Read Alur 1 Jukorinto 16 Bible Online

1 Jukorinto 16 - Alur bible

1 Jukorinto 16

¹Nie pir ajok ma ni jumaleng’, calu ang’olo ni kanisa mi Galatia, e wun bende wutim kumeca.

²I ceng’ ma kwong’a ma yenga wun kubeng’wu kubeng’wu wukoi piny wuketh i beng’wu i kakan, calku ma wunwang’u, kara ku jujok ajok moko kan awok.

³E kan awok, dhanu ma tek wufoyogi, e abioro joni ku waraga giter ajok mu Yerusalem;

⁴man tek emaku ya an bende acidhi, e wabicidho wakugi.

⁵Ento abibino i beng’wu, nwang’u akadhu kud i Makedoni; kum abikadhu akadha kud i Makedoni;

⁶ento kuno nyo wabibedo wakudu, kadi cil i nindo mi koyo, kara wuketha i woth para ka ma tek acidho i ie.

⁷Kum ayenyo anenwu kawono ngo m’akadhu akadha; kum ageno wabirio nindo moko wakudu, tek Rwoth uyio.

⁸Ento abibedo Efeso maram Pentekote biwok ko;

⁹kum Mungu daru yabu ira dhugola ma dit mi kuloka ma dit, man ke judegi gi dupa.

¹⁰Nie tek Timoteo bino, wunen nia wubed kugi ma lworo mbe i kume; kum etimo tic pa Rwoth, calu an bende atimo:

¹¹ka kumeno ng’atu moko kud ucaye. Ento wukethe i woth pare ma cwinye kwio, kara ebin i bang’a: kum abekurogi gikud umego.

¹²Ento pi lembe pa Apolo m’umegwa, akwaye wang’ udul ya ebin i beng’wu karacelo kud umego: man eyenyo ki ngo ya ebin kawono; ento ebibino nwang’u nindo m’ubedo ber ire wok.

¹³Dong’ wukuru, wucung ki ki ki i yioyic, wubed ratego pami co, wubed tek.

¹⁴Wek gin ceke ma wutimo utimbre i mer.

¹⁵Nie abekwayuwu ma tek, umego (wung’eyo ot pa Stefano, nia en e landu wi mwoka mir Akaya, nia gikethri de gigi ya gitim ni jumaleng’),

¹⁶ya wun bende wubed wor ni wagi ju ma kumeno, man ni dhanu ceke kubang’gi kubang’gi ma gikonjri gikugi i tic man gimuli i tic.

¹⁷Man afoyo kum Stefano giku Fortunato man Akaiko giwok: kum joni giketho maeni m’urem iwu uwok.

¹⁸Kum gidwoko cwinya ku mu bende: ka kumeno dong’ wung’ei wagi ju ma kumeni.

¹⁹Kanisa mir Asia gimothowu. Akula giku Priskila gimothowu dit i Rwoth, karacelo ku kanisa m’i ot migi.

²⁰Utumego ceke gimothowu. Wumothru ku cwiocwic ma leng’.

²¹Moth para an a Paolo gira ku cinga.

²²Tek ng’atu moko maru Rwoth ungo, wek ebed anathema. Maranatha.

²³Bero pa Rwoth Yesu Kristu bed i beng’wu.

²⁴Mema bed i beng’wu ceke i Kristu Yesu. Amen.