Read Alur 1 Jukorinto 3 Bible Online

1 Jukorinto 3 - Alur bible

1 Jukorinto 3

¹An de, umego, acopo yero iwu ngo calu ni weg tipo, ento calu ni weg kum, ve ni mukere ma ni i Kristu.

²Akakuwu ku cak, ku ring’o ngo; kum fodi ecopre iwu ngo: eyo, cil ku kawono de ecopre iwu ngo;

³kum fodi wu weg kum: kum ka kumira ku dhau ni i kindwu, meni wu weg kum ungo, man ke wubewotho ve dhanu bewotho gin ungo?

⁴Kum ka ng’atu acel uwacu kumae, An a pa Paolo; mange ke wacu, An a pa Apolo: meni nwang’u wu dhanu ngo?

⁵Ka kumeno Apolo en e girang’o? man ke Paolo de en e girang’o? Gi jutim ma wuyio ni kumgi; man dhanu ceke kubang’gi kubang’gi ng’atuman bedo ko calu Rwoth umio ire.

⁶Apidho, Apolo ke kwoyo pi; ento nyai m’enyai ko Mungu mio en.

⁷Ka kumeno ng’atu m’upidho en e gin moko ngo, kadok en m’ekwoyo pi de; ndhu Mungu re m’umio nyai m’enyai ko.

⁸Nie ng’atu m’upidho ku ng’atu m’ukwoyo pi de gin acel: ento ng’atuman binwang’u sukulia pare gire rom ku tic pare gire.

⁹Kum wan wa jutic ma watimo karacelo waku Mungugi: wun wu girafura pa Mungu, wu giragoma pa Mungu.

¹⁰Calku bero pa Mungu ma jumio ira, acaku there ve jabodho ma riek m’ugomo ot; ng’atu mange de begomo yor i wie. Ento wek ng’atuman unen cu ram ebegomo ko yor i wie.

¹¹Kum there mange ng’atu moko copo caku ngo ma tung’ ku eni ma jucaku, ma en e Yesu Kristu.

¹²Ento tek ng’atu moko begomo wi there mola ma kwar, man mola ma tar, ku kidi ma pire tek, ku yen, ku lum, ku soka;

¹³ku ba dhanu ceke ng’atuman tic pare binyuthre: kum cing’ nino biwodhe ka ma leng’, kum enyuthre i mac; man ke mac e ma biponjo tic mi dhanu en kubang’gi kubang’gi ram ebedo ko.

¹⁴Tek tic pa ng’atu moko m’egomo yor i wie bipor bo, ebinwang’u sukuliane.

¹⁵Tek tic pa ng’atu moko biwang’, ruvwa bikwanye: ento en gire re ebiboth; endre calu kud i leb mac.

¹⁶Wung’eyo ngo ya wun wu hekalu pa Mungu, man Tipo Mungu de bedo i iwu?

¹⁷Tek ng’atu moko nyotho hekalu pa Mungu, Mungu binyothe; kum hekalu pa Mungu e leng’, ma wun de wu hekalune.

¹⁸Dong’ ng’atu moko kud uwondre gire. Tek ng’atu moko m’i kindwu ie wacu nyo e riek i ng’om maeni, wek edok jakasegu, kara edok riek.

¹⁹Kum rieko m’i ng’om maeni en e lemkasegu ku ba Mungu. Kum egore kumae, En m’emaku jurieko i riu migi:

²⁰man kendo, Rwoth ung’eyo lembapida mi jurieko, ya gi mananu.

²¹Kum kumeno dong’ ng’atu moko kud ulule pi dhanu. Kum gin ceke en e mu;

²²kadok Paolo, kadi Apolo, kadi Kefa, kadi ng’om, kadi kwo, kadi tho, kadi gin ma kawono, kadi gin ma bibino; ceke en e mu;

²³wun ke wu pa Kristu; Kristu ke en e pa Mungu.