Read Alur 1 Jukorinto 7 Bible Online

1 Jukorinto 7 - Alur bible

1 Jukorinto 7

¹Nie pi gin ma wugoro pire: ebedo ber ni ng’atu ma nico ya kud emul kum nyaku.

²Ento, kum tarwang’, wek co kubang’gi kubang’gi ng’atuman ubed ku cege gire, man ke mon de kubang’gi kubang’gi wek ng’atuman ubed ku cware gire.

³Wek ng’atu ma nico uribre ku cege ku mer: dhaku bende kumeno giku cware.

⁴Dhaku tegone mbe kum kume gire, ento cware re: ng’atu ma nico bende kumeno tegone mbe kum kume gire, ento cege re.

⁵Kud wukwer ribru karacelo, ma tek wukuripo pire ngo mi nindo moko, kara wumiru giwu ni rwo, e ka wudong’ wubed karacelo kendo, kara Jok kud ubidhwu ku lembe mi dhiro wi kum ungo.

⁶Ento maeni ayero kum juyio ya ayer, ma ang’ola re ngo.

⁷Endre ayenyo ya dhanu ceke bed calu an. Ento ku ba dhanu ceke ng’atuman ubedo ku giramia pare m’uai ba Mungu, acel kumae, mange ke kumae.

⁸Ento awacu ni ju ma aradu man ni mon ma coggi tho de kumae, Maku gibed ndhu calu an.

⁹Ento tek gicopo ciro ava kumgi ngo, wek gigambri: kum tek jugambri ber ma sagu tek kumgi reuni.

¹⁰Ento ni ju ma gigambri ang’olo igi kumae, ere an ungo, ento Rwoth re, Ya dhaku kud uwek cware

¹¹(ento tek eai, wek ebed ndhu musuma, kadi gitit kindgi giku cwarene); man ya nico kud uwek cege.

¹²Ento ni dong dhanu awacu kumae, Rwoth re ngo: Tek umego moko bedo ku cege ma jayic ungo, ma cegene de maru ya gibed gikude, dong’ kud eweke.

¹³Man ke dhaku ma tek ubedo ku cware ma jayic ungo, ma cwarene de maru ya gibed gikude, dong’ kud ewek cwarene.

¹⁴Kum cware ma jayic ungo judwoke leng’ ni kum cege, man ke dhaku ma jayic ungo judwoke leng’ ni kum umego: tek ebedo kumeno ngo nwang’u nyithindho mu gibedo ma gi leng’ ungo; ento kawono gi leng’.

¹⁵Ento tek ng’atu ma jayic ungo ai, wek eai; umego kadi nyamego de gi jumiru ni wagi lembe ma kumeni ngo; ento Mungu lwong’owa i kwiocwiny.

¹⁶Kum ing’eyo nenedi, E dhaku, tek ibibodho cweri? kadi ing’eyo nenedi, E nico, tek ibibodho cegi?

¹⁷Ento, calu Rwoth udaru poko ni dhanu kubang’gi kubang’gi, calu Mungu daru lwong’o dhanu kubang’gi kubang’gi, wek ewoth kumeca. E ang’olo lembe kumeno i kanisa ceke.

¹⁸Julwong’o ng’atu moko ma judaru timo yaa i kume? dong’ kud edok calu ma jutimo yaa i kume ngo. Julwong’o ng’atu moko ma fodi jukutimo yaa i kume ngo? dong’ ku jutim yaa i kume.

¹⁹Yaa en e gin moko ngo, yaango de en e gin moko ngo; ento woro lembang’ola pa Mungu re.

²⁰Ku ba dhanu ceke wek ng’atuman ubed ku rambe ma julwong’e ko.

²¹Julwong’i ma nwang’u i jamiru? cwinyi kud upid pire: ento, tek ecopre iri ya ibed agonya, dong’ iyi.

²²Kum ng’atu ma julwong’e i Rwoth ma nwang’u en e jamiru, en e ng’atu m’agonya pa Rwoth: kumeno de ng’atu ma julwong’e ma nwang’u ebedo agonya de, en e jamiru pa Kristu.

²³Jung’iewowu ku wel piny; kud wudok jumiru mi dhanu.

²⁴Umego, ku ba dhanu ceke wek ng’atuman ubed ku Mungu ku rambe m’ebedo ko kinde ma julwong’e.

²⁵Nie pi nyir ma sumba abedo ku lembang’ola pa Rwoth ungo: ento amio lembe ma ia poro, calu ng’atu m’unwang’u kisa ba Rwoth ya ebed mandha.

²⁶Ia wacu kumeno ya eni ber kum lem ma tek ma kawono ma ni i kumwa, ya e ber ni ng’atu ma nico nia ebed ndhu ku rambe m’ebedo ko.

²⁷Ibedo atwia ku dhaku? kud iyeny nia jugonyi. Ibedo agonya ni dhaku? kud iyeny dhaku.

²⁸Ento tek igamu, meca idubo ngo; man tek nyaku ma sumba gomo co, meca edubo ngo. Ento wagi ju ma kumeni binwang’u can i kum: man ayenyo acerwu ni maeni.

²⁹Ento ayero maeni umego, nindo dong’ cek, kara ugambre kawono ju ma gidaru gambri gibed calu gikugambri ngo;

³⁰man ju m’uywak, calu gikuy wak ungo; man ju ma anyong’a benegogi, calu ma anyong’a negogi ngo; man ju m’ung’iewo ng’ieu, calu gikubedo ku jupiny ungo;

³¹man ju ma gitimo ni ng’om maeni, gibed calu gikutimo dit ungo: kum ayi ng’om maeni bekadhu woko.

³²Ento ayenyo wubed agonya ni gin ma dieng’o cwiny. Ng’atu ma en e jamusuma ie pido pi gin pa Rwoth cu, maram ecopo nyayu ko mutoro i Rwoth:

³³ento ng’atu ma won dhaku re ie pido pi gin m’i ng’om, maram ecopo nyayu ko mutoro i cege.

³⁴Man tung’ tung’ maeni bende ni i kind dhaku ku nyaku ma sumba. Ng’atu m’ugomo co ngo eparu pi gin pa Rwoth cu, kara ebed leng’ i kume kud i cwinye bende: ento ng’atu ma cware nuti re ie pido pi gin m’i ng’om, maram ecopo nyayu ko mutoro i cware.

³⁵Man ayero maeni ni kuloka mu giwu; ma nia abol ko uwic i wiwu re ngo, endre kum maeno ma maku wutim, man kara wutim ni Rwoth ma gin moko mbe m’ucerowu.

³⁶Ento tek ng’atu moko ie wacu nyo etimo rac kum nyare ma sumba, tek nwang’u kagame kadhu, man tek emaku ya ecidhi, wek etim gin m’eyenyo; meca edubo ngo; wek gigambri.

³⁷Ento ng’atu ma adundene cungo tek, ma lembe moko mbe m’ucung’e, ento tego pare nuti kum lembe ma ie caku, man ekeco maeni i adundene gire, ya egwok nyare ma dhe ubed sumba, meca etimo dre.

³⁸Ka kumeno ng’atu m’umio nyare ma dhe ma sumba ya junyom meca etimo dre; man ng’atu m’umio nyare ngo ya junyom etimo ber m’usagu.

³⁹Dhaku bedo atwia maram cware fodubedo kwo; ento tek cware tho, meca egonjre m’ecopo gomo ma ie yenyo; ndhu i Rwoth.

⁴⁰Ento ia poro, nia anyong’a pare sagu tek ebedo kende; man ia wacu nia an bende Tipo Mungu ni kuda.