Read Alur Jurumi 9 Bible Online

Jurumi 9 - Alur bible

Jurumi 9

¹Ayero lemandha i Kristu, acwayu ndra ngo, ma pidocwinya de benyutho wakude i Tipo Maleng’,

²nia can ma dwong’ man remo ma thum ungo de ni i adundena.

³Kum acopo yenyo ya an gira abed ma kwong’ ni i wia m’ukoya ku Kristu kum utumira, ma gi wedina calku kum:

⁴ma gi Juisraeli; ma dwok ma judwoko ko jo ni wot en e migi, ku dwong’, man lembariba, ku mio cik, man rwo ma ba Mungu, ku lembang’ola de;

⁵ma kwaru en e migi, ma Kristu bende ai i bang’gi calku kum, ma ceke eni i wie, Mungu ma won mugisa ma nja. Amen.

⁶Endre ebedo calu lembe pa Mungu doko ni gin mananu ngo. Kum gin ceke ma gi mi Israel, gi Israel kagi ceke ngo:

⁷kadok, kum gi kodhi pa Ibrahim, meca kagi ceke gi nyithindho ngo: ento kodhini bilwongre ni kum Isak.

⁸Lembene kumae, en e nyithindho mi kum ungo ma gi nyithindho pa Mungu; endre nyithindho mi lembang’ola jukwanugi ni kodhi.

⁹Kum maeni en e lembe mi lembang’ola kumae, Karunyoni abibino, man nyathin ma nico bibedo nuti ni Sara.

¹⁰Man kumeni kende ngo; ento Rebeka bende m’egamu ie ku ng’atu acel, ma en e wegwa Isak,

¹¹kum nyithindho ma fodi jukunyologi ngo, kadok ma fodi gikutimo gin moko ma ber kadi ma rac de ngo, kara yeny ma Mungu yenyo calku goyo nying’ ucungi, mi tic ungo, endre pa ng’atu m’ulwong’o,

¹²eyere ire kumae, Jadit bitimo ni ng’atu ma nok.

¹³Cil calu egore kumae, Yakobo amaru, endre Esau adagu.

¹⁴Wabilund wacu ang’o? Gondri nuti ku Mungu? Awene.

¹⁵Kum ewacu ni Musa kumae, Kisa binega kum ng’atu ma kisa nega i kume, man ngisi de binega kum ng’atu ma ngisi nega i kume.

¹⁶Ka kumeno en e pa ng’atu m’uyenyo re ngo, kadi pa ng’atu m’uringo de ngo, endre pa Mungu ma kisa nege.

¹⁷Kum lembagora pa Mungu yero ni Farao kumae, Kum lembe maeni nini ating’i malu, kara anyuth tego para i ii, man kara nyinga rweire i ng’om ceke.

¹⁸Kum kumeno kisa nege kum ng’atu m’eyenyo; man edwoko cwiny ng’atu m’eyenyo tek.

¹⁹Ibilund wacu ira kumae, Nedi ebedoto adote asu? Kum ng’a ma copo jai kum yeny ma ie yenyo?

²⁰Ungo endre, E dhanu, in i ng’a m’idwoko wang’ lembe ni Mungu e? Gin m’ucwire biwacu ni ng’atu m’ucwie kumae, Nedi icwia kumeni?

²¹Kadi jacwiagulu tego pare mbe kum ulobo, ma ku lungu ulobo acel ecwio ng’ete kucel ni agulu mi yung, ku ng’ete kucel ke agulu m’umbe yungi?

²²Ang’o tek Mungu, m’eyenyo enyuth kwinyo pare, man eketh tego pare ng eire, eciro ku mwonyolembe hai agulu mi kwinyo ma juyiko ni nyoth ma junyothri ko:

²³man kara eketh lonyo mi dwong’ pare wi agulu mi kisa ung’eire, m’elar eyiko mi dwong’,

²⁴cil wan, ma julwong’owa bende, m’uai ba Juyahudi kendgi ngo, ento ba Thekdhanumange bende?

²⁵Calu ewacu i Hoseya kumae, Abilwong’o maeno dhanu para, ma en e dhanu para ngo; Ng’atu ma jamer ungo de, ya jamer.

²⁶Man ebitimbre, ya ka ma juwacu ie igi kumae, Wun wu dhanu para ngo, Kakeca gibilwongri wot Mungu ma kwo.

²⁷Isaya bende ekok pir Israel kumae, Tek wel mi nyithindho p a Israel ubedo calu kwio ma dhu nam, donge e ma biboth:

²⁸kum Rwoth bitimo lembe pare kakare wi ng’om, m’ebidare ko ku jwige bende.

²⁹Man, calu Isaya lar uyero kumae, Dok Rwoth mir Udul kuweko iwa kodhi ngo, Kuno di wadoko va Sodom, man kuno di judwoko wa calku Gomora.

³⁰Wabilund wacu ang’o’ Ya Thekdhanumange, m’ulubo bedopwe ngo, utundo kum bedopwe, cil bedopwe ma en e mi yioyic:

³¹ento Israel, m’ulubo tok cik mi bedopwe utundo kum cik maeno ngo.

³²Pirang’o’ Kum giyenye ku yioyic ungo, endre calu eyenjre ku tic. Gikier kum kidi ma redhojo;

³³cil calu egore kumae, Nen, aketho i Sayuni kidi ma redhojo man cana mi kier: Man ng’atu m’uyio ire lewic binege ngo.