Read Alur Jurumi 7 Bible Online

Jurumi 7 - Alur bible

Jurumi 7

¹Kadi wubedo cobo, umego (kum ayero ni dhanu m’ung’eyo cik), ya cik ubedo ku kero wi dhanu cil ma fodi ebedo kwo?

²Kum dhaku ma cware nuti ebedo atwia ni cware ni kum cik i nindo ma fodi cwarene bedo kwo; ento tek cwarene tho, egonjre i cik pa cware.

³Kum kumeno, tek ebedo ku nico mange, ma fodi cware bedo kwo, jubilwong’e dhaku ma giere swa: ento tek cwarene tho, ebedo agonya ni cik, kum kumeno en e dhaku ma giere swa ngo, kadok egomo nico mange.

⁴Kum kumeno, juwada, wun bende juketho wutho ni cik ni kum kum Kristu; kara wugom ng’atu mange, ma en e ng’atu ma juting’e ku kind ju m’utho, kara waceg nyingwa ni Mungu.

⁵Kum ka wani i kum, awanya mi dubo, ma nuti ni kum cik, utimbre i wathkumwa m’ecego ko nyinge mi tho.

⁶Ento kawono wabedo agonya ni cik, kum wadaru tho ni maeno m’ucerowa; kum kumeno watimo i nyen mi tipo, man mi nyiguta ma con ungo.

⁷Wabilund yero ang’o? cik en e dubo? Awene. Ento, ang’eyo dubo ngo, tek ni kum cik ungo: kum ang’eyo kethocwiny ma hai kum piny ungo, tek cik uwacu ngo kumae, Kud iketh cwinyi hai kum piny:

⁸ento dubo, m’unwang’u kaka, etimo i ia ni kum lembang’ola kwond kethocwiny hai kum piny ceke, kum ma cik umbe dubo en e avu.

⁹Man ku kwong’a abedo kwo ma cik umbe: ento ka lembang’ola wok, dubo cer, man atho;

¹⁰man lembang’ola, m’ubedo ni kwo, maeni adong’ anwang’u ebedo ni tho:

¹¹kum dubo, m’enwang’u kaka, ni kum lembang’ola ebomba, man ni kume de enega.

¹²Kum kumeno cik en e leng’, lembang’ola de leng’, man e pwe, e ber de.

¹³Maeno m’e ber elund edoko ni tho ira? Awene. Ento dubo, kara enyuthre ya en e dubo, ku timo tho ira ni kum maeno m’e ber; kara ni kum lembang’ola dubo dok ni dubo m’akeca.

¹⁴Kum wang’eyo nia cik en e mi tipo: ento an a mi kum, ma jung’iewa the dubo.

¹⁵Kum maeno m’atimo ang’eyo ngo: kum gin m’ayenyo ngo, em’adong’ abetimo; ento gin m’adagu, e m’atimo.

¹⁶Ento tek gin m’ayenyo ngo, e m’atimo, ayio ni cik nia e ber.

¹⁷Kum kumeno kawono en e an kendo ngo m’utime, endre dubo m’ubedo i ia.

¹⁸Kum ang’eyo nia i ia, lembene kumae, i kuma, gin moko m’ubedo ber umbe: kum yeny ma ia yenyo nia atim ko ber nuti kuda, ento tim ma nia atime kudo mbe.

¹⁹Kum gin ma ber m’ayenyo nik atim atimo ngo: ento dubo m’ayenyo ngo, e m’adong’ abetimo.

²⁰Ento tek gin m’ayenyo ngo, e m’adong’ atimo, en e an kendo ngo m’utime, ento dubo m’ubedo i ia.

²¹Alund anwang’u cik, nia, ira m’ayenyo atim ber, dubo nuti.

²²Kum anyong’a nega kum cik pa Mungu kum ng’atu ma yor i ic:

²³ento aneno cik ma tung’ i wathkuma, m’ubekiedo kum cik mi pidoia, man ebekela i kol the cik mi dubo ma ni i wathkuma.

²⁴Ei an a ng’atu ma ng’ic ng’a ma biwodha kud i kum mi tho maeni?

²⁵Afoyo Mungu ni kum Yesu Kristu Rwoth mwa. Kum kumeni an gira ku pidoia, atimo cik pa Mungu andha; endre ku kum atimo ni cik mi dubo.