Read Alur 1 Jukorinto 4 Bible Online

1 Jukorinto 4 - Alur bible

1 Jukorinto 4

¹Wek jukwanwa, calu wa jutim pa Kristu, man ke jukurpiny mi giramung’a pa Mungu.

²Mange ke, ebedo aketha ni jukurpiny ya ng’atuman junwang’e e ng’atu mandha.

³Ento kud i bang’a en e gin ma nyathigi ya wung’i i lembe para, kadi ya dhanu ging’i gin: eyo, ang’io lembe para gira ngo.

⁴Kum ang’eyo lembe moko ngo ma ni i bang’a; ento lembe m’i wia gonjre ni kum lembe maeni ngo: ento ng’atu m’ung’io lembe para en e Rwoth.

⁵Kum kumeno kud wupok lembe moko ma fodi nindone kutundo ngo, cil ma Rwoth biwok ko, m’ebiwodho gin m’i mudho m’upondo uwok i der, man ke ebinyutho lembapora mir adunde; e ku ba dhanu ku ba dhanu man bilund bedo ku pak pare m’uai ba Mungu.

⁶Nie gin maeni, umego, abeloko ya upore ku para ku pa Apolo bende piwu; kara wuponj ng’eyo ni kumwa ya kud wukadh ku wi lembe m’ubedo agora; kara ng’atu moko m’i kindwu kud utingre wi wadi ma ng’atuman tingre wi wadi man wi wadi.

⁷Kum ng’a m’uketho idok tung’i? man ke girang’o m’ibedo ko ma k’igamu agama iri ngo? ento tek igamu agama, idong’ iheri nedi calu k’igamu agama ngo e?

⁸Wudaru yeng’, wudaru doko julonyo, wumaku camu ker ma wambe: eyo an de ayenyo ya wucam ker, kara wan bende wacam ker wakudu.

⁹Kum, ia wacu nyo, Mungu wodhowa ni jukwenda m’e dong’ jik ko ndhu, calu dhanu ma jugonjogi ni tho: kum judwokowa ni giranena ni ng’om, ni malaika ni dhanu bende.

¹⁰Wan wa jukusegu ni kum Kristu, wun re ma wu riek i Kristu; wan wa ng’ic, ento wun re wu tek; wun wu weg yung, ento wan re wabedo umbe yung.

¹¹Cil i saa ma kawono nini kec ubenegowa, ku rieu bende, man muneru, man jubesendowa, man ke kabedo mwa ma dire mbe;

¹²man wamula ku tic, ma wabetimo ku cingwa giwa: ka jubecayuwa, e wamio mugisa; ka jubenyayu ragedo i kumwa, e waciro;

¹³ka jubecidowa, e wapaku dhogwa: judwokowa ni susu m’i ng’om ni cilo mi gin ceke, cil ku kawono nini.

¹⁴A goro gin maeni ma nia unyai lewic i wiwu ngo, ento kara ajukwu calu nyithindho para ma jumer.

¹⁵Kum kadok juponji mu ma i Kristu gi rubanga apar ngi, ento wegwu re gi dupa ngo; kum anyolowu i Kristu Yesu ni kum lembanyong’a,

¹⁶Ka kumeno akwayuwu ma tek, wukwany kotha.

¹⁷Kum lembe nini aoro Timoteo i beng’wu, ma en e nyathin para ma jamer man mandha bende i Rwoth, m’ebipoyowu kum yo para m’i Kristu, cil calu abeponjo ku kaka ceke i kanisa ceke de.

¹⁸Nie jumoko gitingri, calu ya abebino i beng’wu ngo.

¹⁹Ento fodi nyanok abibino i beng’wu, tek Rwoth uyio; e abing’eyo, lembe mi ju ma gitingri ating’a ngo, ento tego re.

²⁰Kum ker pa Mungu eni i lembe ngo, ento eni i tego re.

²¹Wuyenyo ang’o? abibino i beng’wu kud ukede, kadi ku mer man ku cwiny mi bedoyo?