Read Alur Jurumi 3 Bible Online

Jurumi 3 - Alur bible

Jurumi 3

¹Jayahudi lund ubedo ku girasaga manedi? kadi yaa de kulokane ang’o?

²E dit i yo ceke: ma kwong’ane, kum juketho wec pa Mungu i korgi.

³Kum en e ang’o tek jumoko yioyic umbe kugi? yioyic migi m’umbe bithiro bedomandha pa Mungu?

⁴Awene: eyo, dong’ junwang’ ya Mungu en e mandha, endre dhanu kubang’gi kubang’gi gi jundra; calu egore kumae, Kara lembe m’i wii gonjre ku lembe peri, Kara isag de kan imondo i pokolembe.

⁵Ento tek gondri mwa dwoko bedopwe pa Mungu tek, wabiyero ang’o? Mungu en e won gondri m’eliewo jo ku kwinyo? (Ayero calu ma dhanu yero.)

⁶Awene: tek ebedo kumeni Mungu bipoko lembe mi ng’om nenedi?

⁷Ento tek lemandha pa Mungu sagre ni dwong’ pare ni kum ndra para, nedi jupoko lembe i wia bende kawono calu a jadubo?

⁸nedi wayero ngo (calu jubeyero nyingwa, man calu jumoko giyero ya wawacu kumae), Dong’ watimu rac, kara lembe ma ber uwoki? ma pokolembe ma rac migi bedopwe.

⁹Ka ke ang’o? ber mwa sagu ber migi? Ungo, ki ngo: kum walar waporo nia Juyahudi giku Juyunani de, gin ceke gini the dubo:

¹⁰calu egore kumae, Moko mbe ma won bedopwe, umbe, acel de mbe;

¹¹Moko mbe m’ung’eyo ng’ec, Moko mbe de m’uyenyo Mungu;

¹²Kagi ceke gikier, gin karacelo gidoko ma kulokagi mbe; Moko mbe m’utimo ber, umbe, kadok acel de mbe:

¹³Dwandgi en e odliel m’ubedo thwolo; Gibombo abombi ku lebgi: Kwir mi pino ni i the dendhoggi:

¹⁴Dhoggi pong’ ku lam ma julamu ko jo kud akece:

¹⁵Tiendgi yot kum thwogo rimo;

¹⁶Nyothonyoth ku can ni i yo migi;

¹⁷Man yo mi kwiocwiny fodi gikung’eyo ngo:

¹⁸Lworo ma julworo ko Mungu mbe yor i wang’gi.

¹⁹Nie wang’eyo nia gin ma tek cik uyero eyero ni ju ma gini the cik; kara dhok ceke kubang’gi kubang’gi bed amia, man ng’om ceke de jukel i lembapoka pa Mungu:

²⁰kum ni kum tic mi cik ng’atu moko mbe ma lembe m’i wie bigonjre i wang’e; kum ng’eyong’ec mi dubo wok ni kum cik.

²¹Ento kawono bedopwe pa Mungu nge ku cik udaru nyuthre, ma cik ku jubila de ginyutho pire;

²²en e bedopwe pa Mungu ma ni kum yioyic i Yesu Kristu ni dhanu ceke ma giyio; kum tung’ tung’ umbe;

²³kum kawa ceke wadubo warem ni dwong’ pa Mungu;

²⁴ma jugonyo lembe m’i wigi mananu ni kum berone ni kum war ma ni i Kristu Yesu:

²⁵ma Mungu ketho ebed ni lam, ni kum yioyic, i rimo pare, kara enyuth bedopwe pare kum wekodubo m’ular utimbre, i twiocwiny pa Mungu;

²⁶kum nyutho, awacu, bedopwe pare i nindo maeni; kara en gire ebed pwe, man jagony lembe m’i wi ng’atu ma yioyic pare ni i Yesu.

²⁷Ka kumeno luli nikani? Bang’e cikre woko. Ku cik manedi? mi tici? Ungo: ento ku cik mi yioyic.

²⁸Ka kumeno wakwanu nia lembe m’i wi dhanu gonjre ni kum yioyic nge ku tic mi cik.

²⁹Kadi Mungu en e Mungu mi Juyahudi kendgi? en e Mungu mi Thekdhanumange bende ngo? Eyo, mi Thekdhanumange bende:

³⁰tek ebedo kumeno ya Mungu en e acel, man ebigonyo lembe ma wi weg yaa ku yioyic, man ma wi weg yaango ni kum yioyic.

³¹Ka kumeno wathiro cik ni kum yioyici? Awene: ungo, waketho cik ucungo.