Read Alur Jurumi 6 Bible Online

Jurumi 6 - Alur bible

Jurumi 6

¹Wabilund wacu ang’o? Wabidong’ asu i dubo, kara bero sagre?

²Awene. Wan ma watho ni dubo, wabibedo i ie kendo nenedi?

³Kadi wung’eyo ngo nia wan ceke ma jumio baputisi iwa i Kristu Yesu jumio baputisi iwa i tho pare?

⁴Juyikowa kumeno wakude ni kum baputisi i tho: kara calu juting’o Kristu ku kind ju m’utho ni kum dwong’ pa Wego, e wan bende wawoth kumeno i nyen mi kwo.

⁵Kum tek waribra wakude i ayi mi tho pare, wabibedo bende i ayi mi cer pare;

⁶ma wang’eyo maeni, nia ng’atu mwa ma con jugure kude, kara kum mi dubo thum woko, kara ku wabed ng’eca kendo mi dubo;

⁷kum ng’atu m’utho ebedo agonya ni dubo.

⁸Ento tek watho ku Kristu, wayio nia wabibedo karacelo wakude bende;

⁹ma wang’eyo ko nia Kristu m’ucer ku kind ju m’utho etho kendo ngo; tho umbe ku kero kendo i wie.

¹⁰Kum tho m’etho, etho wang’ acel ni dubo: ento bedo m’ebedo, ebedo ni Mungu.

¹¹Cil kumeni bende wukwan giwu ku yor i iwu nia wrun avu ni dubo, endre wu kwo ni Mungu ni kum Kristu Yesu.

¹²Ka kumeno kud wuyi dubo bim wi kumwu ma tho, ma nia wuwor ko awanyane ma rac:

¹³kadi kud wuting’ wathkumwu ni dubo calu jamtic mi gondri; endre wutingru giwu ni Mungu, calu ju ma kwo m’uai ba ju m’utho, man wathkumwu calu jamtic mi bedopwe ni Mungu.

¹⁴Kum dubo mbe ku kero i wiwu: kum wun wuni the cik ungo, ento the bero.

¹⁵Ka ke ang’o? wabidubo, kum wani the cik ungo, ento the bero? Awene.

¹⁶Wung’eyo ngo, nia wun ma wu jumiru ni ng’atu ma wutingru ire ni woro, wun wu jumiru pa ng’atu ma wuworo; kadok en e mi dubo mi tho, kadi en e mi woro mi bedopwe?

¹⁷Ento foyofoc ni Mungu, nia, ma nwang’u naka wu jumiru mi dubo, wudoko wor ku i adundewu ni ayi ponji maeno ma jukethowu i ie;

¹⁸man ka wugonjru kud i dubo, wudoko jumiru mi bedopwe.

¹⁹Ayero calu dhanu yero kum ng’ic mi kumwu: kum calu wuting’o wathkumwu ubed jutic mi sasa man mi camuco ni camuco, cil kumeno kawono wuting’ wathkumwu ubed jutic mi bedopwe ni dwokrileng’.

²⁰Kum ka wu jumiru mi dubo, wubedo agonya ni bedopwe.

²¹I nindo maeca wucego nyingwu manedi i gin maeno ma kawono lewic unegowu i kume? kum kajik mi gin maeno en e tho.

²²Ento kawono ma dong’ jugonyowu ni dubo man wudoko jutic pa Mungu, e wubedo ku nyingwu ni dwokrileng’, man kajikne kwo ma rondo ku rondo.

²³Kum sukulia mi dubo en e tho; ento giramia ma Mungu mio mananu re en e kwo ma rondo ku rondo ni kum Kristu Yesu Rwoth mwa.