Read Alur 1 Jukorinto 10 Bible Online

1 Jukorinto 10 - Alur bible

1 Jukorinto 10

¹Kum ayenyo ngo wubed cobo, umego, ya wegwa ceke yang’ gini ther afuru, man kagi ceke gikadhu kud i nam;

²man ke kagi ceke jumio igi baputisi ba Musa i afuru kud i pi bende;

³man ke kagi ceke gicamu cemo mi tipo ma calacel;

⁴man kagi ceke gimadhu giramadha mi tipo ma calacel: kum gimadhu kum kidi mi tipo m’ulubo ng’eigi; e kidine en e Kristu.

⁵Ento Mungu maru pi jukucel ma dit m’i kindgi ngo: kum juredhogi piny i yamba.

⁶Nie gin maeni bedo iwa ni por, kara awanya ma rac kud unegwa kum gin ma rac, calu awanya ma rac yang’ unegogi bende.

⁷Kadi kud wubed ju ma rwo ni ayi gin m’acwia, calu jumoko m’i kindgi; calu egore kumae, Dhanu gibedo piny nicamu nimadhu de, man giai malu nituko.

⁸Kadi ku watim tarwang’, calu jumoko m’i kindgi timo, man gipodho rubanga pier ario wi adek i ceng’ acel.

⁹Kadi ku wabidh Rwoth, calu jumoko m’i kindgi gibidho, man githo ni thwol.

¹⁰Kadi kud wung’ur calu jumoko m’i kindgi ging’ur, man githo ni janyoth piny.

¹¹Nie gin maeni timbre igi ni por; man ke jugoro ni juk mwa, wan ma kajik rundi ni i wiwa.

¹²Kum kumeno wek ng’atu ma ie wacu ya ecungo ebed ku wang’e emaru podho.

¹³Abidhe moko mbe m’uwok i kumwu ma jukucop bedo ko ngo; ento Mungu en e mandha, m’ebiyio ngo y a jubidhwu ma sagu ma wucopo bedo ko: ento karacelo kud abidhe nica ebiketho yojboth bende, kara wucopo cire.

¹⁴Kum kumeno, jumerna, wuring rwo ma jurwo ko ni ayi gin m’acwia.

¹⁵Ayero calu ni jurieko; wung’i gin m’ayero.

¹⁶Kikombe mi ngisi ma wamio mugisa i wie, eribowa karacelo i rimo pa Kristu ngo? Kwen de ma wang’weko, eribowa karacelo i kum Kristu ngo?

¹⁷kum wan, ma wa dupa, wa kwen acel, wa kum acel: kum wan ceke wang’wenyo kum kwen acel.

¹⁸Nen Israel ma ku kum: gi ju ma gicamu giralama gi juriblembe giku pemblam ungo?

¹⁹Kan ayer ang’o ke? ya gin ma julamu ni ayi gin m’acwia en e gin moko, kadi ya ayi gin m’acwia de en e gin moko?

²⁰Ento awacu, nia gin ma Thekdhanumange gilamu, meca gilamu ni pajogi, ni Mungu ngo: man ayenyo ngo ya wuribru ku pajogi.

²¹Wucopo madhu kikombe pa Rwoth, ku kikombe mi pajogi de ngo: wucopo ng’wenyo ngo wi par pa Rwoth, ku wi par mi pajogi de.

²²Kadi waketh nyeko tim Rwothi? tego mwa sagu pare?

²³Cik uyio gin ceke; ento gin ceke ber ungo ya jutim. Cik uyio gin ceke; ento gin ceke teng’o jo ngo.

²⁴Ng’atu moko kud uyeny ire gire, ento pa wadi re.

²⁵Gin ma tek juloko i katali, wucam, ma wukupenjo penji moko ngo ni cwinywu m’ubepido;

²⁶kum ng’om en e pa Rwoth, ku gin ceke m’upong’ i ie de.

²⁷Tek ng’atu moko m’i kindgi m’uyio ngo lwong’owu i agba, e wun bende wuyenyo wucidhi; e gin ma tek juketho i weng’wu, wucam, ma wukupenjo penji moko ngo ni cwinywu m’ubepido.

²⁸Ento tek ng’atu moko wacu iwu kumae, Maeni julamu alama, kud wucam, ni kum ng’atu m’ucwe nini, man ni kum cwiny m’ubepido:

²⁹cwiny m’ubepido, awacu, peri giri ngo, endre pa ng’atu mange; kum gony m’abedo ko agonya e, cwiny m’ubepido pa ng’atu mange ng’olo lembe pire nedi?

³⁰Tek agamu ku foyofoc, juyero pira rac nedi kum gin maeni m’afoyo kume foci?

³¹Ka kumeno kadok wucamu, kadi wumadhu, kadi gin ceke ma tek wutimo, wutim ceke ni dwong’ pa Mungu.

³²Kud wutim gin moko ma ketho jukier, kadi ni Juyahudi, kadi ni Juyunani, kadi ni kanisa pa Mungu:

³³cil calu an bende anyayu mutoro i dhanu ceke i gin ceke, m’abeyenyo ko kuloka para gira ngo, ento mi dhanu dupa, kara gibothi.