Read Alur Jurumi 4 Bible Online

Jurumi 4 - Alur bible

Jurumi 4

¹Ka kumeno wabiwacu nia Ibrahim, ma wegwa, unwang’u ang’o calku kumi?

²Kum tek Ibrahim lembe m’i wie gonjre ni kum tic, ebedo ku gin m’elule i kume? endre yo ba Mungu ngo.

³Kum lembagora pa Mungu wacu ang’o? Ibrahim uyio Mungu, man ekwandre ire ni bedopwe.

⁴Nie ni ng’atu m’utimo, sukuliane jukwanu calu mi bero ngo, endre calu mi banja.

⁵Ento ni ng’atu m’utimo ngo, ento m’uyio en m’ugonyo lembe ma wi ju ma ayi Mungu mbe i kumgi, yioyic pare jukwanu ni bedopwe.

⁶Cil calu Daudi bende yero pi mugisa wi ng’atu ma Mungu kwanu bedopwe ire nge ku tic,

⁷m’ewacu kumae, Mugisa ni ju ma camuco migi wekre woko, Man ju ma dubo migi umbre.

⁸Mugisa ni ng’atu ma Mungu bikwanu dubo ire ngo.

⁹Ka kumeno mugisa maeni bino wi weg yaa kendgi, kadi wi weg yaango bende? kum wawacu kumae, Ni Ibrahim yioyic pare jukwanu ni bedopwe.

¹⁰Ka kumeno ekwandre nenedi? kinde m’eni i yaa, kadi i yaango? M’eni i yaa ngo, endre m’embe i yaa:

¹¹man ejolo giranyutha mi yaa, en e ayi mi bedopwe mi yioyic m’ebedo ko kinde m’eni i yaango: kara ebed wego mi ju m’uyio ceke, kadok gini i yaango, kara jukwan bedopwe igi;

¹²man ebed wego mi weg yaa ni ju ma gi weg yaa kendgi ngo, ento m’uwotho i ba tielo mi yioyic maeno ma pa wegwa Ibrahim m’ebedo ko ma fodi eni i yaango.

¹³Kum lembang’ola mire ni Ibrahim ku nyikwaye de ni kum cik ungo nia ebed jacampacu m’i ng’om, endre ni kum bedopwe mi yioyic.

¹⁴Kum tek ju ma gi mi cik gi jucampacu, e nwang’u juthiro yioyic, man lembang’ola de juthiro:

¹⁵kum cik timo kwinyo; ento ka ma cik umbe i ie, e kadhukuwicik de mbe.

¹⁶Kum kumeno en e mi yioyic, kara ebed calku bero; kara lembang’ola bed andhandha ni nyikwayu ceke; ni maeno kende ngo ma en e mi cik, endre ni maeno bende ma en e mi yioyic pa Ibrahim, ma en e wegwa ceke

¹⁷(calu egore kumae, Aketho ibed wego mi thek dupa) i wang’e en m’eyio, en e Mungu, m’emio kwo ni ju m’utho, man elwong’o gin m’umbe, calu ginuti.

¹⁸M’eyio i genogen ka genogen umbe, kara edok ni wego mi thek dupa, calku maeno m’uyere kumae, Nyikwei bibedo kumeno.

¹⁹Man ma yioyic pare doko ng’ic ungo ie poro pi kume m’ubedo va etho (ma oro pare yenyo romo dak), man ke pi i Sara m’ubedo mvuny:

²⁰ento, m’eneno ba lembang’ola pa Mungu, cwinye bedo jiji ngo ni kum yic m’umbe, ento edoko tek ni kum yioyic, m’emio ko dwong’ ni Mungu,

²¹man m’eng’eyo andhandha nia gin m’eng’olo, ecopo time bende kakare.

²²Kum kumeno bende jukwane ire ni bedopwe.

²³Nie egore pire kende ngo, y a jukwane ire:

²⁴ento iwa bende, m’ebikwandre, ma wayio en m’eting’o Yesu Rwoth mwa ku kind ju m’utho,

²⁵ma juwodhe pi kier mwa, man juting’e pi gony mi lembe m’i wiwa.