Read Alur 1 Jukorinto 11 Bible Online

1 Jukorinto 11 - Alur bible

1 Jukorinto 11

¹Wukwany kotha, calu an bende akwanyu koth Kristu.

²Nie apakuwu kum wupoi i kuma i gin ceke, man ke wuceru wi lembapoka, cil calu amio kogi iwu.

³Ento ayenyo wung’ei, nia wi co ceke kubang’gi kubang’gi en e Kristu; man wi dhaku en e ng’atu ma nico; wi Kristu ke en e Mungu.

⁴Co ceke kubang’gi tek eberwo kadi ebeewo, ma wie bedo arieba, meca enyayu lewic i wie.

⁵Ento ku ba mon re ceke ma tek eberwo kadi ebeewo ma wie kubedo arieba ngo meca enyayu lewic i wie; kum en e calacel ma tek wie bedo agwara.

⁶Kum tek dhaku kuriebo wie ngo, wek wie bed anyara: ento tek en e lewic ni dhaku y a junyar wie kadi jugwar de, e dong’ wie bed arieba.

⁷Kum ng’atu ma nico maku wie kud ubed arieba, kum en e ayi ku dwong’ pa Mungu: ento dhaku re en e dwong’ pa ng’atu ma nico.

⁸Kum ng’atu ma nico ai ba dhaku ngo; ento dhaku re m’uai ba ng’atu ma nico:

⁹kum kadi ng’atu ma nico de kucwire ngo pi dhaku; ento ng’atu ma dhaku re m’ucwire pi ng’atu ma nico:

¹⁰kum lembe nini maku dhaku bed ku giranyuthaming’oliwie, nikum malaika.

¹¹Karacelo ku maeni, dhaku bedo umbe ng’atu ma nico ngo, ng’atu ma nico de kubedo umbe dhaku ngo, i Rwoth.

¹²Kum calu dhaku ai ba ng’atu ma nico, e kumeno bende ng’atu ma nico de nyole ni kum dhaku; ento gin ceke ai ba Mungu.

¹³Wupok wun i kindwu giwu: emaku piny nia dhaku rwo ni Mungu ma wie bedo arieba ngo?

¹⁴Cil kurajo de ponjowa ngo, nia, tek ng’atu ma nico yukwie wobo, en e lewic ire?

¹⁵Ento dhaku re tek yukwie wobo, en e dwong’ ire: kum yukwie mire ire ni girauma.

¹⁶Ento tek ng’atu moko nyutho nia eyenyo piem, kura ma kumeno wambe kudo, kadok kanisa pa Mungu de.

¹⁷Ento kan amio iwu lembang’ola maeni, apakuwu ngo, kum wucokru ma wutimo ko ber m’usagu ngo, ento ma wutimo ko rac ma sagu.

¹⁸Kum ma kwong’a, ma nwang’u wucokru i kanisa, awinjo nia pokri ni i kindwu; nyakanok ci ayenyo yie de.

¹⁹Kum yic mi ndra bende gibibedo umbe ngo i kindwu be, kara ju ma jufoyogi ginyuthri i kindwu.

²⁰Ka kumeno ka wucokru karacelo, wucopo camu cemo pa Rwoth ungo:

²¹kum ka wubecamu dhanu ceke kubang’gi ng’atuman lar maku cemo pare mir uthieno gire ma fodi wagi kumaku ngo; man acel kec unege, mange ke mer amera.

²²Ei, wun udi mu mbe ma wucam i ie wumadh de i ie? kadi wucayu kanisa pa Mungu acaya, man wunyayu lewic wi ju ma gimbe ku pinyi? Abiyero ang’o iwu? abipakuwu? I maeni apakuwu ngo.

²³Kum agamu ba Rwoth maeno m’amio iwu, nia Rwoth Yesu ting’o kwen i diewor ma jucibe i ie;

²⁴e kan efoyo foc, eng’weko ie, man ewacu kumae, Maeni kuma, ma en e piwu; wutim kumeni wupoi ko pira.

²⁵Eting’o kikombe bende kumeca, yo ng’ei cemo mir uthieno, ewacu kumae, Kikombe maeni en e lembariba ma nyen i rimba: wrutim maeni, ku ba madhu ceke ma wumadhe, i poi ma pira.

²⁶Kum ku ba camu kwenduni ma wucamu, man ku ba madhu kikombe ma wumadhu nini, wunyutho tho pa Rwoth cil m’ebino ko.

²⁷Kum kumeno ng’atu ma tek bicamu kwenduni kadi ma bimadhu kikombe maeni ma pa Rwoth swa, e lembapoka mi kum Rwoth ku rimbe de bibedo i wie.

²⁸Endre wek ng’atuman ung’i i ie gire, e kan edong’ ecam kwenduni, emadh kum kikombe de.

²⁹Kum ng’atu m’ucamu m’umadhu de, meca ecamu emadhu de lembapoka ire gire, tek eng’io kum nini ngo.

³⁰Kum lembe nini dupa m’i kindwu gibedo ng’ic kumgi de jutho, man dupa ginindo.

³¹Ento tek wang’io i lembe mwa giwa, kuno di jupoko lembe mwa ngo.

³²Ento ka jupoko lembe mwa, e Rwoth ponjowa, kara ku jubin jupok lembe mwa rac karacelo ku ng’om;

³³Kum kumeno, juwada, ka wucokru karacelo nicamu, wukur juwedwu man ukur wadi man ukur wadi.

³⁴Tek ng’atu moko kec ubenege, dong’ ecam ku thugi; kara cok ma wucokru ko karacelo kud ubed ni lembapoka. Dong lembe abiyiko ceng’ ma tek awok.