Read Alur 1 Jukorinto 6 Bible Online

1 Jukorinto 6 - Alur bible

1 Jukorinto 6

¹Ng’atu moko m’i kindwu, ma tek lembe ni i kindgi giku wagi, lworo nege ngo nitere i titi i wang’ weg gondri, ma k’etere i wang’ jumaleng’ ungo?

²Kadi wung’eyo ngo nia jumaleng’ bipoko lembe mi ng’omi? man tek wupoko lembe mi ng’om, wuromo ngo ya wupok lembe ma nyanoki?

³Wung’eyo’ ngo ya wabipoko lembe mi malaika? mange ma sagu, lembe mi ng’om maeni?

⁴Ka kumeno tek en e lembe mu ya wupok lembe mi kwo maeni, wuketho ju ma kitgi mbe i kanisa gipoki?

⁵Ayero eni kara lewic unegwu. Ei, jucopo nwang’u jarieko acel ungo i kindwu ma bicopo poko lembe i kind utumin,

⁶ento umego cidho i titi kud umego, gicidho de i wang’ ju ma gi juyic ungo?

⁷Eyo, kawono lembe rocre iwu dit, ma ng’atuman bedo ku lem titi i kindgi giku wadi e. Esagu ngo ya wucir gin ma rac ma jutimo i kumwu? esagu ngo ya wuyi juvugwu?

⁸Eyo, ento wutimo rac wun giwu, man wuvugo avugi, joni de gin umegwu.

⁹Kadi wung’eyo ngo ya ju ma gi weg gondri gibicamu ker pa Mungu ngo? ku juwondwu: kadok weg tarwang’, kadi ju ma rwo ni ayi m’acwia, kadok ju ma gigieri swa, kadi ju ma gi calu mon, kadi ju ma timo sasa ku co wagi,

¹⁰kadi jukwo, kadi ju ma ketho cwinygi hai kum piny, kadok ju ma andrej kong’o, kadi jucac, kadi weg kuvuga, gibicamu ker pa Mungu ki ngo.

¹¹Jumoko m’i kindwu de naka gi wagi ju ma kumeni: ento julwokowu, ento judwokowu leng’, ento lembe m’i wiwu gonjre i nying Rwoth Yesu Kristu, man i Tipo pa Mungu mwa.

¹²Cik uyio ira gin ceke; endre gin ceke kubedo ber ira ngo. Cik uyio ira gin ceke; ento akwero ya ku judwoka jamiru mi gin moko.

¹³Cemo en e mi jambic, jambic ke mi cemo: ento Mungu biketho jambic ku cemo de doko mananu. Ento kum re en e mi tarwang’ ungo, ento ni Rwoth re; Rwoth ke ni kum:

¹⁴man Mungu ting’o Rwoth, e ebiting’owa bende malu ku tegone.

¹⁵Wung’eyo ngo nia kumwu gi wathkum Kristu? abilund kabu wathkum Kristu woko, man abidwokogi ni wathkum dhaku ma won tarwang’i? Awene.

¹⁶Kadi wung’eyo ngo ya ng’atu m’uribre ku dhaku ma won tarwang’ gi kum aceli? kum, Gin ario, ewacu, gibidoko kum acel.

¹⁷Ento ng’atu m’uribre ku Rwoth en e tipo acel.

¹⁸Wuring tarwang’. Dubo ceke kubang’e ma dhanu betimo ubedo woko i kume; ento ng’atu m’utimo tarwang’ meca edubo kum kume gire.

¹⁹Kadi wung’eyo ngo ya kumwu en e hekalu pa Tipo Maleng’ ma ni i iwu, ma wubedo ko m’uai ba Mungu? man ke wu mu giwu ngo;

²⁰kum jung’iewowu ku wel piny: ka kumeno dong’ wuyung Mungu i kumwu.