Read Alur 1 Jukorinto 2 Bible Online

1 Jukorinto 2 - Alur bible

1 Jukorinto 2

¹An de, umego, kan abino i beng’wu, abino ku bero mi wec ungo kadi mi rieko de ngo m’ayero ko iwu lembatuca pa Mungu.

²Kum akeco ya kud ang’ei gin moko m’i kindwu, ndhu Yesu Kristu, en ma jugure.

³E abedo i kindwu m’abedo ng’ic, ku lworo, man ku mielkum ma dit.

⁴Wec para ku lembayerane de gibedo ni lembacung’a mi rieko ngo, ento i nyuth pa Tipo re man mi tego:

⁵kara yioyic mu kud ucung i rieko mi dhanu, ento i tego pa Mungu.

⁶Wayero rieko, ento, i kind ju ma wang’gi teng’ni kum lembe: ere rieko m’i ng’om maeni ngo, kadi mi jubim m’i ng’om maeni ngo, ma kakare bibekadhu:

⁷ento wayero rieko pa Mungu i lembamung’a, cil rieko m’ubedo apana, ma Mungu lar uketho ku kwong’a ma fodi ng’om umbe ni dwong’ mwa:

⁸ma jubim m’i ng’om maeni moko mbe m’ung’eyo: kum tek ande ging’eyo, kuno di gikuguro Rwoth mi dwong’ ungo;

⁹ento calu egore kumae, Gin ma wang’ fokuneno ngo, ku ma ith de fokuwinjo ngo, Ma fokumondo de i adunde dhanu ngo, Gin ceke ma Mungu yiko ni ju m’umare.

¹⁰Ento Mungu nyuthogi iwa ku Tipo: kum Tipo beyenyo i gin ceke, eyo, cil lembe pa Mungu ma ng’eyo tek.

¹¹Kum ng’a m’i kind dhanu m’ung’eyo lembe m’i ng’atu moko, ndhu cwiny ng’atuca gire, ma ni i ie ngo? gin pa Mungu de kumeno ng’atu moko mbe m’ung’eyo, ndhu Tipo Mungu kende.

¹²Ento wajolo, tipo m’i ng’om ungo, ento tipo m’uai ba Mungu; kara wang’ei gin ma Mungu mio iwa k’abamba.

¹³Ginduni bende e ma wayero pire, ku lembe ma rieko mi dhanu beponjo re ngo, endre ma Tipo beponjo re; m’ebetuco lembe mi tipo ni ju ma gi weg tipo.

¹⁴Nie ng’atu ma mi kum ejolo gin mi Tipo Mungu ngo: kum gibedo ni lemkasegu ire; man ecopo ng’eyogi ngo, kum jung’iogi ku tipo.

¹⁵Ento ng’atu ma won tipo re ng’io i gin ceke, man ke en gire ng’atu moko mbe ma ng’io lembe pare.

¹⁶Kum ng’a m’ung’eyo pidoic pa Rwothi, ketho eponje? Ento pidoic pa Kristu ni i bang’wa.