Read Alur 1 Jukorinto 15 Bible Online

1 Jukorinto 15 - Alur bible

1 Jukorinto 15

¹Nie aketho wung’ei lembanyong’a maeni ma juboth ko m’ayero iwu ma wujolo bende, ma wucungo i ie bende, umego,

²ma wuboth de ni kume, tek wutwiru ndhu wi lembe m’ayero iwu, tek wukuyio mananu ngo.

³Kum alar amio iwu maeca ma an bende ajolo: ya Kristu tho kum dubo mwa calku lembagora pa Mungu:

⁴ya juyike bende; man nia ecer i ceng’ mir adege calku lembagora pa Mungu;

⁵man nia enen ni Kefa; macen ke ni juapar wi ario;

⁶macen enyuthre ni umego ma sagu dak abic wang’ acel, jumoko m’i kindgi ginindo, ento jukucel ma dit gidong’ cil eni;

⁷macen enyuthre ni Yakobo; macen ke ni jukwenda ceke;

⁸man yo ng’eye ceke, calu ni nyathin ma junyole ma fodi kanyol pare kutundo ngo, e enyuthre ira bende.

⁹Kum an a nok ma sagu jukwenda wada ceke, m’aromo ngo ya julwong’a jakwenda, kum anyayu ragedo kum kanisa pa Mungu.

¹⁰Ento ni kum bero pa Mungu abedo ku ramba nini: man ke berone m’emia junwangu ebedo mananu ngo: ento amula ku tic ma sagugi ceke: endre an ungo, ento bero pa Mungu m’ubedo kuda re.

¹¹E kadok an, kadi gin de, wayero kumeni, wun bende wuyio kumeni.

¹²Nie tek juyero ya Kristu cer uai ku kind ju m’utho, jumoko m’i kindwu giwacu ya cer ma kind ju m’utho mbe nenedi?

¹³Ento tek cer mi ju m’utho mbe, kadok Kristu de cer ungo:

¹⁴man tek Kristu kucer ungo, nwang’u lembayera mwa bedo mananu, yioyic mu bende bedo mananu.

¹⁵Eyo, wan de junwang’u wa junyuth mi ndra pa Mungu; kum wanyutho pi Mungu ya eketho Kristu cer eting’e malu: m’eting’e malu ngo, tek ebedo kumeno nia ju m’utho gicer ungo.

¹⁶Kum tek ju m’utho gicer ungo, kadok Kristu de cer ungo:

¹⁷man tek Kristu kucer ungo, yioyic mu en e mananu; nwang’u fodi wuni i dubo mu.

¹⁸E joni bende ma ginindo i Kristu girwinyo.

¹⁹Tek wageno Kristu i kwo maeni kende, nwang’u wa jucan ma sagu dhanu mange ceke.

²⁰Endre kawono Kristu cer ku kind ju m’utho, en e mwoka ma kwong’a mi ju m’unindo.

²¹Kum tho wok ni kum dhanu, cer ma kind ju m’utho bende wok ni kum dhanu.

²²Kum calu i Adamu dhanu ceke tho, e kumeno bende i Kristu dhanu ceke binwang’u kwo.

²³Ento dhanu acel acel ku kakagi kendgi: Kristu landu wi mwoka; macen ju ma gi pa Kristu, i bino pare.

²⁴E kajikne lund ubino, kan ebimio ker ni Mungu, ma en e Wego; kinde m’ebidaru kabu bimobim ceke ku ng’ol ceke man tego.

²⁵Kum ebikocamu ker be, cil m’ebiketho ko jukwoje ceke the tiende.

²⁶Jakwor macen ma bikabre en e tho.

²⁷Kum, Eketho gin ceke doko wor the tiende. Ento kan ewacu kumae, Gin ceke juketho ubed wor, e jung’eyo nia lembene coko ng’atu m’uketho gin ceke bed wor ire ngo.

²⁸Man ka judwoko gin ceke bed wor ire, e Wod nini bende bilund doko wor ire en e ng’atu m’edwoko gin ceke bed wor ire, kara Mungu bed ceke i ceke.

²⁹Tek ebedo kumeno ngo ju ma jumio baputisi igi kaka ju m’utho gibitimo ang’o? Tek ju m’utho gicer ki ngo, jumio baputisi kakagi mir ang’o?

³⁰nedi wakuno kumwa bende ni tho ku ba saa ceke?

³¹Ayero ku ba kulula maeni m’alulo ko piwu, umego, m’abedo ko i Kristu Yesu Rwoth mwa, atho ku ba rupiny.

³²Tek ku kura dhanu anyegra ku yedi i Efeso, kuloka para e girang’o? Tek ju m’utho cer ungo, wek wacam wamadhi, kum urwo watho.

³³Ku juwondwu: Rib ma juribri ko ku ju ma pigi rac nyotho pi jo ma ber.

³⁴Dong’ wuceu ni bedonger pwe de, man kud wudubi; kum jumoko ng’eyong’ec pa Mungu mbe kugi: ayero eni kara lewic unegwu.

³⁵Ento ng’atu moko biwacu kumae, Ju m’utho gicer nenedi? Giwok ku kum manedi?

³⁶I jakasegu, maeno m’icoyo in enwang’u kwo ngo tek ekoetho ngo:

³⁷maeno de m’icoyo, icoyo kum ma bibedo ngo, endre kodhi ma kodhi kende, kuno mi nganu, kadi kwond kodhi mange;

³⁸ento Mungu mio kum ire cil calu ie yenyo, man emio kum ni kodhi ndri kubang’gi kubang’gi.

³⁹Ring’o ceke ring’o acel ungo: ento acel ring’o mi dhanu, ring’o mange ke mi lei, ring’o mange ke mi winyo, mange ke mi rec.

⁴⁰Kum m’i polo bende nuti, man kum m’i ng’om: ento dwong’ mi m’i polo en e acel, mi m’i ng’om bende en e mange.

⁴¹Dwong’ mi ceng’ de acel, dwong’ mange ke mi dwi, dwong’ mange ke mi cero; kum dwong’ mi cero acel e tung’ ku cero mange.

⁴²E cer mi ju m’utho bende bedo kumeno. Jucoye i nyoth; ecer umbe nyoth:

⁴³jucoye m’umbe yung; ecer i dwong’: jucoye i ng’ic; ecer i tego:

⁴⁴jucoye m’e kum mi kum; ecer de m’e kum mi tipo. Tek kum mi kum nuti, kum mi tipo bende nuti.

⁴⁵Egore kumeno bende kumae, Ng’atu ma kwong’a ma Adamu doko ni ng’eyong’ec ma kwo. Adamu macen udoko ni tipo ma mio kwo.

⁴⁶Ento maeno ma mi tipo, en e ma kwong’a ngo, ento maeno ma mi kum re; macen re ma mi tipo.

⁴⁷Ng’atu ma ma kwong’a ca eai i ng’om, en e mi ng’om; ng’atu ma mir arionde en e mi polo.

⁴⁸Calu gin m’i ng’om ubedo, e ju ma gi mi ng’om bende gibedo kumeca: man calu m’i polo bedo, e ju ma gi mi polo de gibedo kumeca.

⁴⁹Man calu wan wadaru bedo kud ayi maeni mi ng’om, e wabibedo kud ayi maeni mi polo bende.

⁵⁰Nie ayero maeni, umego, nia ring’kum ku rimo copo camu pacu mi ker pa Mungu ngo: kadok nyothri de copo camu pacu m’umbe nyothri ngo.

⁵¹Nen, ayero iwu giramung’a: Kawa ceke wabinindo ngo, ento jubilokowa kawa ceke,

⁵²nyapil calu goyo wang’, kinde ma agwara ywak macen: kum agwara biywak, man ju m’utho bicer m’umbe nyothri, e wan de jubilokowa.

⁵³Kum maeni ma nyothre ekoerony ma nyothre ngo be, man ng’atu ma tho maeni ekoerony ma tho ngo be.

⁵⁴Ento ka ma nyothre maeni daru ronyo ma nyothre ngo, man tek ma tho maeni daru ronyo ma tho ngo, lembe m’ugore bilund timbre kakare m’uwacu kumae, Jumwonyo tho i aloci.

⁵⁵E tho, aloci peri ane? E tho, kwimi ane?

⁵⁶Kwir mi tho en e dubo; man tego mi dubo en e cik:

⁵⁷ento foyofoc ni Mungu, m’umio iwa aloci ni kum Rwoth mwa Yesu Kristu.

⁵⁸Kum kumeno, juwada ma jumer, wucung nging’ nging’, ma wulokru ngo, ma wusegru thiri thiri i tic pa Rwoth, kum wung’eyo nia tic ma wumulu kudo en e mananu ngo i Rwoth.