe m’i wigi;)

¹⁶i ceng’ ma Mungu bipoko lembe wi lembamung’a mi dhanu, calku lembanyong’a para ma juboth ko, ni kum Yesu Kristu.

¹⁷Ento tek julwong’i ku nying’ Jayahudi, man ijengri kum cik, man iluli i Mungu,

¹⁸man ing’eyo yeny ma ie yenyo, man ing’io gin ma rac ku gin ma ber, ma juponji ku cik,

¹⁹man ing’eyo andha nia in giri in i jatel wi ju ma wang’gi cor, m’i der ni ju ma gini i mudho,

²⁰m’i jatwiny ju ma kitgi mbe, i japonji de mi mukere, m’ibedo kud ayi mi ng’eyong’ec man mi lemandha i cik;

²¹Ka kumeno in m’iponjo ng’atu mange, iponjri giri ngo? in m’iponjo ya maku dhanu kud ukwal kwo, in e m’idong’ ikwalu kwo?

²²in m’iwacu ya ng’atu moko kud ugier gier, in e m’idong’ igiero gieri? in m’idagu ayi gin m’acwia, in e m’idong’ ikwalu jamb hekalu?

²³in m’iluli i cik, e m’idong’ icero yung ni Mungu ku kadhu m’ikadhu ko ku wi ciki?

²⁴Kum nying’ Mungu cidre i kind Thekdhanumange kum lembe mu, cil calu egore.

²⁵Kum yaa kulokane nuti andha, tek in i jatim cik: ento tek in i jakadh ku wi cik, yaa peri doko ni yaango.

²⁶Ka kumeno tek won yaango kwiro lembapoka mi cik, yaa pare m’umbe jubikwane ni yaa ngo?

²⁷man yaango ma ku kum, tek eketho cik utimbre kakare, ebipoko lembe i wii ngo, ma in ma ku nyiguta ku yaa ikadhu ku wi ciki?

²⁸Kum en e Jayahudi ngo m’e Jayahudi ku yo woko; kadi maeno ma yo woko i kum de en e yaa ngo:

²⁹ento en e Jayahudi ma en e Jayahudi ma ku yor i ie; man yaa en e maeno mir adunde, i tipo i nyiguta ngo; ma pak pare en e mi dhanu ngo, ento pa Mungu.