Read Alur Jurumi 8 Bible Online

Jurumi 8 - Alur bible

Jurumi 8

¹Kum kumeno kawono dong’ pokolembe ma rac umbe wi ju ma gini i Kristu Yesu.

²Kum cik mi Tipo mi kwo i Kristu Yesu ugonya kud i cik mi dubo man mi tho.

³Kum gin ma copre ngo ni cik, kum ebedo ng’ic ni kum kum, Mungu, m’eoro Wode ma dhe i ayi kum mi dubo man pi dubo, epoko lembe rac kum dubo i kum:

⁴kara lembang’ola mi cik utimbre kakare i iwa, ma walubo tok kum ungo, endre tok Tipo.

⁵Kum ju ma gi mi kum igi pido pi gin mi kum; ento ju ma gi mi Tipo re igi pido pi gin mi Tipo.

⁶Kum pidoic mi kum en e tho; ento pidoic mi Tipo re en e kwo man kwiocwiny:

⁷kum pidoic mi kum en e adegi ku Mungu; kum e wor ungo ni cik pa Mungu, kadok acopa de ecopre ire ngo andha;

⁸man ju ma gini i kum gicopo nyayu mutoro i Mungu ngo.

⁹Ento wun wuni i kum ungo ento wuni i Tipo, tek Tipo pa Mungu bedo i iwu. Ento tek ng’atu moko Tipo Kristu mbe kude, meca en e pare ngo.

¹⁰Man tek Kristu ni i iwu, kum en e avu kum dubo; endre tipo en e kwo kum bedopwe.

¹¹Ento tek Tipo pa ng’atu m’uting’o Yesu ku kind ju m’utho bedo i iwu, ng’atu m’uting’o Kristu Yesu ku kind ju m’utho ebimio kwo bende ni kumwu ma tho ni kum Tipo pare m’ubedo i iwu.

¹²Kum kumeno, umego, wa jubanja, ni kum ungo, ma nia wabed tok kum:

¹³kum tek wubedo tok kum, wubikotho be; ento tek wunego tic mi kum ku Tipo, wubibedo kwo.

¹⁴Kum ku ba dhanu ceke ma Tipo Mungu telo wigi, maeni gi wot Mungu.

¹⁵Kum wujolo tipo mi ng’eca kendo ngo ni lworo, ento wujolo tipo mi dwok ma judwoko kowu ni nyithindho, ma walwong’o ko kumae, Abba, Vwa.

¹⁶Tipo gire enyutho lembe karacelo ku tipo mwa, ya wa nyithindho pa Mungu:

¹⁷man tek nyithindho, nwang’u jucampacu; jucampacu pa Mungu, man jucampacu karacelo ku Kristu; tek wasendra wakude, kara juyungwa karacelo wakude.

¹⁸Kum akwanu ya can mi nindo ma kawono maeni romo ngo ya jupore ku dwong’ ma binyuthre iwa.

¹⁹Kum genogen mi giracwia pa Mungu ma kud avane ubekuro nyuthonyuth mi wot Mungu.

²⁰Kum juketho giracwia pa Mungu bed wor ni gin ma kite mbe, ku yeny m’eyenyo en ungo, ento ni kum ng’atu m’uketho ebed wor, i genogen,

²¹nia jubigonyo giracwia pa Mungu en bende kud i ng’eca mi nyoth ni gony mi dwong’ mi nyithindho pa Mungu.

²²Kum wang’eyo nia giracwia pa Mungu ceke becur acura man ebesendre ku remokum karacelo cil ku kawono.

²³Man kumeno kende ngo, ento wan giwa bende, ma wabedo ku landu mwoka mi Tipo, cil wan giwa wacur acura i iwa giwa, ma wakuro ko dwok ma judwoko kowa ni nyithindho, lembene kumae, war mi kumwa.

²⁴Kum waboth ni kum genogen: ento genogen ma nen en e genogen ungo: kum ng’a ma geno gin maeno m’eneno?

²⁵Ento tek wageno gin ma waneno ngo, e walund wakure ku twiocwiny.

²⁶Man Tipo bende konyo ng’ic mwa kumeca: kum wang’eyo ngo ram warwo ko calu ma maku warwo: ento Tipo gire ekwayu piwa ku cur acura ma aweca ngo;

²⁷man ng’atu ma yenyo i adunde eng’eyo karamb pidoic mi Tipo, kum ekwayu pi jumaleng’ calku yeny ma Mungu yenyo.

²⁸Man wang’eyo nia gin ceke timbre karacelo mi bero ni ju ma gimaru Mungu, ni ju ma julwong’ogi calku yeny ma ie yenyo

²⁹Kum ju m’elar eng’eyo, elar ekethogi ya gidok calkud ayi Wode, kara ebed kayu i kind umego dupa:

³⁰man ju m’elar ekethogi, elwong’ogi bende: man ju m’elwong’o egonyo lembe m’i Wigi bende: man ju m’egonyo lembe m’i wigi, joca e m’eyungogi bende.

³¹Wabilund yero ang’o kum gin maeni? Tek Mungu en e jabang’wa, ng’a ke ma goyo kore i kumwa?

³²Ng’atu ma kukwero ngo nimio Wode ma dhe, ento ewodhe piwa ceke, ebimio iwa gin ceke k’abamba bende karacelo kude ngo nedi?

³³Ng’a ma copo ketho lembe moko wi ju ma Mungu goyo nying’gi? Mungu e ma gonyo lembe ma wi jo;

³⁴ng’a ma poko lembe raci? en e Kristu Yesu m’utho, eyo ma sagu, ma juting’e ku kind ju m’utho, m’eni yo ku cing’ Mungu ma yor acwic, m’ekwayu bende piwa.

³⁵Ng’a ma bikoyowa ku mer pa Kristu? masendi, kadi ndiba, kadi ragedo, kadi ndru, kadi muneru, kadi both abotha ku tho, kadi palamularu?

³⁶Cil calu yang’ egore kumae, Junegowa duu piri; Jukwanuwa va rombe mir athuma.

³⁷Ento, i gin maeni ceke wasagu weg avoci ni kum ng’ atu m’umaruwa.

³⁸Kum ang’eyo andhandha, ya kadok tho, kadi kwo, kadi malaika, kadi ker, kadi gin ma nuti, kadi gin ma bibino, kadi tego,

³⁹kadi kadongone, kadi kathuthne, kadi giracwia mange pa Mungu, bicopo koya ku mer pa Mungu ngo, ma eni i Kristu Yesu Rwoth mwa.